Mpendwa 4 - Amazwi Yakwe Leza 2013

Milimo ino yapilwe ku ina Levi amu luko lwakwe Koati

¹ Alino Yawe anena Mose na Aloni

² ukupenda aina Levi, yao amu luko lwakwe Koati, ukupitila mu nko zyao nu mu ng'anda zyao.

³ Nu kupenda aonsi yonsi ali ni myaka amakumi yatatu ukufika pa myaka amakumi yasano. Ayanena kuti yalole angalinga kutumikila mwi Taalu lya Ukongano.

⁴ Fwandi incito ya ina Koati ukuwaka vintu vyamuzilo cuze.

⁵ Lino insita ya kusamya insakwe yafika, Aaloni na ana yakwe yalinzile kwingila mukasi ki Taalu lya Ukongano nu kusamula insalu ya kucinga Mbokosi ya Upangano nga yavimbe mbokosi kwene iyo.

⁶ Alino lyene yangavimbapo impapa inyuke ningo nu kuvimba papela insalu ya cifungo. Alino nu kwika mipingilo ningo iyakusendela mbokosi.

⁷ Api tebulo lya mukate uwapeelwa kuli Yawe yalinzile kwanzikapo insalu ya cifungo nga nu kutendekelapo imbale, imbakuli ni ngeso, nga ni misazi ya mawila ya vyakumwa. Api tebulo lyonsi palinzile paya imikate yakwimula kuli Yawe.

⁸ Pali vyonsi vii yalinzile kuvimbilikizyapo insalu iyenzu, ino nupya yalinzile yafupa mu mpapa zinyukwe ningo nu kusomekamo mipingilo.

⁹ Yalinzile yatoola insalu ya cifungo nu kufupilizya icakuteekapo ilampi, pali pamwi ni vyakulukusizyako itwi, utambi, musazi wa mafuta kumwi ni viombelo vyonsi vikumile ku ncito yamusango ndi uwo.

¹⁰ Lyene yalinzile kuvifupilizya ningo nu kuvingizya mu mpapa zinyukwe ningo, nga yavike pa cintamba.

¹¹ Pa kavuwa kakwe Zaabu, napo yali nu kuvimbapo insalu ya cifungo, ino nupya yalinzile yafupa mu mpapa zinyukwe ningo nu kusomekamo mipingilo.

¹² Yalinzile kutoola iviya vyonsi vyakuomvya mu Ncende Yamuzilo nu kuvifupilizya ningo mu nsalu ya cifungo, ino nupya yalinzile yafupa mu mpapa zinyukwe ningo, nga yavike pa cintamba.

¹³ Yalinzile kuzyola nu kusisya itwi pa kavuwa ka mukuwa, alino yanzepo insalu yi langi liyenzulukile.

¹⁴ Lyene yalinzile kwikapo viombelo vyonsi ivyakuomvya pa kavuwa, vili wa malwangayo, yafoloko, yafosyolo ni ngeso zya kukanyizizya. Alino lyene yavimbilikizyepo impapa inyuke ningo nu kusomekamo mipingilo.

¹⁵ Lino Aaloni na ana yakwe yalamala kuvimbilikizya vintu vyamuzilo pamwi ni viombelo vyonsi, lyene ali lino ana yakwe Koati yali nu kwiza vikusya. Lelo yatalinzile kukumya ku vyamuzilo, pano ndi yacita vivyo yalafwa. Fwandi aluko lwakwe Koati yalinzile kusenda viya vya mwi Taalu lya Ukongano lyonsi lino yakulisezya.

¹⁶ Eleaza umwana wakwe Aaloni simapepo alinzile kuwaka musazi wa mafuta ya kwika mu nyali, nu ubani wa cinunkilo cisuma, na mawila ya cakulya, na mafuta akusolwela, nga ni vintu vyonsi ivya mwi Taalu vino vyapaatwilwa Yawe.

¹⁷ Alino Yawe anena Mose na Aaloni ati,

¹⁸ “Mutakaleke uluko lwakwe Koati lukapaatuluke ku ina Levi.

¹⁹ Acino fwandi na pakuti yapita ulumi nu kukana fwa pamulandu nu kupalama ku vintu vyamuzilo cuze, mulinzile kuyacitila vii: Aaloni na ana yakwe yalinzile kwingila mu ncende yamuzilo nu kulangilila cila muntu umulimo wakwe alino ni viya vino alinzile kusenda.

²⁰ Lelo aluko lwakwe Koati yatakezye ukwingila mwenemo kuti yalolekesye pa vintu vyamuzilo nanti panono. Ndi yacita vivyo yalailetelela yafwe.”

Milimo ya ina Levi aluko lwakwe Gelisyoni

²¹ Yawe anena Mose ati,

²² “Penda ana yakwe Gelisyoni mu nko zyao nu mu ng'anda zyao.

²³ Upende na onsi yonsi ali ni myaka amakumi yatatu ukufika pa makumi yasano, yao angalinga kutumikila mwi Taalu lya Ukongano.

