Masamu 28 - Amazwi Yakwe Leza 2013

Ipepo lyakulenga uwazwilizyo

¹ We Yawe Leza awewe nakulilila, we cele lyane. Teya amatwi kunondi, utanziya, pano limwi ningalingana na aku malindi.

² Uvwe izwi lyane kuno likukupapata, inkukulaizya we mwene, nkukatusya na makasa yane uku Ncende Yamuzilo kuluta.

³ Utankululula nu kunsendenkanya pamwi na aipe, yakaleta tweo. Yene yakalanda ivya longo uku yauze, lelo ala umu myenzo yao muli ulupato.

⁴ Ungala uyalinganye pali vino yakacita we Mwene, apa uyi wao uno yakacita. Uyalinganye pa vicitwa vya minwe yao, apa kulipa pali vino yakaomba.

⁵ Yene yasi sumba na mano yao ku vicitwa vyakwe Yawe, uku milimo ya makasa yakwe. Fwandi, Umwene ace ayaongolole, lelo ataca aezya nupya uku yakuula.

⁶ Lumbanyini Yawe, pano wene watauvwa ukwizwi lyakulenga kwane.

⁷ Yawe ali maka yane ni cisyangu cane, munoli ali muno umwenzo wane wataila. Wangazwa, nu mwili wane watiuzanga, ali cino nkumutaizya uku mwenzo wane onsi.

⁸ Yawe ali nzyansyo ya antu yakwe, ilinga lino asololwe yakwe yakapusukila mwenemo.

⁹ Tuula antu yako, polelela umutundu wako. Uwa yatungulula nu kuyasunsa pa maye lyonsi.