Masamu 68 - Amazwi Yakwe Leza 2013

Ulwimbo lwa kwimbilila Leza apa kucimvya anisi

¹ Leza kakatuke, apase na anisi yakwe. Na yayo amupata kayutukile ukutali.

² Ndi vino icunsi cikasansantika, avino nayo kwene kayasansantike. Vivi kwene vino ipula likasunguluka uku moto, avino na antu aipe kwene kayapongelele, yafume apa cinso cakwe Leza.

³ Lelo asuma yene, yalasansamuka nu kuzanga pa cinso cakwe, yalasansamukisya wakwe cimwi.

⁴ Imbilini Leza inyimbo zyakumuwanzya, lumbanyini wiyo akapitila umu makumbi. Izina lyakwe a Yawe, zangangini apa cinso cakwe!

⁵ Leza, wiyo akaikala umwi sano lyakwe ilyamuzilo, ali wino akasunga ana asyale, nu kuvwangila yamukamfwilwa.

⁶ Aliwe akalanga umwenyi apakwikala. Akasapula anyepwe nu kuyatwala ukwa ku yikalila aeneco. Lelo yacisanguka yene yamaikalanga umu mpanga iyumalale.

⁷ Leza lino wapisile na antu yako umu lwanga, lino wayatungulwile,

⁸ impanga yatensile ni yulu nalyo lyatelengine, apa cinso cako kwene we Leza, we kateeka waku Sinai. Apa cinso cako kwene we Leza wakwe Izlaeli.

⁹ We Leza awewe watonyizye imvula iingi, nu kuvundikila impanga yako iyalanga yafumuka.

¹⁰ Ali muno antu yako yikazile mwenemo, wayimula ni vintu vino wayateyanyizizye, antu yako alanda.

¹¹ Yawe wakonkomizye na ana yakwe, inkombe zyakusalanganya amazwi iziti,

¹² “Ala yamwene ni vita vyao yatiyapuuka!” Yamangu asiile umu misumba ali yano yankanyanga ivisampwe.

¹³ Lelo yakuloleka kwati inkunda zino yengelelako siluva zizyo zino amapa yakuyengesa wakwe zaabu, umwengululwe usaka sana. (Uzye icani cino anji yamwi nalyo kwene ale yasile yayizi mu vitata vya mfwele?)

¹⁴ Nga lino Umweneco wamaka yonsi wapusizye yamwene, yasansantika, nga cali kwati akungwi uwaponile pali Zalimoni.

¹⁵ Umwamba wa Basyani umwamba ukankala. Umwamba wa Basyani umwamba umwi utali!

¹⁶ Icani fwandi cino intonje zyako zingazyulukila umwamba uo? Umwamba uno Leza umweneco waisolwela ukuti angaikala penepo! Ali pano Yawe umweneco amaikalanga pee na pee!

¹⁷ Yawe wafumile uku Sinai na maceleta amazimbi na mazimbi, ukwiza mu mucifulo camuzilo, icicindame.

¹⁸ Akwela na papelapela apasamuke, ala asenzile na azya yano yalemile. Ala akupokelela ivya mawila uku antu yauze kumwi na yacisanguka kwene. Fwandi papo kwene, apano Yawe amaikalanga amanda yonsi.

¹⁹ Mwalumbanya Yawe katuula witu, wino akatupokela ivisendo vitu cila wanda.

²⁰ Leza witu, a Leza akatutuula. Ukufuma kuli Yawe Simwandalali ali kuno ufyusi witu ukafuma.

²¹ Icumi cumi Leza akafwamfwanta imitwe ya anisi yakwe yayo aya ni zunya lyakuncita iviipe.

²² Yawe wavwanga wati, “Nemo ndayaswilizya uku Basyani, ndayaswilizya uku matenga ya muli yemba,

²³ Pakuti namwe muce mwatangana umu wazi wa anisi inu, na yasimbwa inu yace yakampa nu wazi wao pano yatemilwe.”

²⁴ Leza, ala yonsi pyu yakuilolela kuno ukupita cilumba cilumba, apakuya umwi sano lyako lyamuzilo, we Leza wane na kateeka wane.

²⁵ Yakiimba ya nyimbo yali apa nkolelo na yakalizya ya ngoma nayo yali apacisila. Apakasi apali akazyana yano yakulizya utungoma, yakuti,

²⁶ “Lumbanyani Leza mwe maumba ya antu mwe muno mwatimwiza mukongana. Lumbanyini Yawe, mwe muno mwatuntuka kuli Izlaeli!”

²⁷ Apano yali yakwe Benjamini akaluko kanono, ayano yakolezile nga alino palondelela intunguluzi zya Ayuda, pamwi ni uvi lyao. Nga pali alio napo palondelelela intunguluzi zya ina Zebuluni ni zya ina Nafutali.

²⁸ Leza ale langa amaka yako yano waomvizye apakutupususya.

²⁹ Umu ng'anda yako, iyaya umu Yelusalemu, muno yamwene yakakutulila ivya mawila,

³⁰ ali muno uvwangatile Eguputo, icilyanyi cici icamu matete. Ali muno uvwangatile umutundu, uwaya wa ufyo wakwe yacipambasi pamwi nu twana twa ng'ombe, apakuti yace yasuke yakufukamile yonsi pyu, nu kukutuula yasiluva yao. Pasa imitundu ya antu yayo, atemwa impanzela!

³¹ Inkombe zilafuma uku Eguputo, na ina Kusyi yalakatusya amakasa yao nu kupepa we Leza.

³² Imbilini Leza inyimbo, mwemwe mwensi mwe yakateeka ya pano nsi. Imbini nyimbo zyakulumbanya Umwene,

³³ wiyo akapita umwiyulu, nalyo iyulu ilyampiti na mpiti, wiyo akapongomoka ni zwi ilya maka.

³⁴ Lumbilizini amaka yakwe Leza, wiyo uwateeka aina Izlaeli, wiyo uwakwatila amaka yakwe nu mwiyulu.

³⁵ Iye mwe! Icumi we Leza walinga ukukukwatila icoopo umwi sano lyako ilyamuzilo. Icacumi Leza wa ina Izlaeli, akapeela amaka nu kukomya antu yakwe! Endita! Kulumbwe we Leza!