Masamu 98 - Amazwi Yakwe Leza 2013

Leza ali mweneco wa nsi yonsi

¹ Imbilini Yawe ulwimbo lupya, pano wacita ivyakuzunguka, nupya wacimvya uku maka yakwe nu ulamba wakwe ucindame.

² Umwene watumanyisya ufyusi wakwe, wasokolola ulungi wakwe pa manso ya inamasi.

³ Wiusya uluse na ucisinka wakwe uku ng'anda yakwe Izlaeli. Imipaka yonsi iya mumo nsi yalola ufyusi wakwe Leza witu.

⁴ Umililini Yawe utupundu mpanga yonsi, mupongomoke mupunde ni nsansa.

⁵ Imbilini Yawe umwi zeze nu mu ngoma ni ntandala.

⁶ Zangini apa manso yakwe Yawe, umusambazi, ukwi penga ni nsi yonsi, kumwi na ikala mwenemo.

⁷ Yemba kalunkume kumwi na vyonsi ivyaya mwenemo, ni nsi yonsi kumwi na ikala mwenemo.

⁸ Inguzi zyonsi kazikomele inkufi, imyamba nayo ipunde ni nsansa,

⁹ apa manso yakwe Yawe, pano wataiza uku kulolwesya insi. Alapingwila insi pano yapelela umu kulungika, nga ni mitundu yonsi nayo umu ulungi wakwe.