Neemiya 9 - Amazwi Yakwe Leza 2013

Aina Izlaeli yailongwela amaifyo yao

¹ Apa wanda uwalenga amakumi yaili na yani uwa mwezi kwene uwa, aina Izlaeli yonsi pyu yakongana uku kuifuntusya ku lunkumbwa lwa kulya icilyo. Lilyo ala yazwite ivisamu nga ala yatiyaiswela ni twi ku mitwe.

² Fwandi yao atuntuka uku cikolwe cakwe Izlaeli yaipaatula aisikulu ku inamasi. Yimilila siki apakuti yaivwangile aineco apa maifyo yao nu utalami wao, nga ni nkota zya vikolwe vyao.

³ Cila muntu aimilila apa ncende yao, ala yakuyawelengela mu Lupapulo lwa Masunde yakwe Yawe Leza wao. Apa nsa zitatu ala yakuwelenga nu kupituluka umu Masunde yakwe Yawe. Alino nupya apa nsa zyuze zitatu yafukama nu kupepa nu kuilongwela amaifyo kuli Yawe Leza wao.

⁴ Apa cintamba ca mbao pimilile aina Levi yaa, Yesyua, Bani, Kadimiyeli, Syebaniya, Buni, Syelebiya Bani na Keenani. Yonsi yaa yapundanga apa kupepa kuli Yawe Leza wao.

⁵ Alino aina Levi yaa, Yesyua, Kadimiyeli, Bani, Hasyabineya, Syelebiya, Hodiya, Syebaniya na Petaya iyavwanga iyati, “Katukini nu kulumbanya Yawe Leza winu. Mulumbanyini amanda pe! Kalicindikwe izina lyakwe lyamuzilo, nanti angala kusi umuntu angaulumbanya icifumaluke.”

Ipepo lyakuilongwela

⁶ Lyene aina Izlaeli yapepa ipepo lii: “Awewe wenga mpo, wewe uli Yawe. Awewe waumvile iyulu pamwi ni ntanda izyaya mwenemo. Awewe waumvile insi pamwi na vyonsi vino vyaya mwenemo. Awewe waumvile Yemba pamwi na vyonsi vino vyaya mwenemo. Awewe ukapeela umi kuli vyonsi, nga ni vya maka vya mwiyulu vikaoopa wewe nu kukufukamila.

⁷ We Yawe Leza awewe wasolwile Abulamu. Wamufumizye ku mpanga ya Uli uku ina Kalideya, umupela ni zina ilipya lyakuti Abulaamu.

⁸ Wazanyile ukuti umwenzo wakwe uwakutontelela. Fwandi ali pakupangana nawe upangano wa kumupeela impanga yaku Kenani, impanga ya ina Hiti ni ya ina Amoli, ya aina Pelizi, ya ina Yebusi nga ni ya ina Giligasi, apakuti ingaya impanga yakwe ni ya luko lwakwe. Wemo ukawaka upangano wako, pano wewe wacumi.

⁹ “Waweni intazi nu kucula kwa vikolwe vitu umu Eguputo. Wuvwile ni mpoma zyao, kuli Yemba Muyenzu.

¹⁰ Lyene wemo ali pakucita ivinjelengwe ni vizungusyo, ivyakulwisya Falao, aomvi yakwe pamwi na antu yonsi amu mpanga yakwe, pamulandu wa ukakasi uno yayacitile. Wemo waicitile ululumbi lwako luno ucikweti na pilelo kwene.

¹¹ Wapaalwile yemba apa manso yao. Lyene uyatungulula yapita apakasi na nkasi apuume ndi. Lelo anisi yao ayalondelile yene wayasumba umwi ziya, wi we lino yavwintila umu luzi lwa mukuku.

¹² Umusanya wene wayatungululanga umwi kumbi, alino usiku uku cimbilimbili ca moto, icayakozezyanga inzila umwakupita.

¹³ Wizile utentemukila apa Mwamba wa Sinai. Apano wemo wavwanzile ku antu yako ukufuma umwiyulu, nu kuyapeela amasunde alungame nupya ampomvu, ni vipope na malamulo asuma.

¹⁴ Wayasokololwile ukumanya uwanda wako uwi Sabata. Wayapile amalamulo, ivipope na masunde ukupitila mu muomvi wako Mose.

¹⁵ “Alino apakuti yatuuke uku nzala wayapeelanga icilyo ukufuma kwiyulu. Apakuyapususya uku lusala nalyo wayapeelanga amanzi ukufuma umwiwe. Wemo wayanenyile ukuya pokolola impanga ino walavile ukuyapeela.

¹⁶ Nga lelo ivikolwe vitu vyacisile icilumba, vyumalala imyenzo nu kusuula amasunde yako.

¹⁷ Ivikana ukuyela, iviilila ni vinjelengwe vino wacisile apakasi kao. Vyumalala imyenzo nu kusolola intunguluzi yakuyaswilizya mu uzya ku Eguputo. Lelo wewe Leza wa luse, uwa cikuku na mizu, asisoka zuwa. Amizu yako akulu. Acino wemo utayatazyezile.

¹⁸ Nanti alino yamasile icimumbwa ca ng'ombe, cakwe munyela ni vyela, ale yakuti, ‘Wi ali Leza witu, uwatufumizye umu Eguputo!’ Nanti sile lilyo lyonsi lino yavwanzile amazwi ya misuli cuze kunuli.

