Milimo 8 - Amazwi Yakwe Leza 2013

¹ Na Saulo wazumilizye ukukomwa kwakwe Sitivini. Pa wanda kwene ulya iuvi mu Yelusalemu litandika kuzunyiwa cuze. Onsi ataila, yasalangana mu miputule yonsi yamu Yudeya nu mu Samaliya. Suka sile atumwa.

² Antu yamwi aoopanga Leza yazika Sitivini, yamulosya cuze.

³ Lelo Saulo aezya ukonona iuvi. Wayanga ing'anda ni ng'anda, ala akulema yano ataila, aonsi na anaci, akuyaleta kuti yayayalile mu ng'anda yaminyololo.

Filipo wakosola Ilandwe mu Samaliya

⁴ Alondezi asalangine yaile konsi ala yakukosola Ilandwe Lisuma.

⁵ Filipo waile ku musumba uwamu Samaliya akukosola ilandwe lya pali Klistu ku antu ya kuku.

⁶ Maumba yasumvile amano kuli vino Filipo walandanga. Onsi auvwanga kunoli, yalola ni vinjelengwe vino wacitanga.

⁷ Mipasi yankota ifuma mu antu aingi ala ikupunda. Antu aingi ali vite nga ni vilema yapola.

⁸ Caleka mwali luzango lukulu cuze mu Samaliya.

Simoni uwamalele

⁹ Mu musumba ulya mwikalanga umuntu izina lyakwe a Simoni, wino pa nsita imwi wazungulanga aina Samaliya ku malele yakwe. Wene waitakanga kuya mukulu cuze.

¹⁰ Na antu yonsi amu musumba, kufuma pa akulu na anono kwene, yasumba mano panoli yavwanga yati, “Ali na maka yakwe Leza yano antu yakati, ‘Amaka yakulu.’”

¹¹ Yasumvile amano pali aliwe pano pa nsita ntali wayazungulanga ku malele yakwe.

¹² Lelo lino yataila kukosola kwakwe Filipo pi Landwe Lisuma lya Wene wakwe Leza nga na pi zina lyakwe Yesu Klistu, yawatiziwa onsi, aonsi na anaci.

¹³ Simoni umwisikulu nawe kwene wataile na pacisila ca kuwatiziwa, watenzi pamwi na Filipo nga cimuzungula lino walola vizungusyo vikulu nga ni vinjelengwe ivyacitwanga.

¹⁴ Atumwa amu Yelusalemu yuvwa ukuti antu amu Samaliya yapokelela izwi lyakwe Leza. Caleka yatuma Petulo na Yoane kunoyali.

¹⁵ Lino Petulo na Yoane yafisile, yapepela yano ataile pakuti yangapokelela Mupasi Wamuzilo.

¹⁶ Pano Mupasi Wamuzilo walanga atali aikile pa muntu nanti wenga. Yawatiziwe sile mwi zina lya Mwene Yesu.

¹⁷ Lyene Petulo na Yoane iika makasa yao panoyali, nga nao yapokelela Mupasi Wamuzilo.

¹⁸ Simoni alola vino Mupasi wapelwa kuli yano ataile lino alondezi iika makasa yao panoyali. Caleka apeela ulupiya kuli Petulo na Yoane avwanga ati,

¹⁹ “Nani kwene mpelini maka yaa, pakuti wensi wino nikapo makasa yane nawe akapokelele Mupasi Wamuzilo.”

²⁰ Lelo Petulo amwaasuka ati, “Silowa pamwi nu lupiya lwako, pano ukwelenganya vino ungakala uwila wakwe Leza nu lupiya!

²¹ Utakweti imbali nanti wankanyo mu mulimo witu, pano mwenzo wako usi wololoke pa manso yakwe Leza.

²² Lyene zenzuka ku kwelenganya kwako kwipe, nu kupepa ku Mwene pakuti akwelele pa kwelenganya icintu wakwe cii.

²³ Pano nalola vino uli nu uzuwa uwipe, nupya wewe muzya wa maifyo.”

²⁴ Simoni anena Petulo na Yoane ati, “Napapata mumpepele ku Mwene, pakuti cimwi ica mu vintu vino mwavwanga citancitikila.”

²⁵ Pacisila cakupeela umboni wao, nga nu kukosola Ilandwe lya Mwene, Petulo na Yoane yaswilila ku Yelusalemu. Mu nzila yakosola Ilandwe Lisuma mu mizi iingi iya mu Samaliya.

Filipo na kangalila wa mpiya mwina Etiopia

²⁶ Mungeli wa Mwene anena Filipo, ati, “Katuka uye ku kaeya, ku museo uwafuma ku Yelusalemu, uwaya ku Gaza.” (Museo uu utaciomviwa.)

²⁷ Caleka Filipo akatuka apita. Lyene mutungwi mwina Etiopia, uwali mucindame kangalila wa cipao cakwe Kandake namwene uwaku Etiopia, wali umu nzila ala akuswilila kumwao.

²⁸ Wafumanga ku Yelusalemu kuno waile ku kupepa Leza, ala ali umwi celeta lyakwe. Lino ali mu nzila, wawelenganga mu lupapulo lwakwe kasema Ezaya.

²⁹ Mupasi Wamuzilo anena Filipo ati, “Yanga kapalamile pipi ni celeta.”

³⁰ Filipo asimwililako, amuvwa akuwelenga mu lupapulo lwakwe kasema Ezaya. Alino amuuzya ati, “Uzye ukuvwa vino ukuwelenga?”

³¹ Mutungwi nawe ati, “Uzye ningamanya uli, suka umwi wandondolwela?” Alino anena Filipo ati kwela mwi celeta wikale pamwi nani.

³² Iciputulwa ca malembelo pano wawelenganga cikati, “Wakoline wa mfwele iyasenzilwe ku kukomwa, wa kana ka mfwele akasiikavya lino yakukasenya amavumbu. Avino atamamwile mulomo.

³³ Wacefiwe nga nu kufyengelekeziwa. Kusi nanti umwi angati wasya uluko. Pano yamuputukizye umi muno nsi.”

³⁴ Mutungwi auzya Filipo ati, “Unene, aweni wino kasema wavwangilepo cii? Uzye umweneco nanti umuntu muze?”

³⁵ Lyene Filipo atandika kuvwanga. Atandikila pa ciputulwa ca malembelo kwene cii, amunena Ilandwe Lisuma lya pali Yesu.

³⁶ Lino yacili yakupita mu museo, yafika pa cifula apali manzi, nga mutungwi amunena ati, “Amanzi aeya pa. Uzye icani cingandesya kuti mbatiziwe?” [

³⁷ Filipo nawe aasuka ati, “Ndi wataila nu mwenzo wako onsi ungawatiziwa. Alino nawe aasuka ati nataila vino Yesu Klistu Umwana wakwe Leza.”]

³⁸ Mutungwi apeela ilamulo kuti iceleta limilile. Lyene Filipo na mutungwi iingila mu manzi oili, nga Filipo amuwatizya.

³⁹ Lyene lino wafuma mu manzi, Mupasi wa Mwene usenda Filipo. Mutungwi nawe atamuweni nupya, lelo atwalilila nu lwendo lwakwe, azanga cuze.

⁴⁰ Filipo azana ukuti ali mu Asidodi. Wapisile mu misumba yonsi ala akukosola Ilandwe Lisuma, asuka afika ku Kesaliya.