Masamu 32 - Amazwi Yakwe Leza 2013

Ukuzenzuka nu kwelelwa amaifyo

¹ Wasyuka umuntu wiyo wino amaifyo yakwe yafumiziwa, wino inkota zyakwe zyelelwa.

² Wasyuka umuntu wino Yawe asizanamo uyi munoli, wiyo atakwata intumpu mu mwenzo wakwe.

³ Lino nakutumalanga, nu kukana zenzuka amaifyo yane, mu nteo zyane mwayanga umutembokele, apamulandu wakuteta usiku nu musanya.

⁴ Umusanya nu usiku wemo wankalipilanga, nu ku mwenzo wane ikusuka ikuma wa nsawa zya cisanya.

⁵ Ali vino nasuka nakulongwela amaifyo yane, ukwaula ukukufisa nanti lyonga. Navwanga nati, “Kanje kuli Yawe nkailongwele amaifyo yane,” nawe fwandi ali pa kunjela uluse uku viipe vyane vyonsi.

⁶ Ali cino fwandi wiyo wensi akakutontelela, amakulenganga lilyo lyonsi lino waya umu ulanda. Nanti mulamba wacitalawe angiza uli, wene atange afike kunoyali.

⁷ Awewe uli cele lyane, awewe ukancingilila umu ntazi. Nemo awewe nkaimbila inyimbo zya ufyusi, pano ukancingilila.

⁸ Yawe wati, “Namakusambilizyanga nu kukulanga inzila mwakupita. Namakuwakanga nu kukupanda mano.

⁹ Utezya ukuya wakwe punda, nanti nyumbu iyo ino itakwata amano. Yene suka sile iyaifyantika icela umu kanwa nga nu mukowa, ali pakuyela nu kutontelela.”

¹⁰ Umwipe akaponelwa na macuzi aingi. Lelo wiyo uwataila umu Mwene, wene alacingililwa nu kutemwa kwakwe ukwa pe.

¹¹ Mwasansamuka mwensi mwe yakacita yaololoke, apamulandu navino Yawe wacita! Mwensi mwe muno mukamuzumila pundini ni nsansa, umilini utupundu!