Obadiya 1 - Amazwi Yakwe Leza 2013

¹ Uu, uli usemo wakwe Obadiya wa pali vino Yawe Simwandalali walanda pa kuvunukwa kwa luko lwakwe Edomu. Yawe watatuma inkombe zyakwe ku antu amu nko zyonsi, nga naswe twatituvwa amazwi yakwe akuti, “Iteyanyini! Tuyini tukalwisye aina Edomu!”

Yawe alavunuka uluko lwakwe Edomu

² Yawe akunena aina Edomu ati, “Ndamutembola, cakuti nu muntu wensi alamusuula wakwe cimwi.

³ Mwatumpikwa ni myenzo inu yacilumba cilumba. Umusumba winu ukulu wamutumpika, pano mukwelenganya ukuti mwacingililwa pamulandu wakuti wene wakuulwa pakasi ka myamba itali iya milunda. Imuivwanzya mweisikulu muti, ‘Uzye aweni angatupulumula nu kutufwanta pansi?’

⁴ Lelo nanti mungapapuka umupela wakwe lyang'anda, nu kuluka ivinsanzo apakasi ka ntanda, nemo ndamusamula nu kumuponya wa maleka. Avino Yawe wavwanga.

⁵ “Aivi ndi yiza usiku, yakaisendela vino yakulonda. Yayo akakulula amatingi ndi yiza ku kukulula amatingi, yakasyako amatingi yamwi. Lelo mwemo anisi inu yalamulovya.

⁶ Lolini muno impanga yakwe Esau yatiyononekela, namuno yakusampa ivyuma vyakwe vyonsi.

⁷ Antu yano mulemenkine nayo, ayano yakumutumpoka nu kumuzinga umu mpanga inu. Antu akumwazwilizya mu ulwi ali yano yalamucimvya. Yacuza inu apa mwenzo yalamuteya. Yene yalavwanga yati, ‘Uzye ukucenjela kwao kuli kwi?’

⁸ “Mu wanda ulya indonona antu yamano yonsi aku Edomu, indayavulunganyizizya nu kucenjela kwao kwene, ukwa amu mupanda wakwe Esau.

⁹ Ivita vyaku Temani navyo kwene viluvwa intete, na asilika yonsi aku myamba yakwe Esau yalakomwa.”

Ivintu iviipe vya ina Edomu

¹⁰ Mwe ina Edomu mwe, pamulandu wakuti mwaile imuzanza nu kwiyila akazi kinu, amu mupanda wakwe Yakobo, namwe mulononwa nu kuzewana mpaka umuyayaya.

¹¹ Mwemo mwaimi nu kulolekesya sile kuno anisi yakupokolola icuma cao, nu kucita kwati mwatimumana akapi nayo, lino yakuvuna ivisasa nu kwingila apa mpongolo zya Yelusalemu, ku kwankana icuma.

¹² Mwemo mutalinzile ukusyenteka anyonko Ayuda pamulandu wa malanda yano yayaponela. Mutalinzile ukuzangila mu wanda wa kononwa kwao, nanti ukuyaseka mu nsita ino yene yakucululuka.

¹³ Mutalinzile ukwingila mu musumba wa antu yane kuti mukayasyenteka apa kucululuka kwao, nu kusampa ivyuma vyao apa wanda uno yaponelwa nu uzanzo.

¹⁴ Mutalinzile nanti ukulolela apa masansa, apakuti muleme yayo akwezya ukuutuka. Mutalinzile ukuyapela mu makasa ya anisi yao pa wanda wa kucula kwao.

Wanda wakwe Yawe

¹⁵ Wanda wakwe Yawe ukwiza zuwa, lilyo lino wene alapingula imitundu yonsi ya antu. Mwe ina Edomu, vino mwacitila auzo avino mulacitilwa. Vino mwacisile ivilamuwelela.

¹⁶ Antu yane yalamwela umu lwako luwaye pa mwamba wane uwamuzilo, lelo imitundu yuze iya antu ili nu kumwela mu lwako uluwaisye ukuluta, alino lyene yalowe nu kulowa.

Ukucimvya kwakwe Izlaeli

¹⁷ “Lelo pa mwamba wa Zioni palikala yamwi alapusuka, alino nu mwamba ulaya uziliziwe. Lilyo kwene ali lino amu mupanda wakwe Yakobo yalapokelela icaupyanyi cao.

¹⁸ Amu mupanda wakwe Yakobo yalaaka wa moto, na amu mutundu wakwe Yosefu nayo yalaya wa makala ya moto, amu mutundu wakwe Esau yalaya wa mapelele. Yene yalononwa ndi vino umoto ukaonona amapelele.” Avino Yawe wavwanga.

¹⁹ “Ayuda aku Negebu yalikala mu myamba yakwe Esau, nga aku uwondaka yalikala mu mpanga ya ina Filisti. Aku katutu yene yalikala mu mpanga yakwe Efulemu alino nu mu musumba ukalamba wa Samaliya. Aina Benjamini yalikala mu mpanga yaku kayeya ka Gileadi.

²⁰ Aina Izlaeli yano yali mu uzya yalikala mu mpanga ya Kenani mpaka ukufika nu ku uwondaka ku Zalefati. Aku Yelusalemu yano yali mu uzya ku Sefaladi yalikala mu misumba yaku katutu uku Negebu.

²¹ Aku Yelusalemu yano yali mu uzya ku Sefaladi yalazanza nu kucimvya aina Edomu, nga nu kuyateeka. Lyene uwene onsi ulaya uwakwe Yawe.”