Milimo 23 - Amazwi Yakwe Leza 2013

¹ Paulo alolekesya amwi Tengo avwanga ati, “Inane, nemo na ndakai mu umi wane nati ntumikila Leza na kampingu musuma.”

² Alino Ananiya Simapepo Mukulu apeela ilamulo kuli yao aimi pipi na Paulo ati, “Mumini pa mulomo!”

³ Lyene Paulo amunena ati, “Nawe Leza alakuma we lung'umba we muno wapakwa umula. Utenzi papo kuti umpingule kulingana na Masunde yakwe Mose, lelo ukuvuna masunde pa kupeela ilamulo kuti yangume!”

⁴ Antu ali pipi na Paulo yanena Paulo yati, “Ukutuka Simapepo mukulu wakwe Leza!”

⁵ Paulo aasuka ati, “Mwe inane, ntali manyile ukuti a Simapepo Mukulu. Amalembelo yati, ‘Utakavwange iviipe kuli kateeka wa antu yako.’”

⁶ Lino Paulo walola ukuti iumba limwi lyali ilya Asaduki ni lyuze ilya Afaliseo. Alaizya umwi Tengo ati, “Mwe inane! Nene Mufaliseo, mwana wa Afaliseo. Inkupingulwa pano nkupaalila ukuti afwe yalazyukuka yaye aumi.”

⁷ Zuwazuwa lino wavwanzile cii, Afaliseo na Asaduki yatandika ukulemanila, nga ni umba lipaatukana paili.

⁸ (Pano Asaduki yakati antu yatalazyukuka kufuma ku afwe, nga nu kuti kutaya angeli nanti mipasi. Afaliseo yene yataila muli vyonsi vitatu.)

⁹ Lyene icongo cikulisya cuze, na yamwi amuli yakasambilizya ya Masunde, ali amwi umba lya Afaliseo yakatuka yapazya cuze yati, “Tutazanyile umuntu wii nu mulandu umwi! Nalimwi umupasi nanti mungeli uwavwangile munoli.”

¹⁰ Vikanza vikulisya na musika mukalamba intete zimulema zyakuti limwi yangasantola Paulo. Caleka apeela ilamulo ku asilika kuti yafumyemo Paulo yamutwale ku kamba kao.

¹¹ Usiku wa wanda walondelela, Mwene aimilila apali Paulo ati, “Posya sile! Wakwe vino watupeela umboni uwa pali nene muno mu Yelusalemu, avino ulinzile upele nu ku Loma kwene.”

Ayuda yumana kapi kuti yakome Paulo

¹² Uca katondo, nga Ayuda yamwi yakongana pali pamwi yapangana, yalaya nu mulapo ukuti yatakulya nanti kumwa suka yakome Paulo.

¹³ Yali ukuluta amakumi yani, aumine kapi.

¹⁴ Lyene yaya kuli yasimapepo akalamba na ikolo, yayanena yati, “Swemo twali twalaya nu mulapo ukuti tutangalya nanti kumwa suka tukome Paulo.

¹⁵ Lyene ndakai, mwemwe na amwi Tengo, tumini izwi kuli musika mukalamba kuti alete Paulo kunomuli, muikolanye uti mukulonda ukuvwikisya pali aliwe. Lelo tumaiteyanya kumukoma lino atacili afike kuno.”

¹⁶ Lelo umwipwa wakwe Paulo auvwa vino yumine kapi. Caleka aya aingila mu kamba ka asilika nga anena Paulo.

¹⁷ Lyene Paulo aama wenga uwamu ntunguluzi nu kumunena ati, “Senda umulumendo wii kuli musika mukalamba. Ali na cimwi icakumunena.”

¹⁸ Musilika amusenda, amutwala kuli musika mukalamba, amunena ati, “Umunyepwe Paulo wali wangama nu kunguzya kuti indete umulumendo wii kuli wewe, pano ali ni cakuvwanga kunuli.”

¹⁹ Musika mukalamba alema mulumendo pi kasa amutwala pa mbali amuuzya ati, “Uzye icani cino ukulonda kunena?”

²⁰ Nawe amunena ati, “Intunguluzi zya Ciyuda zyati zyuvwana kuti zikulenge kuti mutondo ukatwale Paulo kwi Tengo, nu kuikolanya kwati yakulonda ukuuvwa ningo umboni na uze pali aliwe.

²¹ Lelo utakuvwe kunoyali, pano antu ukuluta pa makumi yani yalafisama nu kumuteyamila. Yati yalaya nu mulapo ukuti yatakutala yalye nanti kumwa cili consi suka yakome Paulo. Ndakai yati yaiteyanya kuti yacicite, nupya yakulolela sile vino wiza landa.”

²² Alino Musika mukalamba uwa asilika amunena ati, “Cisuma, wemo pitanga, lelo utanena nanti umwi vino watunena.”

Yatwala Paulo ku Mulasi Felikisi

²³ Alino musika mukalamba aama yamusika yaili, ayanena ati, “Teyanyini asilika imyanda iili kuti yaye ku Kesaliya, pali pamwi na apa mfwalasi makumi cinimbali na a masumo nao imyanda iili, muiteyanye kukatuka usiku ni nsita yakwe 9 koloko.

²⁴ Mupeleko Paulo imfwalasi zimwi izyakupitilapo, mukamufisye umutende ku mulasi Felikisi.”

²⁵ Alino musika mukalamba alemba na kalata umwali amazwi ndi yaa:

²⁶ “Anene Klaudio Lisiasi, nkulembela nu kulamuka we Mulasi Felikisi Musambazi.

²⁷ Ayuda yalemile umuntu wiyo nupya yali pipi nu kumukoma. Lino namanyile vino wene umwina Loma, napisile na asilika yane nu kuya mupususya.

²⁸ Nalondanga ukumanya mulandu uno yamupeelanga. Caleka namutwazile kwi Tengo lyao.

²⁹ Nazanyile ukuti atacisile nanti icintu cimwi icakuti akomwe nanti kusumbilwa mu ng'anda yaminyololo. Umulandu uno yamupile wali apamulandu wa masunde yao.

³⁰ Lyene lino iyanena ukuti Ayuda yamwi yumine kapi kuti yamukome, inelenganya ukuti imutume kunuli. Nati nena na yao akumulongwela kuti yakize yakamusinile pali wewe!”

³¹ Asilika yalondela amalamulo yao. Yasenda Paulo usiku kwene ulya yamufisya ku Antipatili.

³² Uwanda uze asilika apa ngazo yaswilila ku kamba yasya yayo ali pa imfwalasi kuti yasukilile Paulo.

³³ Yamutwazile ku Kesaliya, yatwala na kalata ku Mulasi, yaleta na Paulo kuli aliwe.

³⁴ Mulasi awelenga kalata nga auzya Paulo pamulandu wa muputule wa mpanga kuno wafuma. Lino Mulasi uvwa vino wafuma ku Kilikya,

³⁵ amunena ati, “Namaiza nuvwe mulandu wako lino yao akukulongwela iiza.” Lyene apeela ilamulo kuti yasunge Paulo nu kumulinda mwi sano lyakwe Helodi.