Mpendwa 18 - Amazwi Yakwe Leza 2013

Imilimo iyapilwe kuli yasimapepo na ina Levi

¹ Yawe anena Aaloni ati, “Ukutandikila sile pali wewe ukuya pa ana yako aonsi, alino ukwikapo ulupwa lwaku mutwe lonsi, mulapelwa mulandu ukome cuze ndi cakuti umwi panomuli waca waluvyanya cimwi mwi Taalu lya Ukongano. Mulapelwa mulandu ndi mwaca mwaluvyanya mu mulimo winu wa usimapepo.

² Lekini anyonko amu mutundu wakwe Levi, umutundu wakwe so, yapalamile kunomuli. Yalinzile yamwazwilizya mu kuomba pa nkolelo yi Taalu lya Ukongano.

³ Fwandi yali nu kukwazwilizya apali pamwi nu kuomba mwi Taalu lyonsi lya Ukongano, cikulu sile yataezya ukulema ku viya vyamuzilo ivya mu Ncende Yamuzilo nanti sile ku kavuwa. Ndi yacita cico, ale lyene yene nga namwe kwene mulafwa.

⁴ Yali nu kuya pamwi nawe mu kusunga Itaalu lya Ukongano nu mulimo uli onsi uwa mwi Taalu. Umuntu wasilesile atange apalame aombe pamwi namwe.

⁵ Wewe pamwi na ana yako muli nu kuwaka Ncende Yamuzilo pamwi na kavuwa. Lyene ukali wakwe Yawe utalatala upone pa ina Izlaeli.

⁶ Anene kwene ne mwisikulu naisolwela anyonko aina Levi mu ina Izlaeli nu kuyapeela kunomuli. Yene yapatulwa pakuti yangaya icuma cakwe Yawe nupya akuombela mwi Taalu lya Ukongano.

⁷ Fwandi wewe sile pamwi na ana yako aonsi muce mwaomba umulimo wakwe usimapepo. Mwasakamala kavuwa na vyonsi ivyaya mu Ncende Yamuzilo. Muce mwaomba umulimo uli onsi wakwe usimapepo. Lelo umuntu wasilesile ndi wapalamila kweneko, alafwa.”

Uwila uwa kupeela yasimapepo na ina Levi

⁸ Alino Yawe anena Aaloni ati, “Nakupeela incito ya kwangalila vyonsi vino antu yapeela. Vyonsi vino aina Izlaeli yapeela kunondi navipeela kunuli nu ku ana yako kuti vingaya malipilo inu amanda pe.

⁹ Watukwata insambu pa vintu vivi kwene ivyamuzilo cuze vino yakampela. Napa vilyo vino yakampela vino ungalyako aevi: uwila onsi uno aina Izlaeli yakampela uwa cakulya nanti uwa kwelela amaifyo yao nanti uwa cizumila mulandu.

¹⁰ Mungalya vivyo vyonsi mu Ncende Yamuzilo. Umonsi wensi fwandi alye kweneko. Nupya mulinzile ukuvicindika pano vyene ivyamuzilo.”

¹¹ “Navyuze ivyakucindika wa vintu vyamuzilo, ivingaya ivyako aevi. Cico consi cino aina Izlaeli yapaatula ku mawila yao akuswelula, napeela kunuli wewe wenga sile pamwi na ana yako aonsi na anaci ukulingana ni sunde ilya pelwa. Ali wensi uwamu ng'anda yako, umusangululwe angalyako ivintu vivyo.

¹² “Anene ne Yawe nakupeela uzombozi usuma cuze uwa vyakulya vyankolelo ivili wa mafuta ya miolivi, waini, pamwi ni ngano.

¹³ Vyonsi sile awewe Aaloni nakupeela. Nu muntu wensi uwamu ng'anda yako ndi cakuti musanguluke angalya kweneko.

¹⁴ “Ivintu vyonsi ivyaya mu mpanga ya ina Izlaeli, vino yala yampeelelela, vilaya ivyakwako.

¹⁵ “Mwana wensi iyeli, wino yalayampela, aye umuntu nanti iciteekwa, alaya uwakwinu. Lelo iyeli lya nyama ni lya muntu mukowele uce ulikulule.

¹⁶ Uce ulikulule ndi lyakwanya umwezi onga. Uike umutengo waliko ukulingana ni cipimilo caku Ng'anda ikulu yakwe Leza.

