Masamu 73 - Amazwi Yakwe Leza 2013

LUPAPULO LWAKWE CITATU (Masamu 73–89) Ulungi wakwe Leza

¹ Cumi kwene, Leza umusuma ku ina Izlaeli, uku antu akwata imyenzo iyakaele!

² Lelo nemo walanga nimponzya nu upalilo, kwempe nu kupumbuka,

³ apa kuvwa uzuwa apa kulola kuno aipe nayo yakwata ulongo.

⁴ Yene yasicululuka foo. Imili yao ikome ndi nupya itelepe.

⁵ Yasicula ndi vino antu yauze yene yakacula nanti ukukwata amasakamiko ndi vino antu yauze yakakwata.

⁶ Ali cino fwandi ni cilumba naco yakacizwala wa ukasi umu nsingo ni mpanzela nazyo wa mwingila.

⁷ Mu myenzo yao mukazwa sile iviipe, na mano yao lyonsi yaya apamviwe nu kwelenganya amapange akucita ivitazifile.

⁸ Yakasoweka auze nu kulanda iviipe, yakwata ivilumba nu kupanga ivyakufyengelekezya auze.

⁹ Yakalanda ni vipe pali Leza wa mwiyulu, nu kunena antu ya pano nsi kuti yavilondela.

¹⁰ Yakalenga nu kuti na antu yakwe Leza iyasuka iyaponela mwenemo muno yali, iyatandika nu kulondela vino yakuyanena.

¹¹ Yene yakavwanga iyati, “Awi see, Leza atange amanye, Leza mukulu atange ailuke!”

¹² Ica cumi, vivyo ivyaya antu aipe! Yene yakwata ivyuma ivingi, ni nsita zyonsi yakazanilapo navyuze!

¹³ Uzye fwandi nemo lyene inkaicuzya sile, apakusunga umwenzo wane ukuya uwakaele, na pakufulala uku minwe lino nkuizifya?

¹⁴ Iye mwe Leza, awewe ukaleka kuti nacula vii umusanya onsi, na cila katondo ukatala uncuzyapo!

¹⁵ Iciya anene navwanzile ivya musango uu, ngano nasomvile antu yako.

¹⁶ Ali cino nemo nezizye na maka yane yonsi ukumanya muno ciile nanti ukuya kwene, cali icicuzye.

¹⁷ Nasusile naya ningila umu Ng'anda ikulu yakwe Leza, alino niluka, namanyanga nakuno aipe yalapelela.

¹⁸ Ukuya kwene umucumi, wayaika muli kafuli mukonko nupya ukuyasunkilizya ukwakuti yace yapongelele!

¹⁹ Yakapongelela sile ukwaula nu kusumba akasita. Ee mwandi ali kupezya, yakaifwila sile uku ntete!

²⁰ Mwene! Ala yaya wa ciloto icikaililwa lino waca. Akula ukuzyuka uwilila na vino cali cili.

²¹ Lino cambayanga umu mwenzo, nu kusyolokota,

²² Ata see, cali sile ukutumpa kwane, nga nu kuntiluka ukwa vintu. Apa manso yako nayanga wa nyama ya mpanga.

²³ Lelo kwene insita sile yonsi, awewe tukaya nawe, nu kundemelela awewe ukandemelela kweneko.

²⁴ Ukantungulula uku mano yako, nu kumpelelekezyo ulampokelela umwako, umwaya ucindami wako.

²⁵ Awewe wenga mpo, awewe nasumbako amano yane umwiyulu mumo, nga namuze fwandi, aweni? Icani nacuze cino nemo ningalonda pano nsi ukuluta pali wewe?

²⁶ Nanti sile umwili wane nu mwenzo wane vingatontenkana, we Leza, wewe uli maka yane, awewe nkalukisya pee!

²⁷ Umu cumi yayo akafuntuka kunoli, yalaponga. Nupya yayo yonsi akakusangukila, wemo ukayonona.

²⁸ Lelo nemo natemwisya ukukupalamila, we Leza! Akuli wewe we Yawe akuno nemo nazina, apakuti inalumbilizya vyonsi vino wemo ukacita.