Masamu 61 - Amazwi Yakwe Leza 2013

Ipepo lyakulenga ukucingililwa

¹ We Leza, uvwa kuno nkulaizya, kutika ukwi pepo lyane!

² Nemo napelelwa, kunondi nu kumwitu kwatalimpa, awewe sile nalaizya! Ntwale sile kumwitu ukwakuti ningikalilila.

³ Pano awewe sile ukantuula, wewe uli maka yane yano yakancingilila nu ku anisi.

⁴ Leka fwandi inaikalilila umu ng'anda umwako pe na pee, leka sile nauwa umu maapa yako.

⁵ We Leza, ala ivilayo vyane watuvyuvwa, nupya watumpela ni vyaupyanyi vyakwe yalya kwene akakucindika.

⁶ Sungala ulundile kweneko umusambazi wa muno nsi imyaka nayuze iingi, uleke alengele.

⁷ Sungala uleke ateeka amanda pe pa manso yako we Leza. Uwalukumuwakilila ni citemwiko cako icamuntaputuka na ucisinka wako.

⁸ Ali cino fwandi, nemo namakwimbililanga inyimbo zyakukuwanzya pee na pee. Alino namafikilizyanga ni vilayo vyane amanda yonsi ndi muno nakulaile.