Oseya 5 - Amazwi Yakwe Leza 2013

¹ “Mwe yasimapepo, uvwini vii! Mwe ina Izlaeli mwe, mukutike mwensi.

² Yacisanguka yatiyapitilizya ukwifya wakwe cimwi, Nemo ndayavunuka yonsi pyu.

³ “Antu yakwe Efulemu nayamanya, aina Izlaeli yatafisama kunondi. Antu yakwe Efulemu yasi acumi kunondi, aina Izlaeli aipe imisango.”

Hosea wasoka antu akapepa utuluwi

⁴ Imilimo yao iipe isiyazumilizya ukuwelela kuli Leza wao, pano yakweti imyenzo yakuntataila, nupya yasizumila vyapali Yawe.

⁵ Icilumba ca ina Izlaeli casanguka umboni wakuyanenola. Cumi kwene Efulemu amapumeka umu maifyo yakwe. Yuda nawe kwene amapumeka pamwi na aliyo.

⁶ Lino antu yasenda imfwele zyao ni ng'ombe zyao kuti yakapele impolelwa apa kulondalonda Yawe, yene yatalamuzana, pano wene watayasya.

⁷ Yene yasi acumi kuli Yawe, caleka ana yao nayo kwene yasi yakwe Leza. Acino ukuzevya kwao kwa inamasi kulayonona kumwi ni vyalo vyao.

Inkondo pakasi kakwe Yuda na Izlaeli

⁸ Lizini intandala mu Gibeya, lizini ipenga mu Lama! Sanzulini kupunda kwa ulwi mu Beti Aveni! Mwe aku Benjamini si tungululini!

⁹ Efulemu alasanguka icitumba apa wanda wa kuvunukwa. Mwe ina Izlaeli cumi kwene nkumunena ukuti cii cilacitika.

¹⁰ Yawe akuti, “Intunguluzi zyamu Yuda zikoline na yayo akacita inkondo kuti yasezye yanande. Pamulandu kwene uu nemo ndapongolwela ukuvunuka kwane ungati a mulamba.

¹¹ Antu yakwe Efulemu yakuzunyiwa, nu kufyengelekeziwa pamulandu wa kuuvwila yauze.

¹² Pamulandu wakwe cii ndonona Efulemu, wakwe vino ivipepelya vikaonona insalu, ndaya wa mpofya ku antu aku Yuda.

¹³ “Lino antu aku Efulemu yalola ukuti yakulwala, nga antu aku Yuda nayo yalola ivilonda vyao, antu aku Efulemu yaya iyaya ku ina Asilya, antu aku Yuda nayo yatuma amazwi ku mwene mukulu, kuti ayazwe. Lelo wene atakweti amaka akuyapozya nanti ukulwazya ivilonda vyao.

¹⁴ Ndazanza antu yakwe Efulemu wakwe vino cisama akazanza, ndayalepola mu tumpimfya ndi vino cisama wamaka akacita. Nemwisikulu ndayasantola nu kuyasya. Lino ndayakululula, kusi nanti umwi alaya na maka akuyatuula.

¹⁵ “Alino lyene ndaswilila ku cifulo cane, mpaka lino antu yane yalazumila ukuti yali nu mulandu, nu kutandika ukundondandonda. Mu ucuzi wao yalezya ukundonda ni myenzo yao yonsi kuti yanzane.”