Masamu 21 - Amazwi Yakwe Leza 2013

Ipepo lyakulumbanya Yawe apakucimvya

¹ We Yawe, ala umwene watasansamuka, pano wemo wamupeela amaka ya kucimvya. Wene akuzanga pano wemo wamupeela ucimvyo.

² Wemo wamupiile ivyalondanga umwenzo wakwe. Utamwimile vino akanwa kakwe kalenzile.

³ Icumi cumi wamupolelile apakalamba wakwe cimwi. Nu kumuzwika uku mutwe icilongwe cakwe zaabu muswefiwe.

⁴ Wene walenzile uumi, nga nawe wamupeela. Wemo watantalizya na manda yakwe umuyayaya.

⁵ Ululumbi lwakwe lwayako apamulandu wakwe wewe. Wamupeela ukulumbuka nu usambazi.

⁶ Icacumi wamupolelile upolelelo wakuyelelela. Wamupeela ni nsansa izyakuya apa cinso cako.

⁷ Pano umwene wataila muli Yawe. Nga pamulandu wakutemwa ukwamuntaputuka kwakwe Yawe wene atange atente foo.

⁸ Ali cino umwene alanyata anisi yakwe, alavwangatila yayo yonsi amupata.

⁹ Nga waca waloleka sile, alayonona wa cininkwa camoto. Yawe alayalovya uku ukali wakwe, nu moto nao ulayamalilila.

¹⁰ Amu mupanda wao nayo kwene ulayonona pano nsi, nu kulovya ana yao.

¹¹ Nanti yangezya ukukupangila iviipe, nu kuteyanya amapange aipe ali yonsi, yalaposiwa sile.

¹² Pano wemo ulayazinganya, umu kuyalasola inceto zyako mpaka yutuke.

¹³ Twakulumbanya we Yawe, katuka na maka yako! Tulaimba nu kulumbanya amaka yako.