¹⁷ Lelo utalinzile kukulula amayeli ya ng'ombe, ni mbuzi, ni mfwele. Vivyo ivyamuzilo, nupya ivyakungocela impolelwa. Uce uwakanyila uwazi ku kavuwa, alino nu kwengulula amafuta yaye uwila wa usu, mununko usuma uno ukanzanzya.

¹⁸ Iminyefu ya nyama zizyo yene iyakwako, wakwe vino inganga yapa wila wakuswelula alino nu mwendo wa kwilunji ivyakwako.

¹⁹ “Fwandi vyonsi vino aina Izlaeli yamapeela wa wila ucindamisye, amanda yonsi ankolelo, napeela kunuli nu ku ana yako aonsi na anaci kwene. Uu, uli upangano wa pee uno ne Yawe napangana nawe pamwi na ana yako.”

²⁰ Alino Yawe anena Aaloni ati, “Utalakwata icaupyanyi mu mpanga yao. Nupya utalakwata isala mu mpanga yao. Nene ne Yawe indaya isala alino ni caupyanyi cako pakasi ka ina Izlaeli.”

Icipande ca ina Levi

²¹ Yawe avwanga ati, “Ku ina Levi, pa kuyalambula pa milimo yao ino yakaomba mwi Taalu lya Ukongano, nayapeela upyanyi wa kutoola pa cikumi consi cino aina Izlaeli yakampela. Ali malipilo ya kuomba kwao ukwa kuwaka Itaalu lya Ukongano.

²² Aina Izlaeli yatalatala yapalamile kwi Taalu lya Ukongano. Ndi cayakumba yacita vivyo, ale yaisumba mwi ifyo nu kufwa yalinzile ukufwa.

²³ Ali cino fwandi aina Levi yatupu aliyo yalaomba umulimo wa mwi Taalu lya Ukongano na vyonsi ivilaluwana mwenemo ali yano yalapeelwa mulandu. Ni sunde lilyo lilaya ilya manda yonsi ku ana yako alakulondela pa nsizi.

²⁴ Aina Levi yatange yakwate icaupyanyi mu ina Izlaeli. Icaupyanyi cao, uwila wa cikumi uno aina Izlaeli yakapeela kuli Yawe. Ali vyaupyanyi vino napeela ku ina Levi. Nu kulanda ali cino nayanenyile inti yatalakwata icaupyanyi mu ina Izlaeli.”

Mose wakonkomezya aina Levi ivyakucita pa mawila

²⁵ Lyene Yawe apeela ilamulo kuli Mose

²⁶ kuti anene aina Izlaeli ati, “Lino mwapokelela uwila wa cikumi ukufuma ku ina Izlaeli, uno namupeela ukuya wa cuma cinu, mulinzile mwafumya penepo icipande icalenga ikumi ciye uwila ucindamisye wakwe Yawe.

²⁷ Uwila uu, ucindamisye ulinzile wapendelwa wa cipande icikoline nu wila uno mulimi akapeela uwa mbezu pa kupuula nanti wakwe waini mupya.

²⁸ Mu musango kwene uu, namwe kwene muli nu kupeela uwila ucindamisye wakwe Yawe, ukufuma pa mawila ya cikumi consi cino mukapokelela ukufuma ku ina Izlaeli. Mulinzile mwapeela uwila uu, ucindamisye kuli Aaloni simapepo.

²⁹ Kuli vyonsi ivya mawila yano mwapokelela, mulinzile mwafumya penepo icipande cakwe Yawe. Nupya pali vivyo kwene mwatola ivizipisye ali vino namwe imupela.

³⁰ Lino mwapeela icipande ca vya mawila ivizipisye, lyene mungasunga ivyasyala, mu musango uli umwi kwene ndi uno mulimi akasunga ivikasyala lino wapeela ivilimwa vyakwe ukufuma pa cipuulilo nanti waini.

³¹ Ali cino mwemo pamwi na amu ng'anda zinu mungalya ivyasyala apali ponsi, pamulandu wakuti ali malipilo inu pa milimo ino mukaomba mwi Taalu lya Ukongano.

³² Mutange mupelwe mulandu ndi mwalya, cikulu mutale mupeele icipande cizipisye kuli Yawe. Lelo cisi cakwezya ukukowezya amawila ya ina Izlaeli, mu kutala imulya penepo uwila umwi lino mutacili mupeele icipande cizipisye kuli Yawe. Ndi mwaca mumacita vivyo mulafwa.”