²⁴ Uu, uli mulimo uno aina Gelisyoni yali nu kuomba mu kusenda katundu wao.

²⁵ Yalasenda insalu yakucingilikizya Itaalu, Itaalu lya Ukongano ni nsalu yakucingilikizya iya mukasi kaliko, kumwi ni yakunzi, ni mpapa inyuke ningo yakucingilikizya apapela yaliko, pamwi ni nsalu yakucingilikizya pa mulyango wa kwingilila mwi Taalu lya Ukongano.

²⁶ Alino nupya insalu zyakucingilikizya musolo ni zyakucingilikizya pa wingililo wa musolo uwazinguluka Itaalu pamwi na kavuwa. Alino nu mwando ni viombelo vyonsi vino yakaomvya kweneko. Iyo, ali ncito ino amu nko zyakwe Gelisyoni yali nu kuwaka.

²⁷ Mose na Aaloni yalinzile kusininkizya ukuti aluko lwakwe Gelisyomu yaomba imilimo yonsi nu kusenda vyonsi vino Aaloni na ana yakwe yayanena.

²⁸ Fwandi iyo ili milimo ya nko zyakwe Gelisyoni ino yalinzile ukuomba mwi Taalu lya Ukongano. Itamali umwana wakwe Aaloni simapepo alinzile kwangalila imilimo yao.

Milimo ya ina Levi aluko lwakwe Melali

²⁹ “Yawe anena Mose kuti apende aina Levi aluko lwakwe Melali,

³⁰ nu kupenda aonsi yonsi ali ni myaka amakumi yatatu nu kufika amakumi yasano. Amunena kutoola yao angalinga ukuomba umulimo wa mwi Taalu lya Ukongano.

³¹ Milimo yao ukuwaka misendele ya vimiti vya kupangila Itaalu lya Ukongano, amasalala, incesi impopo pamwi ni nkangalo.

³² Alino ni mpanda pamwi ni mpopo zyakusimpa ukuzingulusya musolo. Nu tupopo twa ku myando pamwi nu tunkolonkolo tonsi utungalondekwa. Muli nu kuyasontelela vino yali nu kusenda nu kuvilumbula mazina.

³³ Fwandi iyo ili milimo ya aluko lwakwe Melali mu kuomba kwao kwa mwi Taalu lya Ukongano. Ni ntunguluzi yao a Itamali umwana wakwe Aaloni simapepo.”

Kupendwa kwa ana yakwe Levi

³⁴ Awe mukwai Mose na Aaloni pamwi ni ntunguluzi zya maumba, iyapenda ana yakwe Koati kupitila mu nko zyao nu mu ng'anda zyao.

³⁵ Aonsi yonsi ali ni myaka kutandikila pa makumi yatatu kufika pa makumi yasano yano iizile ku kuomba imilimo ya mwi Taalu lya Ukongano,

³⁶ impendwa yao yonsi kulingana ni nko zyaliko, yali 2,750.

³⁷ Ikwene, ili mpendwa iyapenzilwe ukufuma mu nko zyakwe Koati, alingine ukuomba mwi Taalu lya Ukongano. Apenzilwe kuli Mose na Aaloni ndi muno Yawe wapeezile Mose ilamulo.

³⁸ Aina Gelisyoni nayo yapenzilwe kulingana ni nko zyao na ang'anda zyao.

³⁹ Aonsi yonsi pyu ali ni myaka kutandikila pa makumi yatatu kufika pa makumi yasano, angalinga ukuomba mwi Taalu lya Ukongano,

⁴⁰ yano yapenzilwe kulingana ni nko zyao na ang'anda zyao, impendwa yali 2,630.

⁴¹ Ikwene ili mpendwa yonsi pyu ya aluko lwakwe Gelisyoni alinzile ukuomba mwi Taalu lya Ukongano.

⁴² Aina Melali yapenzilwe kulingana ni nko zyao na ang'anda zyao.

⁴³ Aonsi yonsi ali ni myaka kutandikila pa makumi yatatu kufika pa makumi yasano, alinzile ukuomba mwi Taalu lya Ukongano,

⁴⁴ yano yapenzilwe kulingana ni nko zyao, impendwa yali 3,200.

⁴⁵ Ikwene ili mpendwa yonsi pyu ya aluko lwakwe Melali. Mose na Aaloni yayapenzile kulingana ni lamulo lino Yawe wapeezile Mose.

⁴⁶ Acino Mose, na Aaloni ni ntunguluzi zya ina Izlaeli aina Levi yonsi kulingana ni nko zyao nga nu mu ng'anda zyao.

⁴⁷ Aonsi yonsi ali ni myaka kutandikila pa myaka makumi yatatu kufika pa myaka amakumi yasano, alinzile ukuomba mwi Taalu lya Ukongano nanti ukulisenda,

⁴⁸ impendwa yao yali 8,580.

⁴⁹ Api lamulo lya mwene kupitila muli Mose, cila muntu wapilwe umulimo uwakuomba nu kunenwa civiya cino angasenda. Avino yapenzilwe, wakwe vino Mose wapezilwe ilamulo kuli Yawe.