Neemiya 5 - Amazwi Yakwe Leza 2013

Akama yafyenga apina

¹ Lino papita insita imwi antu yamwi pamwi na aci yao yatandika ukuinong'onya pa vicitwa vya Ayuda yauze.

² Pasipano kwali antu yamwi avwanzile yati, “Sweswe pamwi na ana itu aonsi na anaci kwene tuvuzile wakwe cimwi. Acino tulinzile ukukwata cakulya pakuti tuye nu umi.”

³ Yauze nayo ala yakuti, “Swemo twasitika vyalo vitu, ni vyalo vitu vya matingi nga na mang'anda itu apakwazima impiya pakuti tutakafwe uku cipowe.”

⁴ Alino yamwi nayo ala yakuti, “Twatitwazima impiya zyakulipa umusonko ku mwene wapa vyalo vitu nga ni vyalo vya matingi kwene.

⁵ Nanti angala sweswe yali yamwi na Ayuda yanji. Uzye ana itu yatakoline na ana yao? Lelo tulinzile twakazya ana itu wa azya. Twatitukazya mpiti ana itu yamwi anaci wa azya, pamulandu wakuti antu yauze yatupoka vyalo vitu kumwi ni vya matingi kwene.”

⁶ Walanga nuvwa ukuilizyanya kwao, insoka wakwe cimwi.

⁷ Nga nelenganya ukucitapo cimwi, inkalipila asambazi yaya ni ntunguluzi inti, “Mwe! Uzye icisendo ca mwata ci cino mukutwika auzo?” Ali vino naamile nu ukongano ukalamba kuti njapele umulandu.

⁸ Niza nayanena nati, “Anyonko yaa, Ayuda, yano yakazilwe uku Akulukuwa, twayakulula apapezile amaka itu. Lyene nupya mwemwe kwene mwatandika ukukazya anyonko apakuti tuce tukayakulule nupya!” Nayo yatenzi kututu, ukwaula ukukwata ni vyakulanda.

⁹ Ali cino nani nkumunena inti, “Cino mukucita citazifile foo. Uzye musikulonda mwapita na antu akwatila Mwene Leza witu coopo apakuti mutaleka intusi zyafuma pakasi ka anisi itu atupata?

¹⁰ Ala nani kwene pamwi nanji twayazime impiya ni ngano. Fwandi cazipa ukuti tuvisuule? Tusule sile uku nkongole zitu.

¹¹ Yawe zezini ukwaula nu kusumba insita. Vyonsi pyu! Ivyalo vyao, ni vyalo vyao vya matingi, imiolivi, na mang'anda yao kwene. Yawe zezini inkongole zya mpiya zino yazime kuno muli!”

¹² Apa kuuvwa vivyo, nayo yavwanga yati, “Mukwai tumayawezezya. Tulayawezezya ivyuma vyao ukwaula ukulifya inkongole zyao.” Fwandi nani, ali pakwama yasimapepo apakuti asambazi ni ntunguluzi zyao zilape apa manso yao nu kusunga umulapo uno yamalapa.

¹³ Ali pakuzula icisempe cansalu ino nazwite, nacikunta navwanga nu kuti, “Ali vino Yawe Leza, alakunta umuntu ali wensi uwa muno muli, nu kumuzinga umu ng'anda yakwe, nu kumupoka vyuma vyakwe.” Ali vino umuntu wiyo alinzile akuntwe. Atasyala nanti cimwi. Iuvi lyonsi nalyo ali pakwasuka iliti, “Ciye vivyo kwene!” Nga lilumbanya Umwene. Nga antu nayo yafikilizya ulayo wao.

¹⁴ Nupya ukutandikila sile lino nasonsilwe ukuya umulasi wa mpanga yakwe Yuda, lilyo ale umwene Alitakisesi ali ni myaka amakumi yaili apa wene, suka wiza wakwata ni myaka amakumi yatatu na yaili nemo pamwi na inane, tutatazile tulye icilyo nanti cimwi ica ulasi.

¹⁵ Lelo alasi ankolelile yacuzyanga antu. Yapokololanga antu ivyakulya na waini ukwika penepo ni mpiya zyakwe siluva, anganyoma ukulingana na citika wakwe kilogalamu. Alino na aomvi yao kwene yatesile antu ukukalili. Nemo palwane intatazile incite icamusango ndi uo, apamulandu nu koopa Leza wane.

¹⁶ Alino naipelisye ku mulimo wakukuula ilinga lii nga ntalonsile impanga nanti imwi. Antu yonsi yano nali nayo yakomelike uku mulimo kwene uu.

¹⁷ Nga nupya nimulanga Ayuda na alasi ukulingana umwanda onga na makumi yasano, ukulunda pa antu yonsi afumile umu tumizi utwazingulwike.

¹⁸ Cila wanda nimulanga antu masaye wenga, imfwele izitelepelele mutanda, pamwi ni nkoko zimwi. Alino ndi papita amanda ikumi lyonga, napo iyapanga waini uwa musango uli onsi ukulingana nu kuvula kwa antu. Lelo kwene nanti cali apamulandu wakuti ivyalondwanga uku antu yane vyavuzile wakwe cimwi, nemo ntatazile ndenge icilyo nanti cimwi ukufuma ku mulasi.

¹⁹ Caleka we Leza wane, ule walukunjiusya pamulandu ni visuma vyonsi vino nacitila antu yaa.