Mpendwa 25 - Amazwi Yakwe Leza 2013

Aina Izlaeli yaluvyanya ku Peoli

¹ Pa nsita ilya aina Izlaeli yali ku Syitimu. Ali lino antu iyatandika ukucita uzelele na anaci aina Moabu.

² Fwandi ale aina Moabu nayo yakwama antu ku kupeela impolelwa zyao kuli tuleza twao.

³ Acino lyene aina Izlaeli iyatandika nu kufukamila Baali uwaku Peoli. Yawe nawe ali pa kusokela aina Izlaeli.

⁴ Alino Yawe anena Mose ati, “Tola intunguluzi zyonsi izya ina Izlaeli uzikome pa lwalala pa manso yane pakuti intakatale insokele aina Izlaeli nupya.”

⁵ Mose nawe fwandi ali pa kunena yakapingula amu Izlaeli ati, “Cila wenga munomuli ali nu kukoma umuntu wensi wino wazana ukuti waile ku kupepa Baali Peoli.”

⁶ Alino ikwiza umuntu umwi uwamu ina Izlaeli. Aleta umwanaci umwi umwina Midyani. Amuleta pa manso kwene yakwe Mose ni uvi lyonsi lya ina Izlaeli, lilyo ilyalilanga ulanda ulanda pa mulyango wi Taalu lya Ukongano.

⁷ Lino Pineasi simapepo umwana wakwe Eleaza, umwana wakwe Aaloni simapepo, walola sile vivyo atoola isumo,

⁸ nga alondelela umwina Izlaeli wiya mu nsakwe. Ayatota yoili kwene ukupuzinkanya isumo mu muze, umwina Izlaeli nu mwanaci wiya. Alino lyene ni mpungo ino walanga yapona pa ina Izlaeli isila nu kusila.

⁹ Antu yano yafwile pa nsita ya mpungo iyo yali amazimbi amakumi yaili na yani (24,000).

¹⁰ Lyene Yawe anena Mose ati,

¹¹ Pineasi umwana wakwe Elieza, umwana wakwe Aloni, simapepo, uwatazusya icipyu cane pa ina Izlaeli. Awenga sile muli yonsi uwasakamala ukucita icilungame wakwe vino nkalonda. Ali cino nakana ukulovya aina Izlaeli ku cipyu cane.

¹² Caleka fwandi munene ukuti namacita upangano na aliwe.

¹³ Fwandi aliwe wenga sile pamwi na ana yakwe alamukonka pacisila, alasyukila ulayo uu uwa kuya yasimapepo, pamulandu wakuti wene wali nu muzonda wakucindika Leza wakwe nu kucitila aina Izlaeli ulutambi lwa kufuta amaifyo.

¹⁴ Izina lya mwina Izlaeli wiya wino yakomile pamwi nu mwanaci umwina Midyani, a Zimuli umwana wakwe Salu, uwali intunguluzi ya vikolwe vyamu ng'anda yakwe Simeoni.

¹⁵ Izina lya mwanaci umwina Midyani wino yakomile a Kozibi umwana wakwe Zuli, intunguluzi ya luko lwa ina Midyani.

¹⁶ Alino nupya Yawe anena Mose ati,

¹⁷ “Kalwisini aina Midyani, muyakome,

¹⁸ pamulandu wakuti yene aatandike ku mulwisya mu ucenjezi wao uno yamucitile ku mulandu wakwe Peoli, alino nu ku mulandu wakwe Kozibi, umwana umwanaci wa ntunguluzi imwi yaku Midyani, umwanaci wino yakomile pa nsita ya mpungo iyaponyile ku mulandu wakwe Peoli.”