Neemiya 12 - Amazwi Yakwe Leza 2013

Utantiko wakwe yasimapepo na ina Levi

¹ Yakwene aali yasimapepo na ina Levi yano yawelulwike pamwi na Zelubabeli umwana umonsi wakwe Syeatieli, nga na Simapepo Mukulu Yesyua yali ndi vii: Selaya, Yelemiya, Ezila,

² Amaliya, Maluki, Hatusyi,

³ Syekaniya, Leumu, Melemoti,

⁴ Ido, Ginetoni, Abiya,

⁵ Miyamini, Moadiya, Biliga,

⁶ Syemaya, Yoyalibu, Yedaya,

⁷ Saluu, Amoki, Hilikiya na Yedaya. Yakwene yali intunguluzi zyakwe yasimapepo ali aomvi yauze mu manda yakwe Yesyua.

⁸ Aina Levi yali ndi vii: Yesyua, Binui, Kadimiyeli, Syelebiya, Yuda nga na Mataniya kwene, pamwi na aomvi yauze, wiyo uwangalilanga imimbile ya nyimbo zyakutaizya.

⁹ Aomvi yauze yali a Bakibukiya na Uni, ayatolelelanga umu kwimbila pamwi na alio.

Amu mupanda wakwe Simapepo Mukulu Yesyua

¹⁰ Yesyua wali a isi wakwe Yoiyakimu, Yoiyakimu wali a isi wakwe Elyasyibu, Elyasyibu wali a isi wakwe Yoiyada.

¹¹ Yoiyada wali a isi wakwe Yonatani, nga na Yonatani wali a isi wakwe Yadua.

Intunguluzi zya nko zyakwe yasimapepo

¹² Mu manda yakwe Yoyakimu Simapepo Mukulu, intunguluzi zya nko zyakwe yasimapepo zyali ndi vii: Uwatungululanga umutundu wakwe Selaya wali a Melaya. Uwatungululanga umutundu wakwe Yelemiya wali a Hananiya.

¹³ Uwatungululanga umutundu wakwe Ezila wali a Mesyulamu, uwatungululanga umutundu wakwe Amaliya wali a Yeoanani.

¹⁴ Uwatungululanga umutundu wakwe Maluki wali a Yonatani, uwatungululanga umutundu wakwe Syekaniya wali a Yosefu.

¹⁵ Uwatungululanga umutundu wakwe Halimu wali a Adina, uwatungululanga umutundu wakwe Melayoti wali a Helikai.

¹⁶ Uwatungululanga umutundu wakwe Ido wali a Zakaliya, uwatungululanga umutundu wakwe Ginetoni wali a Mesyulamu.

¹⁷ Uwatungululanga umutundu wakwe Abiya wali a Zikili, uwatungululanga umutundu wakwe Miniyamini wali a Pilitai.

¹⁸ Uwatungululanga umutundu wakwe Biliga wali a Syamua, uwatungululanga umutundu wakwe Syemaya wali a Yeonatani.

¹⁹ Uwatungululanga umutundu wakwe Yoyalibu wali a Matenai, uwatungululanga umutundu wakwe Yedaya wali a Uzi.

²⁰ Uwatungululanga umutundu wakwe Salu wali a Kalai, uwatungululanga umutundu wakwe Amoki wali a Ebeli.

²¹ Uwatungululanga umutundu wakwe Hilikiya wali a Hasyabiya nu watungululanga umutundu wakwe Yedaya wali a Netaneli.

Amazina ya nko zyakwe yasimapepo na ina Levi

²² Mu manda yakwe Elyasyibu, Yoiyada, Yoanani na Yadua, ali Yasimapepo Akulu, palemvilwe amazina ya ntunguluzi zya ng'anda zyakwe yasimapepo na ina Levi mpaka ukwizafika mu manda ya kuteeka kwakwe Dalyusi umwene waku Pesya.

²³ Amu mupanda wakwe Levi, makamaka intunguluzi zya ng'anda zyao, zyalemvilwe mu lupapulo lwa milandu mpaka ukwizafika mu manda ya kuteeka kwakwe Yoanani umwana umonsi wakwe Elyasyibu.

Ukwankanya imilimo yamu Ng'anda ikulu yakwe Leza

²⁴ Intunguluzi zya ina Levi zyali ndi vii: Hasyabiya, Syelebiya na Yesyua umwana umonsi wakwe Kadimiyeli, yazwananga na aomvi yauze umu kwimba inyimbo zya kulumbanya nu kucindika ndi muno Davidi kwene umuntu wakwe Leza wilya wapelile ilamulo lyakuti cila umba lilinzile lyakwata uluti lwa kwimba.

²⁵ Mataniya, Bakibukiya, Obadiya, Mesyulamu, Talimoni na Akubu, yali akangalila yapa mpongolo zya ng'anda ya kusungilamo icuma camu Ng'anda ikulu yakwe Leza.

²⁶ Yakwene atumikilanga mu manda ya kuteeka kwakwe Yoiyakimu umwana umonsi wakwe Yesyua, umwana umonsi wakwe Yozadaki, nga numu manda ya mulasi Neemiya na yakwe simapepo Ezila uwali a nyela wa Masunde.

Kupaatwila ilinga lya musumba kuli Yawe

²⁷ Lino antu yelenginye ukupaatwila Yawe ilinga lya musumba wa Yelusalemu, yaamile aina Levi ukufuma konsi kuno ikalanga, kuti yize ku Yelusalemu ku kuzevya nu kuzangila capamwi nu kutaizya umu nyimbo ni viwaya na yababatoni na yabanjo.

