Masamu 88 - Amazwi Yakwe Leza 2013

Ipepo lyakukuta tutuulwe

¹ We Yawe, Leza wino akantuula, umusanya nu usiku nkulila kunuli.

² Sileka ipepo lyane lifike kunuli, Teya ikutwi kuti uvwe mpoma zyane.

³ Pano natimponelwa ni ntazi izivule wakwe cimwi, cakuti indi apipi nu kufwa.

⁴ Nkupendelwa pali yayo aikala umu malindi, ntakweti amaka.

⁵ Yatiyansya nenga umu afwe. Indi wakwe yano yakoma, alaala umu malindi yao, yano wemo wililila, yano watazyela.

⁶ Nemo watunsumba umu malindi pansi pansi, apafite fititi, nupya apazike sana.

⁷ Ukali wako wati untininkizya, ntange mfute ningo foo. Amayimbi yako yakuntuwizya.

⁸ Watuleka nu kuti anisi yane yansangukile, watuncita ukuya icamuselu kunoyali, natinjalilwa cakuti nkuposiwa nu kwa kufumila.

⁹ Ivipa vyane vyativinyomelwa nu kunyunguluka. Cila wanda nkalaizya kunuli, we Yawe, nkutumpula amakasa kunuli, nkupepa.

¹⁰ Uzye afwe nayo ukayacitila ivizungusyo? Uzye nayo yangatumpula amakasa kunuli, yapepe?

¹¹ Uzye umu malindi yao namo yangalanda apa kutemwa kwako ukwa muntaputuka nanti apa cuumi cako?

¹² Uzye ivizungusyo vyako vingaloleka umu cifulo ca kanda, nanti uololoke wako umu mpanga ya antu aililika?

¹³ Lelo nemo nkakuuta kunuli we Yawe, cila katondo nkapepa kunuli.

¹⁴ We Yawe, uzye pacani cino wantazyela? Uzye pacani cino wamfutatila?

¹⁵ Ukutandikila uku wance wane, nemo pasi pakucuula, nkupita icipapala mfwa. Muno nkalukuzizimizya pamulandu nu uvunuko wako, ninsuka nintonta, lwatilusila.

¹⁶ Icipyu cako caticimvungola, ingofyo zyako izikulu zyatizingonona.

¹⁷ Vii vyonsi vikandizizya umusanya onsi wakwe mulamba, vyamfupilizya monsi monsi!

¹⁸ Wemo wafuntusya kunondi yacuza yane, kumwi na akundwe yane. Lyene akanda katupu ali cuza wane.