Oseya 11 - Amazwi Yakwe Leza 2013

Ukutemwa kwakwe Leza apa antu yakwe yacisanguka

¹ Yawe akuti, “Lino Izlaeli wali umwana munono, namutemilwe nga imwama umwanane ukufuma lino wafumile mu Eguputo.

² Lelo lino natwalilile ukumwama, nawe alunduluka ukufuntuka kunondi. Apeela ni mpolelwa kuli Baali nga nu kocela ubani amaunkolanya yayo.

³ Nanti cali vivyo anene nasambilizye aluko lwakwe Efulemu ukupita. Nene kwene nayelezile, lelo yatamanya ukuti nene nayasunganga.

⁴ Nayapalamike kunondi uku luse nu kutemwa. Nayanyemwile nu kuyemekezya kwi tama lyane. Nakontime nu kuyimula.

⁵ “Acino antu yayo yalaswilila umu uzya ku Eguputo. Aina Asilya yalayateeka, pamulandu wakuti yene yakana ukuwela kunondi.

⁶ Inkondo ilonona imisumba yao. Anisi yalavuna imilyango ya mpongolo zyao nu kuyonona, pano aisikulu yalondela sile amapange yao.

⁷ Antu yane yakonkowezya ukumfutatila. Acino yene yalakuuta pamulandu wi koli ilili pano yali nga lelo kusi nanti umwi alayafumizya.

⁸ “Uzye ungamfuulila uli we Efulemu? Uzye ningakutazyela uli we Izlaeli? Uzye ningakusenula uli wakwe Adima? Uzye ningakonona uli wakwe Zeboimu? Umwenzo wane ukuti cipelele ukutali, ukutemwa kwane kunuli ukukulu.

⁹ Ntalakuvunuka mu ukali wane, ntalakonona we Efulemu, pano nene indi Leza, insi muntu awe. Nene, Wamuzilo wilya, indi namwe. Nupya ntalawela kunomuli ku kwiza monona.

¹⁰ “Antu yane yalandondela lilyo lino ndang'anzila anisi yao wakwe cisama. Alino yalasimwilila kunondi ale yakuzakaza ukufuma ku uwondaka.

¹¹ Yalawela ale yakuzakaza ungati ivyunyi, ukufuma ku Eguputo, Yalawela ungati ivipeele ukufuma ku Asilya. Lyene ndayatwala nupya kumwao. Kuu kuli kulanda kwakwe Yawe.”

Izlaeli na Yuda yapeelwa umulandu

¹² Yawe akuti, “Aluko lwakwe Efulemu yanzinguluka nu ufi. Aina Izlaeli yakatumpoka wakwe cimwi. Aluko lwakwe Yuda nayo kwene yatiyamfutatila ne Leza, Wamuzilo wilya nupya uwacumi.”