Masamu 97 - Amazwi Yakwe Leza 2013

Leza akacimvya

¹ Yawe aliwe akuteeka, insi kizange. Ni vilila vyonsi ivivule ka visansamuke!

² Amakumbi ni mfinzi vyamulilizya. Icumi nu ulungi ivikatungililila icilimba cakwe.

³ Umoto ukamukolelela nu koca anisi yano yamulilizya.

⁴ Ukumyansya kwakwe kukaswefya insi yonsi, nga alino insi ilola nu kuzakaza.

⁵ Imyamba ikasunguluka sile wi pula, apa manso yakwe Yawe, apa manso ya Mwene wa nsi yonsi.

⁶ Mayulu yakalanda vya ulungami wakwe, nga imitundu yonsi pyu, yalola ucindami wakwe.

⁷ Yakapepa yatuluwi, insonyi kaziyaleme, yayo yonsi akaitanka apa vyaciwelewele. Alino mwe tuleza tonsi mufukamilini pansi.

⁸ Zioni watauvwa, watazanga. Ni mizi yaku Yuda ikuzanga, apamulandu wa mipingwile yako we Yawe.

⁹ Pano we Yawe, wewe Wapapelapela pano nsi yonsi, Wewe mukulu ukuluta tuleza tonsi.

¹⁰ Yawe watemwa antu yano yapata iviipe, akasungilila imyenzo ya antu yakwe, nu kuyapususya umu minwe ya aipe.

¹¹ Uluswepo lukayengesela yayo akacita vyaololoke, nga antu yayo yaya ni nsansa.

¹² Mwe antu mwemuno mukacita vyaololoke, zangini muli Yawe, lumbanyini ni nsansa ukucindama kwakwe.