Masamu 77 - Amazwi Yakwe Leza 2013

Ukutekeziwa apa nsita ya ucuzi

¹ A Leza awino nemo nkapongomokela kunoli. Nemo nkalilila kunoli kuti anguvwe.

² Umu nsita ya macuzi nemo nkapapata Umwene. Usiku onsi nkakatusya makasa yane nu kupepa aliwe kwene, lelo umwenzo wane usi myalalikwa foo.

³ Nemo nkaiusya Leza nu kufuteka ala nkufuteeka, nkuinong'onya umu mwenzo, nupya nkatovoka nu kutovoka.

⁴ Wene akandesya ukulala utulo. Nemo lyene pasi pakusakamala, icakuti nkaposiwa nu kuvwanga.

⁵ Nkaelenganya lyene amanda yampiti, nu kwiusya imyaka yampiti na mpiti.

⁶ Nkalola uca, ala nkwelenganya. Nkaivwanzya nu mu mwenzo ala nkuti,

⁷ “Uzye Yawe amankananga lyonsi? Uzye atalaswilizya ukundolekesya pe luse luse?

⁸ Uzye lyene wata ukutemwa? Uzye lyene ulayo wakwe utaciomba?

⁹ Uzye lyene Leza wata ukukwata uluse? Uzye icipyu cakwe kwene icikaleka atakwata uluse vwile?”

¹⁰ Nga kula nupya imbwela inti, “Icikuncisa uku mwenzo, aeci icakuti, awe cumi Leza lyene amaka yakwe yatiyasila.”

¹¹ We Yawe vino wacita vyonsi ivyakuzunguka, nemo namaiusyanga. Nemo namaiusyanga ivizungusyo vyako vyonsi vino wacisile mpiti.

¹² Namaelenganyanga pali vyonsi vino wacita, namakutumalangapo mu milimo yako yonsi.

¹³ Vyonsi vino we Leza wacita, ivyamuzilo! Kutaya namuze uwacindama wakwe wewe!

¹⁴ Wemo wewe Leza kacita wa vizungusyo. Walanzile ni mitundu yuze apapela amaka yako.

¹⁵ Uku maka yako sile, ali kuno wapuswisye antu yako yamwana Yakobo na yamwana Yosefu

¹⁶ Walanga amanzi yakulola sile we Leza, yazakize, nu mumatenga pansi namo imutenta.

¹⁷ Amakumbi nayo iyafumfumula imvula, ni nkuwa nazyo izya pangalakasya, icakuti izyamyantola na monsi monsi.

¹⁸ Inkuwa iyapangalakansya, alino nu kumyantula kwakweyo nako ikwakozya pano nsi, cakuti iyazakaza nu kutenta, iyatenta.

¹⁹ Wapisile muli yemba, walamba yemba mukalamba umuzike wakwe cimwi ni ngazo muno walyatanga zisi zyakuloleka nanti panono.

²⁰ Endi mwandi, avino watungulwile antu yako wakwe kacema wa mfwele, pamwi ni ntunguluzi zyao, Mose na Aaloni.