Masamu 55 - Amazwi Yakwe Leza 2013

Davidi walenga Leza kuti amwazwe

¹ Uvwa ukwi pepo lyane we Leza, utasuula navino nemo nkukupapata!

² Sumbako amano nu kuvwa unguvwe, pano ivikuncuzya ivintonsya.

³ Nemo nkuzakaza uku ntete, pamulandu ni ngofyo zya anisi yane. Alino nu kunzyuluka kuno aipe yakunzyuluka. Ali yano yakundetela amalanda. Yansokela nu kumpata yampata.

⁴ Mwenzo wane pasi pantete, ni ngofyo zya mfwa zyatizintembola.

⁵ Intete zyatizindema, nu kuzakaza nkuzakaza wakwe cimwi nimfwa sile icipafi.

⁶ Ali cino fwandi inkuti, “Iye mwe! Inkwata amapa wa nkunda, ningapapuka inje kumwi ukwakupuzila.

⁷ Ningavwintukiila ukutali, inkikale umu mapoli.

⁸ Ningapapuka umupelapela, inje kumwi ukwakuwila apakupusuka uku cimuza ciipe ni cipunga.”

⁹ Siyonone we Yawe, vulunganya nu lulimi lwao. Pano nemo umu musumba muu, nkulola sile ulukang'ansi ni mpanzela.

¹⁰ Umusanya nu usiku nkulola sile kuno yakuzeuluka apapela yi linga. Yakuzinguluka umusumba icakuti umu musumba onsi muli sile ukankomanya ni vimvulunganya.

¹¹ Muli sile uononyi mpanga yonsi, nu mu miseo monsi namo muli sile ukutintana nu ucenjezi.

¹² Nga cali icakuti umwanisi awino akuncuzya, nemo ntangasakamala foo. Nanti nga cali icakuti awenga pali yano twapusana awino akuitutumula kunondi ningafisama sile.

¹³ Nga lelo akuno wewe kwene we munji, we cuza wane nupya wino twatemwana, we muno wakama na manzi!

¹⁴ Nemo tuvwana mpiti nawe nu kuvwangila pamwi, nu kuliila apali ponga ni uvi lya antu uku ng'anda yakwe Leza.

¹⁵ Awe nce, imfwa sile kile ize icilukizye zuwa anisi yane. Kayale yatelemukile sile atuntulu uku cifulo ca afwe! Ee cumi, pano uyi auno wazula umu mang'anda yao nu mu myenzo yao.

¹⁶ Lelo nemo, a Leza sile awino nkulaizya nati, “Ntulwe!” Nupya umwene awino amampususyanga.

¹⁷ Ukuilizyanya nu kuteta kwane kukauvwika kunoli katondotondo, umusanya nu usiku. Nu kuvwa wene akauvwa izwi lyane.

¹⁸ Amambwezezyanga umutende ukumusika uno nkalwisya, pano kwene yano yankatukila, anyanya!

¹⁹ Leza aliwe wikala apa cilimba ca wene ukutandikila sile uku mpiti, aliwe amanguvwanga nu kuleka ncimvye. Yene yatange yalole nanti cimwi cino yangacita penepo pano yataya ni coopo kuli Leza.

²⁰ Wiyo uwali umunji mpiti, aliwe akaimilila yacuza yakwe, nu konona vino walanga yapangana nayo.

²¹ Amazwi yakwe, yali sile asuma, lelo umu mwenzo wakwe mwene ulupato sile ali luno lwali mwenemo. Amazwi yakwe yuvwikanga atambalale fwandi mbali yali anyoleke wa lupanga.

²² Uwatuula masakamiko yako kuli Yawe, nawe amakuwakanga. Wene asitazyela umuntu musuma ukuti yamutonsye foo.

²³ Yakazwisya ya wazi na yayo aundyondyo apa lulimi, yene we Leza ulayasumbila umu ciwina icizike, icaula impela, lino yatacili yafike pakasi ka manda yao akwikala pano nsi. Lelo kwene nemo panondi pano, namatailanga muli wewe.