Neemiya 4 - Amazwi Yakwe Leza 2013

Neemiya walwisya yakavulunganya ya mulimo

¹ Walanga Sanibalati uvwa ukuti twatitukuululula ilinga, awe mukwai atandika ukuluula sile uku ukali. Aatumfya Ayuda.

² Avwanga na pa manso ya antu yano wali nayo, nga na pa manso ya vita vya ina Samaliya ati, “Icani cino Ayuda yakucita, antu yaa atakwata na maka? Uzye yalapeela impolelwa? Uzye cikulanga ukuti yamamalila uku kuululula ilinga lii mu wanda onga? Uzye yakupaalila ukuti yamatukulula amawe yano yatulumine umu mitumba kumwi ni njelwa izyoce, viye vino vyali?”

³ Nga alino Tobiya umwina Amoni, wino wali umupipi nawe, avwanga ati, “Lekini yakuule, tuyalozye! Pano kwene ndi cakuti nkusa wimilile api linga lino yakukuula, lingaongoloka sile!”

⁴ Alino ntandika ukupepa inti, “Owe mwe! Mwene Leza witu, sungala utuvwe! Uuvwe vino yatusuula. Sungala uyawezezye intusi zyao apa mitwe yao. Uleke tale nayo yasuulwe na vyonsi vino yakweti uyapokolole, yasendwe umu uzya ku mpanga ya inamasi.

⁵ Utezya uyelele uyi wao nanti utaleka amaifyo yao yafuutike pano yatiyatuka yakakuula yonsi.”

⁶ Lyene naswe ali vino twatwalilile ukukuula ilinga cipya cipya, nalyo lisuka lifika icimo ca muntu apakasi, apamulandu wakuti antu yalemine nu kwika umwenzo uku mulimo.

⁷ Lelo lino Sanibalati, Tobiya, Alungwana, aina Amoni na ina Asyidodi yuvwa ukuti umulimo wakukuula ilinga waya apankolelo, nu kuti imbali zyonsi zyaongolwilwe zyatizikuulululwa iyasoka wakwe cimwi.

⁸ Fwandi yonsi yumana kapi kuti yize yalwisye Yelusalemu nu kuleta icimvulunganya mwenemo.

⁹ Lelo swemo twapefile kuli Leza witu nu kwika yakalinda asopanga umusanya nu usiku.

¹⁰ Lelo Ayuda yakweti ulwimbo luno yimbanga ala yakuti, “Twatitucepelwa amaka muno tukusenda ivisendo. Umutumba wa viunguluwe nao watiukulisya. Ntanzi ndi cakuti tulamala ni kuule litu.”

¹¹ Anisi itu yelenganya ukuti tutalayalola nanti ukumanya cino cikucitika mpaka sile yakatwiukizye nu kutukomola pyu, apakuti umulimo witu utakatwalilile.

¹² Lelo kwaliko Ayuda yano yikalanga umupipi na anisi yayo. Ali yano yizile yatuceula amaila ikumi nga nu kutusopa apa mapange yao.

¹³ Fwandi nani ali vino nanenyile antu yane ukuti yaipangasya yaye yakimilile lwa kwisika yi linga apa ncende iifisame, umu ncende zyonsi izitatala zyakuulwa. Yimilila umu ndupwandupwa, ala yali ni vyanzo vyao, ivili wa mpanga, amasumo, inceto na malapwa.

¹⁴ Apacisila cakulola ukuti yacili yakuvwa intete, inkatuka nu kunena asambazi ni ntunguluzi zyao pamwi na antu yauze inti, “Mutoopa anisi yaa. Mwiusye ndi vino Yawe umukulu nupya uwa koopa. Acino lwisizini antu inu, ana inu, aci inu nga na mang'anda inu.”

¹⁵ Walanga anisi itu yuvwa ukuti swemo twatitumanya vino yakwelenganya, yiluka nu kumanya ukuti Leza uwatavulunganya amapange yao. Fwandi ali vino yawelulwike. Nga naswe kwene ali vino cila muntu aswilila uku mulimo wakwe, uwi kuule li linga.

¹⁶ Ukutandikila sile apa wanda kwene uo, citika wa antu yane yaombanga umulimo. Auze nayo ala yatiyaipangasya amasumo, visolelo na malapwa, nga ala yazwite ni vyakulwila ale yimilile uku matundu ya Ayuda yonsi. Lyene intunguluzi zya Ayuda zyakomelizye

¹⁷ yakakuula akuulanga ilinga lili. Yakasenda ya viya nayo yasendanga ivyanzo icakuti cila muntu ale akuomba umulimo ukwi kasa lyonga, ni lyuze ala lilemile icanzo.

¹⁸ Kakuula wensi nawe lino akuomba mbali ale apikilizye icanzo umu musana. Kalizya wa ntandala nawe ale aimilile umupipi nani.

¹⁹ Alino inena antu maka maka asambazi, intunguluzi na antu yauze asyala, inti, “Umulimo uu, watiukulisya nu kuvunguluka, nga naswe tutapalamine pipi apa kukuula ilinga.

²⁰ Ali cino fwandi konsi kuno mumauvwila ukulila kwa ntandala, akuno mulinzile mwasimwilila zuwa. Leza witu aliwe amatulwisizyanga.”

²¹ Awe mukwai cila wanda, ali vino twaombanga ukutandika sile pali mukolwe, mpaka kawa ni ntanda izitandika ukuloleka, citika wi umba lya antu yaya ala yakukuula ilinga, alino iumba lyuze nalyo ala likulinda, lyatiliipangasya na masumo.

²² Mu nsita kwene iya, nanenyile antu yane inti, “Cila muntu pamwi nu wakumwazwilizya kweneko ali ni nsambu yakusyala uwanda onga mu musumba wa Yelusalemu, apakuti twalinda nu kucingilila umusumba insita ya usiku, nga ituomba insita ya musanya.”

²³ Nalalanga ni vyakuzwala usiku onsi, na anji kwene pamwi na aomvi yane ululi longa, kumwi na yakalinda yane kwene. Cila muntu, lyonsi waipangasyanga icanzo, nanti lino akuya ku kusemba amanzi.