Masamu 59 - Amazwi Yakwe Leza 2013

Ipepo lyakucingililwa

¹ Leza wane, ntuule ku anisi yane, uncingiilile kuli yayo akulonda yamvwangatile!

² Ntulanye uku antu yaa aipe. Ntuuleko kuli yacikoma yaa!

³ Silola! Ayayo yatiyanteyamila. Antu ya lukang'ansi yatiyantenga. Asi mulandu wakuti nani natinifya, nanti ukuluvyanya penepo cimwi, awe.

⁴ Ayayo yakwiza ulwilo yaiteinye, asi pamulandu wakuti nene ninduvyanya cimwi Mwene, awe cumi kusi nanti cimwi.

⁵ Katuka sile we Yawe Leza Wamaka yonsi, wize untuuleko. Si ilolele wenga na manso yako we Leza wa ina Izlaeli! Si zyuka pakuti ufulule ya mwizilila yaa. Utezya uyayele uluse nanti panono yacisanguka ya antu.

⁶ Amanguzi yaya weluluka umu musumba, yakung'anza sile wakwe yasimbwa nu kufyatoka.

⁷ Kutika uuvwe vino yakuwata! Indimi umu tunwa twao zyakalipa wa malupanga. Yene yakuti sile, “Ale, nga amatuvwa aweni?”

⁸ Lelo wemo we Yawe, ukuyaseka sile, ukasyenteka imitundu ya antu yonsi!

⁹ Wewe uli maka yane, wewe ukancingilila, we Leza, awewe nkazina kunuli.

¹⁰ We Leza wane, we muno wantemwisya, umaiza kunondi. Umaiza uleke kuti indole kuno anisi yane yakucimba.

¹¹ We Leza, inkuti utayakoma, pano limwi antu yane yangiza yilile. Yapase sile, yasaate uku maka yako, alino yaponge, uyalovye. We Mwene, we kavwangila witu?

¹² Iviipe vyaya sile apa tunwa twao, ukulanda sile iviipe, yene lili lyasi lyao. Leka fwandi icilumba cao ciyalye! Pano yene yaya ni ntipu nu ufi apapela.

¹³ Yonone uyi uyi, uyalovye pyu pyu pyu! Alino lyene antu yonsi yalamanya ndi vino wewe Leza akateeka Izlaeli, nu kuti fwandi uteko wako walimba insi yonsi!

¹⁴ Amanguzi nga yaweluluka umu musumba, yakung'anza sile wakwe yasimbwa, nu kufyatoka.

¹⁵ Yakululumba sile muno yakulondelezya ivyakulya, nu kuinong'onya ndi cakuti vyacepa,

¹⁶ lelo nemo, namaimbililanga amaka yako akatondo konsi, namatolokanga apa kwimbila uluse lwako ulwa muntaputuka. Awewe nemo namapusukilanga kweneko. Nkaazina kunuli amanda ya mpelelekezyo yane.

¹⁷ Namakuwanzyanga wewe, we maka yane, awewe Leza wino nkazina kweneko, we Leza wemuno wantemwisya.