Masamu 44 - Amazwi Yakwe Leza 2013

Ipepo lyakulenga ukucingililwa

¹ We Leza swemo twayuvwilile swenga na matwi itu, ivikolwe ali vino vyatulandile apa vintu vikulu vino wacisile umu nsita yao, umu manda yampiti.

² Vino wazinzile imitundu yuze ya antu nu kulasika antu yako mu mpanga yao kwene. Wemo wavunukanga imitundu yuze ya antu, nu kuleka antu yako yasanduluke.

³ Visi vyanzo vyao foo, kuno yacimvizye impanga. Nanti asi uku vyanzo vyao foo, kuno yapokile impanga. Lelo uku maka yako nu ku kukalala kwako sile. Pano lyonsi sile wayanga nayo, nu kuyatemwa wayatemilwe.

⁴ Wemo wewe musambazi wane na Leza wane, wewe ukalenga ukuti antu yako yacimvye.

⁵ Uku maka yako, akuno tukacimvizya anisi itu. Nupya apamulandu wakuti waya naswe ali cino twacimvizyanga na wensi wiyo uwatukatukilanga.

⁶ Nemo asi ulapwa wane uwampamya foo. Nanti sile ulupanga lwane, asi aluno lukantulanya foo.

⁷ Awewe sile wenga mpo, ukatupususya uku anisi itu. Awewe sile wenga we muno ukacimvya yano yatupata.

⁸ Tumakuwanzyanga we Leza, nu kukutaizya pe na pe.

⁹ Lelo kwene pali ndakai, awe cumi Leza watututazyela. Watuleka ukuti yatucimvya, watuta nu kupita pamwi ni vita vitu.

¹⁰ Lyene watuleka nu kuti twapuka anisi itu, lyene yakuzanza ni vyuma vitu.

¹¹ Watuleka lyene yatukomola wa mfwele, lyene twatitusalanganila nu mu mpanga zyuze.

¹² Watutukazya swe antu yako apa mutengo unono ukwaula umuzano nanti umwi.

¹³ Ainipamba nga yalola vino watucitila lyene pasi pakutusoweka.

¹⁴ Watuleka imitundu yuze yaama umutundu witu ni mitumfyo, yakukunta sile imitwe pakutusuula.

¹⁵ Lyonsi sile nemo nkuvwa insonyi, apa manso yane pasi pakuvundalila,

¹⁶ apamulandu wakuvwa ivimazwi vya muzewanya ni ntusi izikatukana anisi yane na antu atupata.

¹⁷ Vyonsi vivyo ali vino vyatucitikila nanti angala swemo tutakwilila we Leza, nanti ukonona upangano uno wapangana naswe.

¹⁸ Swemo tutakusangukila foo, nanti ukutalamila amasunde yako foo.

¹⁹ Lelo wemo watutusumba sile, twatitwikala umu mapoli umwikala ivilyanyi. Watusumba umu kanda umufitisye wakwe cimwi.

²⁰ Itukana uku kupepa we Leza witu, itwapepa tumaleza twankandawa, utuluwi

²¹ ngano wamanya mpiti. Pano inkama zyonsi izyaya umu myenzo ya antu, wemo wazimanya.

²² We Leza ala apamulandu sile wakwe wewe, ali pano swemo yakatukomolela insita zyonsi, nu kutucita wa mfwele zino yakutwala uku kufyula.

²³ Sizyuka, we Yawe! Icani fwandi cino walalila utulo? Katuka! Utatutazyela.

²⁴ Icani cino ukufisama kunotuli? Utailila amacuzi itu nu ku malanda itu!

²⁵ Yati yatufwantola pansi, iyatucimvya, tulambalile umu lukungu.

²⁶ Katuka utwazwe! Tupususye pano uluse lwako ulwa pee.