Oseya 9 - Amazwi Yakwe Leza 2013

Oseya walanda ukuvunukwa kwa ina Izlaeli

¹ Mwe ina Izlaeli mutazanga! Mutazevya ni nsansa ungati izya antu ya mitundu yuze. Mwemo mwasya Leza winu wa mwanaci akalongozya. Mwemo mwaikazya kuli Baali wakwe yacizelele, kuti mukapelwe imbezu zipule izingi.

² Ingano kumwi na waini vitalavula apa kwimula antu. Waini umupya alacepa wakwe cimwi.

³ Mutalikala mu mpanga yakwe Yawe. Mwe aluko lwakwe Efulemu, mulaswilila ku Eguputo, mu mpanga ya Asilya amuno mulalya cakulya icaindwa.

⁴ Kuku kwene antu yatalapelelako amawila yakwe waini kuli Yawe, nanti ukumuzanzya ni mpolelwa zyao. Impolelwa zizyo zilaya wa cakulya capa ndosya, wensi akalya cakulya cico alakowela. Cakulya cico cilaya cakulya sile pamulandu wa nzala, asi wakwe cico cakupeela ku Ng'anda ikulu yakwe Yawe.

⁵ Uzye apa wanda wakuzevya, wanda wakucindikilamo Yawe, antu yayo yalacita cani?

⁶ Nanti angala yalutuka uononesi, aina Eguputo yalayakolonganya, nu ku yiika mu malindi kuku kwene ku Memfisi. Apa vyuma vyao vyakwe siluva palamela ivikona. Mu mang'anda yao mulamela imyunga.

⁷ Insita ya kuvunukwa yatiyiza, amanda ya kulipilwa yatiyafika. Lyene yalamanya ukuti ivintu kwene vii vyacumi. Ndakai yakuvwanga yati, “Kasema wii wapena, umuntu uwa mano yakwe Leza iciwelewele!” Pamulandu wakuti ukwifya kwao ukukulu, yene yampata wakwe cimwi.

⁸ Kasema, kumwi na Leza aliwe akalinda aluko lwakwe Efulemu, lelo kasema wiyo yakamuteya iviteyo umu nzila zyakwe zyonsi, nga anisi yakwe yali nu mu Ng'anda kwene yakwe Leza.

⁹ Antu yipilako ndi vino cacitike ku Gibeya. Pamulandu wakwe cico Leza atalilila uyi wao, nupya alayavunuka pa maifyo yao.

¹⁰ Yawe akuti, “Inkolelo lino nazanyile Izlaeli cali wakuzana amatingi amutengo. Ivikolwe vyakwe vivi navitemilwe ungati ukulola iviseekwa vya nkolelo vya misamvu. Lelo lino yizile ku Baali Peoli, yatandike ukupepa Baali nga yasanguka yaya camuselu wa unkolanya kwene wao uwa, uno yatemilwe.

¹¹ Ucindami wa luko lwakwe Efulemu ulapita wa kupapuka kwa cunyi. Yene yatalakwata ana nupya. Aci yao yatalatala yaye pa ukulu, yatalasenda indilwa, awe.

¹² Nanti angala yene yangavyala ana, ndayonona, kusi umwana nanti wenga alasyala umumi. Kalanda kuno yali lilyo lino ndayafutatila.

¹³ We Yawe, natindola vino ana yao yakuyalunga nu kuyakoma wa nyama. Aluko lwakwe Efulemu yalatungulula ana yao uku nkondo kuko kuno yalakomwa.

¹⁴ Uzye icani we Yawe cino namakulenga ukucitila antu yaa? Si leka aci yao yaye ing'umba, Muleke yaposiwa nu konsya ana yao.”

¹⁵ Yawe akuti, “Uyi wao onsi ulaloleka makamaka ku Giligali. Kuku akuno natandike ukuyapata. Ndayazinga mu mpanga yane, pamulandu wa vicitwa vyao iviipe. Ntalatala njatemwe nupya. Intunguluzi zyao zyonsi zyansangukila.

¹⁶ Aluko lwakwe Efulemu yakoline wa cimuti icisindwe cino imisisi yakweco yuma, nupya citanga ciseeke iviseekwa. Nanti angala antu yayo yangavyala ana, nemo ndakoma ana yao akundwe.

¹⁷ “Leza wane alakana antu kwene yayo pamulandu wakuti yakana ukumuyela. Yalalulumba sile pakasi ka nko zyuze.”