Masamu 71 - Amazwi Yakwe Leza 2013

Ipepo lya muntu mukote

¹ Leza we, akuli wewe akuno nemo nkazina, utaca ukatale ukaleke nuvwe insonyi.

² Vino wemo wewe wa ulungi, ngazwa nupya mpususye! Siuvwa kuno, kalauka umpususye kweneko.

³ Uye Ciliwe cane umwakuzinamo, muno nkapusukila kwati indi umwi linga lya maka. Wemo awewe nkazinamo, nupya awewe ukancingilila kweneko.

⁴ Leza, umpokolole uku antu aipe, umfyombotole umu makasa ya antu yakakate aipisye.

⁵ We Yawe Simwandalali, awewe nemo nataila, awewe nataila ukutandikila sile uku wance wane.

⁶ Nemo awewe kwene nasinta mwenemo umwenzo wane ukutandikila sile pano nikalila pano nsi. Wewe ukampokolola kweneko ukutandikila sile pano navyalilwe. Nemo awewe namalumbanyanga pee na pee!

⁷ Antu aingi yakazunguka kuli nene, lelo nemo awewe nkazina mwenemo, wewe wamaka umu cumi.

⁸ Nemo nkakulumbanya umusanya onsi, nu kulumbilizya ucindami wako.

⁹ Utantazyela pa musango wakuti natinkota. Utansumba pa musango wakuti lyene natinsila.

¹⁰ Anisi yane, akulonda uku nkoma, yakavwangila capamwi yonsi nu kumpingila.

¹¹ Yene yakati, “Leza watamutazyela, katukalaufye uleke tumuleme, pano kusi nanti wenga uwakuti amupokolole kweneko!”

¹² Leza we, ala utantaluka foo, kalauka sile ndungazwe, Leza wane!

¹³ Leka yayo ankatukila insonyi ziyaleme, nu kulowa yale yalowelele sile! Yao akalonda ukuncita cimwi kayasundwe, nu kuzewana yazewane.

¹⁴ Lelo nemo insita yonsi awewe namatailanga. Nemo awewe namacizyangapo sile lyonsi ukulumbanya.

¹⁵ Nemo namatakolanga usuma wako nu kuvwanga umusanya onsi apa mipususizye yako, nanti angala nemo nafika sana penepo apakumanya kuno yalola.

¹⁶ We Yawe Simwandalali nemo namalumbanyanga amaka yako, nu kulumbilizya usuma wako, nao uwako sile wenga.

¹⁷ Leza we, awewe wansambilizya ukutandikila sile uwance wane, na ndakai kwene nemo ncili nkulanda apa milimo yako iyakuzunguka.

¹⁸ Nanti lyene nemo ninkota, ninkwata ni mvwi, ala utandekelezya we Leza! Uwaya nani lino nkulumbilizya amaka yako nu ukama wako, ukufika ni nkulo iiliza uku nkolelo.

¹⁹ We Leza, usuma wako wafika sile nu mupela. Wemo wacita ivintu ivikalamba wakwe cimwi! Icacumi, kutaya nanti wenga uwaya wakwe wewe!

²⁰ Wemo awewe ukandetela amizu na malanda. Lelo nupya awewe kwene ulampuputula. Nu kumfumya uku milomo yi lindi.

²¹ Nemo, awewe umancindamikilangako, nupya awewe kwene uma myalalikanga.

²² Nemo namakulumbanyizyanga umu viwaya, namakulumbanyanga we Leza wa cumi. Apa kangoma kane apano nemo namakwimbililanga inyimbo, wewe, we Wamuzilo uwa ina Izlaeli.

²³ Nemo namaumilanga na kapundu, apa kukulizizya, namatentanga sile wensi pyu apa kwimba, pano awewe wampususya.

²⁴ Umusanya onsi, nemo namalandanga apa usuma wako, pano yayo akalonda ukuncita cimwi, wemo wayacimvya nu kuyalenga insonyi.