Mateo 2 - Amazwi Yakwe Leza 2013

Antu yamano yafuma ku Ufumondaka

¹ Pacisila lino Yesu wavyalwa mu musumba wa Betelemu mu Yudeya, mu manda yalya lino Helodi wali umwene, antu yamano amanyanga vintu mu kusambilila pa ntanda yafuma ku ufumondaka, iiza ku Yelusalemu.

² Alino yuzya yati, “Uzye wino watavyalwa nupya wino alaya Mwene wa Ayuda ali kwi? Pano twaweni lutanda ku ufumondaka, lwatumanyisya kuvyalwa kwakwe, nga twiza ku kumupepa.”

³ Lino mwene Helodi wacuvwa, wene pali pamwi na amu Yelusalemu yonsi yasakamikwa.

⁴ Lyene akonganika yasimapepo akalamba yonsi na yakasambilizya ya Masunde, ayauzya ati, “Aukwi kuno Katuula uwalavilwe ali nu kuvyalilwa?”

⁵ Nao yamwasuka yati, “Mu Betelemu musumba uwamu Yudeya, pano avino kasema walemvile ati,

⁶ ‘Nawe Betelemu, mu mpanga yakwe Yuda, Usi munono muli yakateeka yakwe Yuda. Pano munuli mulafuma intunguluzi, ino ilaya akateeka wa antu yane aina Izlaeli.’ ”

⁷ Lyene Helodi aama antu yamano yalya kumbali ayauzya ningo mu nkama insita lino lutanda lwalolike.

⁸ Alino ayanena ati, “Yangini ku Betelemu mukalondelezye ningo pamulandu wa mwana wilya. Lino mwamuzana mwize munene zuwazuwa kuti nani kwene nkaye nkamupepe.”

⁹ Pacisila lino antu yamano yuvwa ku mwene yapita. Nu lutanda luno yaweni ku ufumondaka luyakolelela luya lwimilila papela pano mwana wali.

¹⁰ Lyene lino yalola lutanda, yazanga cuze.

¹¹ Alino iingila mu ng'anda, yalola mwana wilya na nyina Maliya, yamufukamila yamupepa. Alino yasapula vyuma vyao, nga yamupeela mawila yakwe zaabu, ubani nga ni vyamununko usuma, Mule.

¹² Lyene lino yacelulwa na Leza mu ciloto kuti yataswilila kuli Helodi, yapita museo uze kuya ku mpanga ya kumwao.

Yutusizya Yesu ku Eguputo

¹³ Lino antu yamano yaswilila kumwao, mungeli wa Mwene aloleka kuli Yosefu mu ciloto amunena ati, “Katuka, senda mwana na nyina utukila ku Eguputo. Kikale kweneko kufika lino ndakunena, pano Helodi amalondelezya ukuli mwana wiyo kuti amukome.”

¹⁴ Caleka Yosefu akatuka usiku atoola mwana na nyina, nga apita ku Eguputo.

¹⁵ Aikala kweneko kufika lino Helodi wafwa, kuti cifikiliziwe cino Mwene wavwanzile kupitila muli kasema ati, “Namile mwanane umonsi kufuma ku Eguputo.”

Helodi wakoma Ana

¹⁶ Lyene Helodi lino wamanya vino antu yamano yamutumpoka asoka cuze, atuma asilika yamwi ku kukoma ana yonsi aonsi ali ni myaka iili ya kuvyalwa nu kwiza pansi, ali mu Betelemu nu mu ncende izyapalime. Cii cali kulingana na vino antu yamano yamunenyile pamulandu na kasita, lino yaweni lutanda.

¹⁷ Lyene cafikiliziwe cino kasema Yelemiya wavwanzile ati,

¹⁸ “Izwi lyuvwika mu Lama, ilya kulila nu kulosya cuze. Lakeli akulila ana yakwe nupya wakana ukutekeziwa pano yalowa.”

Akwasi yakwe Yesu yawela nawe kufuma ku Eguputo

¹⁹ Lino Helodi wafwa, mungeli wa Mwene aloleka kuli Yosefu mu ciloto ku Eguputo.

²⁰ Amunena ati, “Katuka, senda mwana na nyina, pita ku mpanga ya Izlaeli pano yao alondanga kukoma mwana yati yafwa.”

²¹ Caleka Yosefu akatuka, asenda mwana na nyina yaya ku mpanga ya Izlaeli.

²² Lelo lino uvwa vino Akelao akuteeka mu Yudeya mu cifulo cakwe isi Helodi, aoopa kuyako, lino yamusoka mu ciloto, apita aya ku muputule wa mpanga ya Galile.

²³ Alino aya ikala mu musumba wa Nazaleti, kuti cifikiliziwe cino Leza wavwanzile kupitila muli yakasema, ati, “Alaamwa mwikazi uwamu Nazaleti.”