Masamu 46 - Amazwi Yakwe Leza 2013

Ulwimbo lwakulanga ukuti Leza waya naswe

¹ A Leza ali wino swemo tukazina munoli. Nupya ali wino akatupeela na maka, akatwazwa lyonsi sile lino tukaya umu ucuzi.

² Ali cino fwandi, insi nanti ingatengana, swemo tutangetoope, nanti sile imyamba ingakunkulukila umu maziya yakwe yemba,

³ nanti sile yayemba yangakatusya amayimbi, ni myamba nayo yatenta ukali ukali, tutangetoope foo.

⁴ Kwaya uluzi lumwi ulukazanzya umusumba wakwe Leza, incende yamuzilo muno Leza Wapapelapela umweneco wikalamo.

⁵ Leza akaikala umu musumba uo uno utalatala uwe, pano wene kumacaca, ala wataiza ku kuucingilila.

⁶ Antu ya mitundu yuze, yene yakaizakazila sile, yamwene yamwenemo nayo kwene yakaizakazila sile. Leza nga wauza nu musili iwaimokokela sile.

⁷ Icacumi swemo twaya na Leza Wamaka yonsi. Leza wakwe Yakobo ali cele litu!

⁸ Izini, mwize muilolele vino Yawe wacita! Izini mulole ivyakuzunguka vino wacita pano nsi!

⁹ Wene akalesya inkondo pano nsi yonsi. Akakontola amalapwa, avunola masumo nu kusumbila visyangu apa moto mpaka ivipya!

¹⁰ Akavwanga ati, “Tiini ukulwa, mumanye ndi vino nene Leza umukulu pa mitundu yonsi pyu, nu mukulu pano nsi yonsi!”

¹¹ Leza Wamaka yonsi waya naswe, Leza wakwe Yakobo ali cele litu!