Mika 3 - Amazwi Yakwe Leza 2013

Mika wanenola intunguluzi zya ina Izlaeli

¹ Lyene imvwanga nti, “Uvwini mwe ntunguluzi zyakwe Yakobo, mwemuno mukateeka amu luko lwakwe Izlaeli! Uzye yayo alinzile kumanya ulungami asi amwemwe,

² mwemuno mwapata ivisuma, mwatemwa iviipe? Antu yane mwayacita kwati mukayafuwa impapa ala yacili apuma, nu kucekola iminyefu yao.

³ Mwacita kwati mukalya antu yane, nu kuyafuwa impapa, nu kukontola amafupa yao, nga nu kuyaputolela mu ntendo ungati inyama.

⁴ “Ala insita iliza lino mulakuuta kuli Yawe kuti amwazwe, lelo wene atalamwasuka. Pa nsita kwene iyo wene ataluvwa inkuuta inu pamulandu wa nkota zinu.”

⁵ Yawe wavwanga wati, “Antu yane yasombwa na yakasema yamwi, yano yakapumbola antu. Ndi umwi wayimula, yene yakamulaya umutende, lelo ndi atacisile vivyo, yene yakamunena amazwi ya misindicila a nkondo.”

⁶ Caleka Yawe akuti, “Mwe yakasema, muliililwa na kanda kanyepe, mutalalola vilolwa nupya. Pamulandu wakuti mukapumbola antu yane, mwemo mutalakwata vilolwa navyuze, nupya mutalasapoola icintu cili consi.

⁷ Yakasema yalaya ni nsonyi pakuposiwa kwao, nga yakasapoola yalazewana, pamulandu wakuti Leza atalayaasuka.

⁸ “Lelo nemo, Yawe wanzuzya amaka, wanzuzya umupasi wakwe. Wanzuzya ulungami nu ulamba, kuti nenole amu mupanda wakwe Yakobo inkota zyao, kuti ndangilile aina Izlaeli amaifyo yao.

⁹ Uvwini vii, mwe ntunguluzi zya amu mupanda wakwe Yakobo, mwe muno mukateeka aina Izlaeli, mwe muno mukasuula ulungami nu kolonganya vyaololoke.

¹⁰ Mwakuula Zioni umu cuma cakwe ucikoma nu lufyengo, Musumba wa Yelusalemu wakuulilwa na maifyo inu.

¹¹ Yakapingula yakweo yakapoka amafukakanwa apakupingula. Yasimapepo yakweo yasisambilizya ukwaula kulifya cimwi. Yakasema yakweo yakasema kuti yalipilwe. Nupya yene yakalanda ukuti Yawe ali na alio. Yakavwanga yati, ‘Kusi cimwi ciipe icingatuponela, awe, pano Yawe ali naswe.’ ”

¹² Caleka pamulandu winu, Zioni alalimolwa wa calo, Yelusalemu alaya citalang'anda, nu mwamba apa kuulwa Ng'anda ikulu yakwe Yawe ulaya umutengo.