Milimo 12 - Amazwi Yakwe Leza 2013

¹ Pa kasita kwene kaka, umwene Helodi atandika kuzunya yamwi amwi uvi.

² Caleka yakoma Yakobo mwina wakwe Yoane nu lupanga.

³ Lino walola vino cazanzya Ayuda, atwalilila, kuti yaleme Petulo. (Cii cacitike pa nsita ya Cimulo ca Mukate usi na citutumusi.)

⁴ Lino yalema Petulo, yamuyalila mu ng'anda yaminyololo yaleka kuti mpuka zini zya asilika yani yani zyamulinda. Helodi walondanga kuti akize akamulete ku antu lino cimulo casila.

⁵ Caleka Petulo asungwa mu ng'anda yaminyololo, lelo iuvi lyamupepelanga kuli Leza nu mute.

Mungeli wafumya Petulo mu ng'anda yaminyololo

⁶ Usiku lino utali uce pa wanda uno Helodi walondanga kumuleta kuti amuvunuke pa manso ya antu, Petulo waizi pakasi kakwe yakalinda yaili. Wanyefilwe ni minyololo iili, kwali na yakalinda pa mpongolo ya ng'anda yaminyololo.

⁷ Mu kupumikizya mungeli wa Mwene aiiza aimilila, nu luswepo luyengesa mu muputule wa ng'anda yaminyololo. Mungeli atensya Petulo pa ciye, amuzyula nga amunena ati, “Pitisya! Katuka!” Papo kwene minyololo ilukuta ku makasa yakwe Petulo.

⁸ Lyene mungeli amunena ati, “Zwala, nyepa musipi ni ndyatu zyako, undondele.”

⁹ Petulo amulondela kufuma mu ng'anda yaminyololo. Lelo atamanyile ndi cino mungeli wacitanga cali icacumi. Welenginye vino akulola cilolwa.

¹⁰ Lyene yapuzya pali yakalinda yankolelo, na yakwe ciili kwene, nga yafika pa mpongolo ya cela iya kwingilila mu musumba. Alino mpongolo iyulika isikulu, nga nao yafuma. Yalondela museo, nga mukupumikizya mungeli asya Petulo.

¹¹ Lyene lino Petulo walooka icamucitikila, avwanga ati, “Ndakai namanya vino icacumi! Mwene wali watuma mungeli wakwe ukwiza mpususya kufuma ku maka yakwe Helodi nu ku vintu vino Ayuda yapanzile kucita kunondi.”

¹² Lino wiluka vintu vii, aya ku ng'anda yakwe Maliya, nyina wakwe Yoane akaamwa ukuti Mako. Antu aingi yakongine kuku ala yakupepa.

¹³ Petulo akonkonsya ku cisasa, alino mukazyana muomvi, zina lyakwe a Loda, aiiza kuti amuyulile.

¹⁴ Amanya izwi lyakwe Petulo nga azanga cuze cakuti asimula, aswilila mu kasi ukwaula kuyula icisasa, alino aya alanda vino Petulo aimi apanzi.

¹⁵ Antu nao yamunena yati, “Si wapena.” Lelo ayanenekesya vino icacumi. Caleka yavwanga yati, “Wiyo mungeli wakwe.”

¹⁶ Lelo Petulo atwalilila kukonkonsya. Lyene lino yamuyulila nu kulola vino aliwe kwene, yazunguka.

¹⁷ Alino Petulo ayasinizya ku makasa yakwe kuti yamyalale, nga ayalondolwela vino Mwene wamufumizye mu ng'anda yaminyololo. Ayanena ati, “Kanenini Yakobo na ina itu yonsi pali vii.” Alino afuma, aya kuze.

¹⁸ Lino kwaya katondo, kwali cimvulunganya cikulu apakasi kakwe yakalinda, yavwanga yati, “Petulo wataya kwi?”

¹⁹ Helodi wapile ilamulo kuti yakamulonde, lelo yatamuweni. Caleka apeela mulandu kuli yakalinda yaya kuti yakomwe. Pacisila cakwe cii Helodi wene afuma mu Yudeya aya ku Kesaliya.

Imfwa yakwe Helodi

²⁰ Helodi wasokile antu amu Tuli na Sidoni. Caleka antu yaya yapita iumba kuya mulola. Inkolelo yatala yatandana icuza na Blasito, uwali umwangalizi mwi sano. Lyene yaile kuli Helodi nu kumuuzya ukuti paye mutende, pano impanga yao yafumyanga ivyakulya ku mpanga yakwe.

²¹ Pa wanda usololwe Helodi azwala vizwalo vya wene, aikala na pa cilimba cakwe ca wene nga avwanga ku antu.

²² Lyene antu yasanzika mazwi yati, “Asi umuntu akuvwanga, lelo a Leza!”

²³ Lilyo kwene mungeli wa Mwene alwalika Helodi pano atapile lulumbi kuli Leza. Helodi ingonyo zimulya, afwa.

²⁴ Lelo izwi lyakwe Leza litwalilila kusalangana nu kukula.

²⁵ Banaba na Saulo yamala incito yao yafuma ku Yelusalemu, yasenda Yoane akaamwa ukuti Mako.