¹⁹ Lelo wemo ku luse na mizu yako akulu utatazile uyatazyele foo, lino yali mu lwanga. Imvumba ya cunsi ci kumbi itatazile iyasye. Apa macaca ali ino yayatungululanga inzila ukwa kulungama, nga usiku cimbilimbili ca moto naco cayakozezyanga umwakupita.

²⁰ Wapiile umupasi wako usuma apakuti yasundike. Wayimwile mana nga uyapeela na manzi akukoma ulusala.

²¹ Umu lwanga wayasakamile wakwe cimwi apa myaka amakumi yani. Yene yatulilwe nanti cimwi, nanti ukusizya yatatazile yasizye. Ingazo zyao nazyo zitatazile zivimbe nu kuwaya.

²² “Wayapile impanga nyanya pamwi na antu kwene. Yacimvyanga imitundu yonsi iya palamile uku mpanga ino wayapile. Yapokolwile Hesyiboni, impanga ino Siooni wateekanga, ni mpanga yakwe Basyani, umwateekanga Ogi.

²³ Wasandulwile ana yao aonsi kwati intanda zya mwiyulu, nu kuyatwala umu mpanga ino walavile kupeela ivikolwe vyao. Yingile mwenemo nu kupoka yaiposile.

²⁴ Fwandi ali vino ana yano yingile mwenemo yaipoka nu kuipoka. Yazanzile aina Kenani mpaka yazuka yaya zii, kumwi na yamwene ya mwenemo na antu yao, yayanyata yacita na vino yakulonda kunoyali.

²⁵ Yapokolwile imisumba ya malinga, ni mpanga ivunde, amang'anda ni nkoma zya vyuma. Yapokolwile ni vifula vino yimba calimwi, imiolivi, imiti ya viseekwa, ni vyalo vya matingi. Yene yalyanga yikuta nga lyene pasi pakwina. Yene yailyokezyanga ivintu ivisuma vyonsi vino wayapile.

²⁶ Lelo antu yako yene yakusangukile yakana uku kuyela. Yafutatila na masunde yako. Yakomola na yakasema yao ayaceulanga, apakuti yangawezya amano kunuli. Yene yavwanzile amazwi ya miponto kunuli.

²⁷ Fwandi nawe ali cino wayapile mu makasa ya anisi yao, nayo ali pakuyacuzya. Na lino yacuziwa cuze yapunzile ntulwe kunoli. Nawe ali pakuyuvwa ukwako kwiyulu, nga ku luse lwako ulukulu uyapeela akuyatuula, akuyakuulula ku anisi yao.

²⁸ Lelo akula sile cino yala yuma akamuza, ayayo nupya kwene iyifya. Lyene nupya kwene uyapeela umu makasa ya anisi yao yayacuzya. Nga lelo lino yazenzuka nu kukuuta kunuli kuti uyatuule, nawe ukwako kwiyulu uyuvwa, nga amaila na maila wemo wayatuulanga uku luse lwako ulukulu.

²⁹ Wemo uyasoka kuti nupya yatandike ukusunga masunde yako. Lelo yene yacita icilumba, yakana kuyela amasunde yako. Nanti angala kulondela amasunde ili nzila yakupeelelwamo umutende. Antu yaya yatalama, nupya yakana ukuyela.

³⁰ Apa myaka iingi ala wayatekelela. Wayatezela nu kuyaceula ukupitila muli yakasema, lelo yene yatange yakuvwe nanti panono. Fwandi ali cino wasuka waleka anisi yao yayacimvya.

³¹ Nga lelo apamulandu sile wamizu yako yakulisya, utatazile uyatazyele nanti ukuyonona foo. Wewe mwene Leza wa cikuku na mizu.

³² “Ale fwandi, we mwene Leza witu! We Leza wakoofya, wemo wakwatisya amaka! Wemo ukawaka amalayo ya kutemwa aupangano wako. Utasuula ulanda witu uu uno watiutwizila sweswe swensi, ukutandikila pali yamwene itu, intunguluzi zitu, yasimapepo itu, yakasema itu, pamwi ni vikolwe vitu, na antu itu yonsi pyu. Ukutandikila sile pa manda yakwe yamwene aku Asilya, lino yatucuzyanga ukwizafika na pilelo kwene, silola vino twacula!

³³ Wemo wacita icilungame pa kutuvunuka. Wewe wacumi muli vino wacita, nanti angala swemo twifya.

³⁴ Ivikolwe vitu, yamwene itu, intunguluzi zitu, na yasimapepo itu, yonsi yakanyile kulondela amasunde yako. Yakana ukuwaka amalamulo yako navino wayasokanga.

³⁵ Lino yali umu mpanga yao isalale ino wayapile, iyo iyali ivunde, ivyuma vya mwenemo ala vili mbwee, lelo nalyo kwene yaposiwe ukuzenzuka nu kukutumikila.

³⁶ Silola, twatituya azya ilelo, umu mpanga ili iyakwitu kwene, impanga iya muvundo ino ikatupela ivyakulya.

³⁷ Ivikufuma umu mpanga itu kwene vyene vikuya kuli yamwene yano lyene watupeela kuti yatuteeka pamulandu wa kwifya kwitu. Lyene yakuicitila consi cino yatemwa apa mili itu napa viteekwa vitu. Iye mwe! Ala tucule!”

Antu yacita upangano

³⁸ “Pamulandu wakwe vivyo vyonsi, icalenzile ukuti swe ina Izlaeli tuzumilizyanye ukucita upangano uu uwa ufumacumi. Twalemba apa cipampa. Twafwatika penepo ni nsimbi nu kusainapo amazina ya ntunguluzi zitu, aina Levi na yasimapepo itu.”