Masamu 86 - Amazwi Yakwe Leza 2013

Ipepo lyakulenga uwazwilizyo

¹ Teya amatwi kunondi we Yawe, unguvwe, pano nene mulanda nati mpelelwa.

² Nsunge, pano nakufukilila, umpususye ne muzya wako umusanya onsi.

³ Awewe Leza wane, fwandi undole luse luse. Awewe nkapepa umusanya onsi.

⁴ We Yawe, si sansamusya ne muzya wako, pano akuli wewe wenga sile, akuno nkalozya amapepo yane.

⁵ We Yawe, wemo wewe musuma, nupya ukayelela uluse, wakwatisya nu luse kuli yonsi akakupepa.

⁶ We Yawe, sungala uvwe ipepo lyane, uvwe ni nkuuta yane.

⁷ Ala nemo ndi napelelwa, nkalaizya tutulwe kunuli, pano wemo ukanjasuka.

⁸ Kutaya Leza uwaya wakwe wewe, we Yawe. Kutatala kuloleke nanti wenga uwacita wakwe vino wacita.

⁹ Imitundu yonsi ino wapanga imaomokelanga kunuli, uku kupepa nu kukucindika we Yawe,

¹⁰ Pano wemo wewe wamaka, nupya ukacita ni vyakuzunguka. Wemo wenga mpo, wewe uli Leza.

¹¹ We Yawe, unsambilizye ukucita vino ukalonda pakuti nakutontelela mu mipitile yane na pakuti naoopa izina lyako.

¹² Nemo namakulumbanyanga nu mwenzo wane onsi. We Mwene we Leza wane, namakucindikanga pee.

¹³ Pano ukutemwa kwako kunondi ukwa muntaputuka ukukulu sana, Nemo wampususya nu kwi lindi kwene.

¹⁴ Iye we Leza, ala antu yavilumba yatiyankatukila, iumba lya antu akakate likulonda ukundya umwisi, antu yao atakusakamala nanti panono.

¹⁵ Nga lelo pano we Mwene wakwatisya uluse, nupya wewe Leza wakutemwa wino asisoka zuwa, lyonsi waya nu kutemwa ukwa muntaputuka, nupya wewe wakutailwa lyonsi.

¹⁶ Ali cino fwandi senukila kunondi nu kunjelu luse, unkumye ne muzya wako, umpususye ne mwana wa muzya wako, mayo uwakumvyala.

¹⁷ Ndangilile icakusininkizizya usuma wako we Yawe, Uleke insonyi zileme yao ampata. Yamanye nu kuti awewe sile ukangazwa nu kunsansamusya.