Mpendwa 17 - Amazwi Yakwe Leza 2013

Intuwa yakwe Aaloni yalemuka

¹ Yawe anena Aaloni na Mose ati,

² “Nena aina Izlaeli yakuletele intuwa ikumi na ziili. Cila ntuwa ifume ku ntunguluzi yonga iya muli cila mutundu wa vikolwe vyao. Alino nawe ulembe pali cila ntuwa izina lya ntunguluzi.

³ Apa ntuwa ya mutundu wa ina Levi, ulembe penepo izina lyakwe Aloni. Fwandi cila ntunguluzi imakwata intuwa.

⁴ Intuwa zizyo uziike mwi Taalu lya Ukongano, pa nkolelo ya Mbokosi ya Upangano, pano tukakomenkanila nawe.

⁵ Alino lyene intuwa ino imalemba, ale izina ililemvilwe penepo ali muntu wino nene nasolola. Vii ali vino nene ne Leza winu namaputula ivikanza ivya kuilizyanya ivili pali mwemwe.”

⁶ Awe na cendi ali vino Mose nawe wanenyile intunguluzi ikumi na ziili zya ina Izlaeli ukumuletela intuwa. Ni ntuwa yakwe Aaloni nayo kwene apano yali.

⁷ Mose nawe aika intuwa zizyo zyonsi mwi Taalu lya Ukongano, pa nkolelo ya Mbokosi ya Upangano yakwe Yawe.

⁸ Pa wanda uwalondelela penepo, lino Mose akwingila mwenemo, alola ndi vino intuwa apalemvilwe izina lyakwe Aloni, uwamu mutundu wakwe Levi, yatilemba amafwa nupya yatitumba intombo nu kuwalula iluwa kulundapo nu kuseeka iviseekwa ivyakolana na makole, nu kuca vyativica.

⁹ Alino afumya intuwa zyonsi apanzi, alangizya aina Izlaeli. Lyene antu yonsi iyailolela icacitike, nga cila ntunguluzi aitolela intuwa yakwe.

¹⁰ Yawe anena Mose ati, “Swilizya intuwa yakwe Aaloni uyike pa nkolelo ya Mbokosi ya Upangano. Ali pano iyasungilwa pakuti aina Izlaeli yace yaiusya lyonsi ukuti ndi yantalamila, yacita impanzela, yalafwa.”

¹¹ Mose acita vyonsi wakwe vino Yawe wamupeezile ilamulo.

¹² Aina Izlaeli nayo ali pakunena Mose yati, “Kalanda kasi kolo, lyene twafwa twasila!

¹³ Fwandi lyene umuntu ali wensi ndi wala wapalama pipi pipi ni Taalu, nu kwemya sile kweneko, ale swensi nu kufwa twafwa!”