Neemiya 1 - Amazwi Yakwe Leza 2013

Ipepo lyakwe Neemiya

¹ Ya ali mazwi yakwe Neemiya umwana umonsi wakwe Hakaliya: Umu mwezi wakwe Kisilevi, umwaka uwalenga makumi yaili akuteeka kwakwe Alitakisesi umwene waku Pesya, nene ne Neemiya nali umu Susa, umusumba ukalamba.

² Alino Hanani, wenga apa inane, afika pamwi na antu yano wafumile nayo uku mpanga yakwe Yuda. Alino nani injuzya apamulandu wa antu yaya yano yawelulwike umu uzya alino na pamulandu wa musumba wa Yelusalemu.

³ Nayo yangasuka iyati, “Antu yayo asile pasi pakucula alino ni nsonyi. Iciumba icazinguluka Yelusalemu cawa nu kononeka, alino ni mpongolo zyakweo nazyo zyapya zyonsi pyu!”

⁴ Nalanga nuvwa vivyo, inikala pansi indila, inkungumala. Apa manda yamwi intandika ukulosya ukwaula ukulya ala nkupepa kuli Yawe, Leza wa mwiyulu.

⁵ Inti, “Owe mwe! Leza mukulu uwa kwiyulu, we wakoopa! Awewe ukawaka upangano wako kuli yayo yano yakutemwa nu kuyela amasunde yako.

⁶ Fwandi we Yawe kutika, uteye amatwi yako kunotuli. Yula amanso utulolekesye. Uvwa ukupapata kwakwe nene ne muomvi wako lino inkupepela aomvi yako, aina Izlaeli, usiku nu musanya. Nkuilongwela na maifyo itu, swe ina Izlaeli. Nene ne mwisikulu pamwi ni ng'anda yonsi yakwe tata, ala twifya.

⁷ Swemo twakusangukila. Tutayela amalamulo yako, ni vipope pamwi na masunde yano wapile umuomvi wako Mose.

⁸ Nga lelo, ungala uwiusye amazwi yano wanenyile umuomvi wako Mose uti, ‘Ndi mwe ina Izlaeli mwaca mwamfutatila, ale lyene ndamusalanganyizizya umu antu ya mitundu yuze.

⁹ Lelo ndi cakuti mwaca mwawela kunondi mwalondela na masunde yane nu kuyasunga lyene antu inu, yayo aya umu uzya nanti yangikala uku mpela ya nsi, ndayakolonganika nu kuyawezezya apa ncende iyo ino nasonsile ukuti yampepelamo.’

¹⁰ “We Yawe, ala yaa aomvi yako nupya antu yako kololo, yano we mweneco wakulwile uku maka yako nu ku makasa yako.

¹¹ Lyene sungala uuvwikisye ipepo lya muomvi wako namapepo ya aomvi yako yonsi yano yatemwa ukucindika izina lyako. Napapata, ungaleka lyene umuomvi wako aye nu longo. Leka nu kuti umuntu wii, umwene Alitakisesi, aye nu luse kuno ndi.” Umu manda yalya ampiti anene kwene nalemelanga umwene ulwako lwakwe waini.