²⁸ Alino inko zya ina Levi aimbanga inyimbo yakongana pamwi ukufuma umu ncende zyonsi izyazingulwike Yelusalemu nu ku mizi ya ina Netofa.

²⁹ Kwizile nayauze afumile ku Beti Giligali, ku Geba nu ku Azimaveti, pasipano yakiimba ya nyimbo yali aingi cakuti yakuuzile imisakuta ukuzinguluka Yelusalemu.

³⁰ Lyene yasimapepo na ina Levi yacita ulutambi lwa kuiswefya, nu kuswefya antu alino nu kuswefya impongolo na malinga ya musumba.

³¹ Nene kwene nakonganike intunguluzi zya mpanga yaku Yuda apapela yi linga njapeela nu wangalizi pa maumba yaili kuti yapita mu milongo ala yakwimba inyimbo zya kutaizya Leza. Iumba lyakutandikilapo ilingilila ukwi kasa lilunji li linga, ulunga ni Mpongolo ya Citumba.

³² Hosyaya na citika wa ntunguluzi zya Ayuda nayo yalondela pacisila cao,

³³ pamwi na Azaliya, Ezila, Mesyulamu,

³⁴ Yuda, Benjamini, Syemaya na Yelemiya.

³⁵ Yamwi muli yasimapepo alizyanga intandala yali ndi vii: Zakaliya umwana umonsi wakwe Yonatani, umwana umonsi wakwe Syemaya, umwana umonsi wakwe Mataniya, umwana umonsi wakwe Mikaya, umwana umonsi wakwe Zakuli, umwana umonsi wakwe Asafu.

³⁶ Pali na aomvi yauze ndi vino yaa: Syemaya, Azaleli, Milalai, Gilalai, Maai, Netaneli, Yuda na Hanani. Yakwene yanyemulanga ivyakulizizya inyimbo, vyapanzilwe na Davidi umuntu wakwe Leza wilya. Kalemba Ezila uwatungululanga.

³⁷ Ukutandikila ku Mpongolo ya Kafukoka yatumbela pa masitepu akuya uku Musumba wakwe Davidi, yaya yapuzya pi sano lyakwe Davidi, nga yaswilila ukwi linga yafika pa Mpongolo ya Manzi, lwaku ufumondaka wa musumba wa Yelusalemu.

³⁸ Iumba lyuze lyakwe yao ataizyanga Leza lilungama kwimani apapela yi linga, nga nani pamwi na citika muze wa antu tulilondela pa cisila. Tupita kupuzya Lupungu lwa Vitofu mpaka kwi Linga Lisalale.

³⁹ Kufuma papa twiza tupuzya pa Mpongolo yakwe Efulemu, Mpongolo ya Yesyana, Mpongolo ya Nswi, pa Lupungu lwa Hananeli, pa Lupungu lwa Myanda, mpaka kufika nu ku Mpongolo ya Mfwele. Pakumalila itufika ku Mpongolo yakwe Yakalinda.

⁴⁰ Acino amaumba yoili yakwe yakiimba yao yataizyanga kuli Leza yafika apipi nu ku Ng'anda ikulu yakwe Leza. Ukulunda penepo apa ntunguluzi izyali pamwi nani,

⁴¹ pali na yasimapepo yaa alizyanga intandala zyao: Eliakimu, Maaseya, Miniyamini, Mikaya, Elioenai, Zakaliya na Hananiya.

⁴² Pali na yasimapepo yaa: Maaseya, Syemaya, Eleaza, Uzi, Yeoanani, Malikiya, Elamu na Ezeli. Yezelaya uwatungululanga yakiimba ya nyimbo.

⁴³ Pa wanda kwene ulya yapeela impolelwa izingi wakwe cimwi, nga yazanga pamulandu wakuti Leza aliwe wayalenga ukuzanga. Anaci pamwi na ana nayo kwene yazanga. Icongo cakuzanga cino yacisile cuvwikanga ukufuma ukutali.

Ukusakamala amapepo mu Ng'anda ikulu yakwe Leza

⁴⁴ Pa wanda kwene ulya antu yasonsilwe kuti yawaka amang'anda ya kusungilamo cuma muno yasungilangamo musangulo wa Ng'anda ikulu yakwe Leza, ukwikapo ni cikumi ni mbezu nga ni viseekwa vyankolelo ivyacanga cila mwaka. Antu yaa yapilwe umulimo wakukolonganika vyamusangulo ukufuma mu vyalo vyali mu pipi ni misumba ipusanepusane, vino yasangwilanga yasimapepo na ina Levi ndi vino calondekwa ukucita kulingana na Masunde yakwe Mose. Ayuda yonsi cayazanzizye apakulola uomvi wakwe yasimapepo na ina Levi kwene,

⁴⁵ pamulandu wakuti yacitanga ukulingana na vino Leza wayapile ilamulo, makamaka ulutambi lwa kuswefiwa. Yakiimba ya nyimbo pamwi na yakalinda ya Ng'anda ikulu yakwe Leza nayo kwene yaombanga imilimo yao ukulingana na masunde yano Davidi na Solomoni umwanakwe yayapile.

⁴⁶ Pasi pano uku mpiti, mu manda yakwe Davidi na Asafu, kwali na yakiimbisya ya nyimbo na anyimbo zyakulumbanya nu kutaizya Leza.

⁴⁷ Acino mu manda yakwe Zelubabeli, nga nu mu manda yakwe Neemiya, aina Izlaeli yonsi yapeelanga amawila cila wanda akwazwilizya yakiimba pamwi na yakalinda amu Ng'anda ikulu yakwe Leza. Nupya yapaatwilile aina Levi icipande cao, nga aina Levi nayo yapaatwilile amu mupanda wakwe Aaloni cipande cao.