Masamu 9 - Amazwi Yakwe Leza 2013

Intaizyo kuli Leza pa ulungami wakwe

¹ Namakutaizya we Yawe, nu mwenzo wane onsi, namataka ni vicitwa vino wacita ivyakuzunguka.

² Namaimbilanga ni nsansa pamulandu wako. Namaimbilila ni zina lyako, we Leza Wamaka yonsi.

³ Anisi yane yatiyapuuka cundansizi. Yakupempezyoka iyapona nu kufwa.

⁴ Nemo wampingwila ukwaula ulufyengo. Wewe kapingula uwa ulungi, apa cilimba cako pano wikala.

⁵ Wakalipila ainamasi nu kupezya aipe. Amazina yao yatalatala yiusiwe awe.

⁶ Anisi yatiyapongelela umwi lovyo lya muyayaya. Watuwisya imisumba yao na mazina yao yatiyalowa.

⁷ Lelo Yawe akateeka umuyayaya, Cilimba cakwe ca wene wacisimpa apa kupingwila antu.

⁸ Amaputwila imilandu yonsi nu wololoke, nu kuputwila imitundu imilandu umu ulungami.

⁹ Yawe ali cele lyakuzina kuli yano yafyengwa. Angala aye ilinga mu kasita ka ucuzi.

¹⁰ Antu amanya we Yawe yangala yakutaila. Akakulonda we Yawe usiyatazyela.

¹¹ Imbilini nyimbo zyakulumbanya Yawe, wiyo uwikala umu Zioni. Landilini ainamasi ivicitwa vyakwe.

¹² Wene akaiusya yao akucula, atange ailile uku mpooma zyao, nupya aliwe akayalandwila kuli yano yakayaifya.

¹³ Ndola luse luse, we Yawe! Lola ucuzi uno anisi yane yamponyezya. Awewe sile ungampususya ku mfwa, we Yawe,

¹⁴ apakuti ningimilila inkolelo ya antu amu Yelusalemu nu kuyanena ivintu vyonsi vino nkakulumbanyizizyapo. Namazanga pano wemo wantuula.

¹⁵ Ainamasi yatiyaponela umu viwina vino yimvile aisikulu. Ingazo zyao zyatizilemya umu nkose zino yatevile aisikulu.

¹⁶ Yawe wataisokolola umwisikulu umu upinguzi wakwe ulungame. Watafyenenkezya aipe umu vicitwa vyao.

¹⁷ Imfwa ali uyo wa antu aipe, yayo yonsi akana Leza.

¹⁸ Umuntu uulilwa yatalamwilila lyonsi foo. Utailo wa mupina utalatala ononeke.

¹⁹ Katuka, we Yawe! Utaleka umuntu akusuule! Lolwela ainamasi apa manso yako. Si ule uyapingule

²⁰ We Yawe, sileka intete ziyaleme, uleke ainamasi yamanye ukuti yene antu asilesile.