Masamu 18 - Amazwi Yakwe Leza 2013

Lwimbo lwakwe Davidi lwa kucimvya

¹ Ulwimbo luu, ulwakwe Davidi luno wimbilile Yawe apa kumupususya umu minwe yakwe Saulo na anisi yakwe yonsi.

² Yawe cili ciliwe cane, nupya lili linga lyane na katuula wane. Wene ali Leza wane, nupya ciliwe cane cino nkaya uku kuzina mwenemo.

³ Nkalaizya kuli Yawe, wiyo uwalinga ukulumbanya, nga nawe akantuula ku anisi yane.

⁴ Uzanzo wa kufwa wanzingulwike monsi monsi, na maimbi akome yapisile apapela pali nene.

⁵ Uzanzo wa kufwa wati umpombelekezya, nga ni nkose zya mfwa izilungatana nani.

⁶ Alino umu ulanda wane nalaizye Yawe. Napefile kuli Leza wane kuti angavwe. Wene umu Ng'anda yakwe ikulu, amauvwa izwi lyane. Inkuta zyane nazyo zyuvwika uku matwi yakwe.

⁷ Lyene insi ali pakusunkana nu kutenta. Amasinte ya myamba pasi pakutelengana apamulandu nu kali wakwe Leza.

⁸ Umu mpuno zyakwe imwasuka ni cunsi, mukanwa kakwe namo imufuma icimbilimbili ca moto, icikaisye icinyesula nu munyeswa.

⁹ Atembeleka iyulu pansi nga aika, ala ni kumbi lifitulukile lili apisika ya ngazo zyakwe.

¹⁰ Alino aya aikala pali yakelubi nga apapuka. Avwelukila zuwazuwa apa mapa ya muza.

¹¹ Acita imfinzi wa cintu cakuivimbilikizya mwenemo, amakumbi atikame amvula nayo ayasangula ica kuifupilizya mwenemo.

¹² Mu luswepo luyengese ulwali inkolelo yakwe, musaatika insase zya moto ni mvula ya citalawe ala vikufyontomoka ukufuma umu makumbi atifi yaya.

¹³ Yawe wapangalansya ukufuma umwiyulu. Izwi lyakwe Leza Wapapelapela ilyuvwika ukufuma mwenemo.

¹⁴ Wafika inceto zyakwe nu kusalanganya anisi yakwe. Wayapuusya umu kupantoka kwa nkuwa.

¹⁵ Apansi yakwe yemba paloleka, ni mifula ya nsi nayo yasyala apambiliwili, lilyo lino Yawe wavwanga ivyakoofya, wafumya nu mupu mu mpuno zyakwe.

¹⁶ Yawe akonzolola ikasa lyakwe ukufuma umwiyulu nu kundema, alino amfumya umu manzi azike.

¹⁷ Wene wankulwile uku anisi yane amaka, kuli yayo yano yakandwisya, yano yanduta amaka.

¹⁸ Anisi yayo yankatukile uwanda uno nazanzilwe, lino nali umu ntazi, lelo Yawe wampokolwile.

¹⁹ Watamfumya nu kunjika apawatuke, wene wankulula pamulandu wakuti akazangila munondi.

²⁰ Yawe wancitila ukulingana ni milimo yane isuma. Wene watandambula pano nene wakaele.

²¹ Nkawaka amasunde yakwe Yawe, nupya nsicita iviipe nu kufuntuka kuli Leza wane.

²² Nemo nkalondela amasunde yakwe yonsi, nupya ntatala nafutatila amalamulo yakwe.

²³ Ntakwata mulandu kunoli, nu kuisunga inkaisunga uku viipe.

²⁴ Ali cino fwandi Yawe watandambula ukulingana ni milimo yane isuma, namuno walolela ukuti insi nu mulandu.

²⁵ Yawe uwacumi ku antu acumi, wene akailanga ukuya uwacumi kuli yayo akaele.

²⁶ Uku antu aswepe imyenzo ukailanga ukuya umuswepe umwenzo. Lelo uku antu aipe myenzo, wemo ukailanga ukuti usi cuza wao.

²⁷ Wemo ukatuula antu aicefya, lelo acilumba yene ukayacefya.

²⁸ We Yawe, awewe ukakozya uluswepo lwa umi wane. Leza wane we muno ukankozezya umu kanda.

²⁹ Lilyo lino wemo wangazwa inkaomola amalinga nu kuzanza anisi yane. Lilyo lino Leza wangazwa ningacimvya anisi yane.

³⁰ Inzila zyakwe Leza witu izifumaluke, mu mazwi yakwe Yawe mutaya ulema. Wene ali cisyangu icikacingilila yonsi akazina munoli.

³¹ Ale lelo Leza namuze ali kwi? Suka sile Yawe wenga mpo ali ciliwe cane? Suka sile Leza witu.

³² Leza wi aliwe akampeelesya amaka, nu kuleka inzila zyane ukuya izyakaele.

³³ Akapepusya ingazo zyane, izyangupala ungati izya nswela iyakaci. Akanteeka apasanzuke, pakuti ntapona.

³⁴ Akansambilizya ivyakulwa inkondo. Walanga na makasa yane ivyakufyambata ulapwa wa cela.

³⁵ Wemo wampeela ni cisyangu ica kumpususya. Ikasa lyako, ilyakwe ndilo lyancindamika, na amaka yako yambwaka.

³⁶ Wasalalika inzila umwakulyata ingazo zyane, kuti nazyo zitapumba inzila.

³⁷ Nkazinganya anisi yane suka injazana. Insiwela sile suka natala nayalovya.

³⁸ Nkayakomola mpaka iyaposiwa nu kukatuka. Nkayafwanta pansi injalyatola.

³⁹ Wemo wampeela amaka yakulwa inkondo, nu kuncimvizya anisi yane.

⁴⁰ Ukapusya anisi yane kuti yanguntuke, nupya ukalovya yayo ampata.

⁴¹ Nanti yangapunda ukutuulwa, lelo kutange kuye uwakuyatuula. Yangapunda Yawe, lelo atange ayaasuke foo.

⁴² Nayavungola wa lukungu ulukauluka nu muza. Nga njalyatola wivu lya mu museo.

⁴³ Wemo wankulula uku antu akandwisya, nu kuncita kateeka wa antu amu nko zyonsi. Antu yano ntatazile imanya ali yano yakantumikila.

⁴⁴ Lilyo kwene lino yuvwa izwi lyane, yanjela, ainamasi yakaiza kunondi nu kumfukamila.

⁴⁵ Awe lyene ainamasi yatiyatovoka, yakuzakaza sile apa kufuma umu misumba yao ya malinga.

⁴⁶ Yawe umumi. Lumbanyini Ciliwe cane! Landini ukulu wakwe Leza wino akantuula.

⁴⁷ Wene ali Leza kalandwila wane, uwalenga ni mitundu kuti icimbe nu kuntontelela.

⁴⁸ Aliwe uwampususya uku anisi yane. Aliwe wantumpula apapela pali yayo akandwisya. Nu kunkulula uku muntu wa lukang'ansi.

⁴⁹ Ali cino fwandi namakuwanzyanga we Yawe, pakasi ka antu amu nko zyuze, nu kwimbilila inyimbo zyakulumbanya izina lyako.

⁵⁰ Leza akapeela ucimvyo ukulu ku mwene wakwe, wene akalanga kutemwa kwa pe ku musololwe wakwe, kuli Davidi na amu mupanda wakwe umuyayaya.