Mpendwa 34 - Amazwi Yakwe Leza 2013

Imipaka yaku Kenani

¹ Yawe anena Mose ati,

² “Peela aina Izlaeli amalamulo yaa. Lino mulingila mu Kenani, impanga ino nkumupeela, imipaka ya ncende inu ilaya ndi vii.

³ Umupaka uwaya lwaku kaeya ulatandikila ukufuma mu Lwanga lwa Zini ukwemanya nu mupaka waku Edomu. Alino nu mupaka winu uwa kwi kasa lyakwe ndilo, ulatandikila ku ufumondaka, lwa ku mpela ku kaeya kakwe Yemba wa Musilya.

⁴ Alino ukize ukasenukile lwaku kaeya, ulunga nu mulundu wa Akilabimu, nu kupitila ku Zini, ukwiza tunkila ku Kadesyi Banea. Alino wize ulungame ku Hazali Adali nu kupita ku Azimoni.

⁵ Ukufuma ku Azimoni, umupaka ulafutukila ku cifoloma ca kaluzi akalungama ku Eguputo nu kwizafika kuli Yemba wa Adiliya.

⁶ “Umupaka waku uwondaka wene ulaya a Yemba kwene wa Adiliya.

⁷ “Umupaka waku katutu nao ulaya vii. Ulatandikila kuli Yemba wa Adiliya ukufika ku Mwamba wa Holi.

⁸ Alino ukutandikila ku Mwamba wa Holi mpaka ku Lebo Hamati. Lyene umupaka uwo ukalungame uwingililo waku Hamati nu kwiza ku Zedadi,

⁹ nu kupuzinkanya ku Zifuloni, alino ulapelela ku Hazali Enani.

¹⁰ “Umupaka waku ufumondaka nao ulaya ndi vii. Ulatandikila ku Hazali Enani ukufika ku Syefamu.

¹¹ Umupaka uwo ukafumilile ku Syefamu ukutentemukila ku Libula, lwaku ufumondaka wa Aini, utentemukile nupya ukupambata Yemba wa Galile,

¹² alino alondela Luzi lwa Yodani nu kufika kuli Yemba wa Musilya. “Iyo ilaya ili mpanga inu ni mipaka yakweyo ukuzinguluka.”

¹³ Acino Mose apeela ilamulo ku ina Izlaeli ati, “Ikwene ili mpanga ino mulankana ukuomvya inzila ya kupendola. Ili mpanga ino Yawe wanenyile ukupeela imitundu fundimbali na onga pakasi.

¹⁴ Imitundu iili, wakwe Gadi na wakwe Lubeni alino na wakwe Manase pakasi, yene yatoola mpiti impanga yao.

¹⁵ Imitundu iyo yankanyiziwa mpiti impanga iyaya ku ufumondaka wa Luzi lwa Yodani, ulunga na Yeliko.”

Yano yali nu kwangalila umulimo wa kwankanya impanga

¹⁶ Yawe anena Mose ati,

¹⁷ “Eleaza simapepo na Yoswa umwana umonsi wakwe Nuni yali nu kwankanya antu impanga.”

¹⁸ Alino mukatole ni ntunguluzi yonga muli cila mutundu, iyakulola vino yakwankanya impanga.

¹⁹ Na mazina ya antu yao aeya: Kalebu umwana wakwe Yefune, intunguluzi ukufuma mu mutundu wakwe Yuda.

²⁰ Syemueli umwana wakwe Amiudi, intunguluzi ukufuma mu mutundu wakwe Simeoni.

²¹ Elidadi umwana wakwe Kisiloni, intunguluzi ukufuma mu mutundu wakwe Benjamini.

²² Buki umwana wakwe Yogili, intunguluzi ukufuma mu mutundu wakwe Dani.

²³ Hanieli umwana wakwe Efodi, intunguluzi ukufuma mu mutundu wakwe Manase umwana wakwe Yosefu.

²⁴ Kemueli umwana wakwe Syifutani, intunguluzi ukufuma mu mutundu wakwe Efulemu umwana wakwe Yosefu.

²⁵ Elizafani umwana wakwe Palinaki, intunguluzi ukufuma mu mutundu wakwe Zebuluni.

²⁶ Palitieli umwana wakwe Azani, intunguluzi ukufuma mu mutundu wakwe Isakali.

²⁷ Aiudi umwana wakwe Syelomi, intunguluzi ukufuma mu mutundu wakwe Asyeli.

²⁸ Pedaeli umwana wakwe Amiudi, intunguluzi ukufuma mu mutundu wakwe Nafutali.

²⁹ Yakwene ali antu yano Yawe wapeezile umulimo wa kwangalila ukwankanyiziwa kwa mpanga mu Kenani, ku ina Izlaeli.