Oseya 1 - Amazwi Yakwe Leza 2013

¹ Mu manda ya kuteeka kwakwe Uziya, na kwakwe Yotamu, na kwakwe Aazi nga na kwakwe Hezekiya, yamwene aku Yuda, nga nu mu manda ya kuteekwa kwakwe Yeloboamu umwana umonsi wakwe Yeoasyi umwene waku Izlaeli, Yawe wapile ilandwe kuli Oseya umwana umonsi wakwe Beeli.

Umuci wakwe Oseya na ana yakwe

² Lino Yawe watandike ukuvwangila muli Oseya, wene wamunenyile ati, “Pita uye ukasake umwanaci cizelele nga akuvyalile ana yano yatalaya acumi. Pano antu amu mpanga ii yamfutatila nupya yasi acumi.”

³ Acino Hosea atwala Gomeli umwana umwanaci wakwe Dibulaimu. Umwanaci wiyo nawe asenda indilwa, nga pacisila amuvyalila umwana umonsi.

⁴ Lyene Yawe anena Oseya ati, “Umutemele izina lyakuti Yezileele, pano apacisila ca nsita inono sile nasya imvunuke ang'anda yakwe Yeu pamulandu wakuti wene wakomile antu avule uku Yezileele, nga ndalenga uwene wa Izlaeli ukwiza uku mpela.

⁵ Mu wanda ulya ndonona ulamba wa vita vya Izlaeli mu Cifoloma ca Yezileele.”

⁶ Gomeli nupya kwene asenda indilwa nga aca avyala umwana umwanaci. Lyene Yawe anena Oseya ati, “Umutemele izina uti, ‘Atatemwikwa,’ pano aina Izlaeli ntalayatemwa nupya nanti ukuyelela amaifyo yao.

⁷ Lelo nanti cili vivyo nemo ndatemwa amu mutundu wakwe Yuda, nupya ndayatuula uku maka yane, ne Yawe Leza wao. Ntalayatuula apakuomvya ulapwa, nanti amalupanga, nanti mfwalasi na asilika akakwela pa mfwalasi, ndi vino cikaya apakulwa inkondo, awe.”

⁸ Pacisila lino Atatemwikwa walumuka, Gomeli akwata umwana namuze umonsi.

⁹ Lyene Yawe anena Oseya ati, “Mutemele izina uti, ‘Asi antu yane,’ pano mwe ina Izlaeli musi antu yane, nani insi Leza winu.”

Izlaeli waweziwa

¹⁰ Lelo aina Izlaeli yalavula wa musensenga uwamu nkumba yakwe yemba, uno utangapimwa nanti kupendwa. Pali ndakai Leza akuyanena ati, “Mwemo musi antu yane,” lelo uwanda uliza lino wene alayanena ati, “Mwemwe ana yakwe Leza wa umi!”

¹¹ Antu aku Yuda na aku Izlaeli yalayakundanya pamwi cipya cipya, nga nayo yalaisolela intunguluzi yonga. Alino yalatukuta nu kukula mu mpanga yao. Endi uwanda wakwe Yezileele ulaya uwanda ukulu cuze!