Masamu 17 - Amazwi Yakwe Leza 2013

Ipepo lya muntu uwakaele

¹ We Yawe, uvwa ukulenga kwane ukufumaluke, kutika uku kuilizyanya kwane. Sumba amano uku kupapata kwane kuno ku kufuma uku kanwa ka cumi.

² Wewe ulamvwangila umulandu nu kumpokolola, awewe amanso yako yakalola ivyampomvu.

³ Nanti angala wemo wasakaula umu mwenzo wane, nupya wiza wampima usiku, wanjezya umu musango uli onsi, lelo pasi nanti umulandu umwi uno wazana. Nemo nsilanda iviipe.

⁴ Nkawaka amazwi akafuma uku kanwa kako. Nemo nsilanda iviipe foo, ndi vino antu yauze yakalanda. Nsilondela imisango ya antu ya lukang'ansi.

⁵ Nemo nkalondela umu nzila zyako kwaula ukunenuka, pano limwi ingazo zyane zingasyelemuka.

⁶ Apanondi inkukulaizya. Njasuke we Leza. Uteye na matwi kunondi, uuvwe amazwi yane.

⁷ Langa ukutemwa kwako ukwa kuzunguka, we muno ukapususya yayo akasimwilila kunuli ukufuma uku anisi yako.

⁸ Unsunge wakwe vino ungacingilila nyinalinso uwi linso lyako, umfise mu cisao ca mapa yako,

⁹ ku antu aipe yano yanzunya, ukufuma ku vipondo ivyati vindizizya.

¹⁰ Yene yatakweti nu luse foo, nu kuvwanga yakuvwangila itolo.

¹¹ Yiza yancilikizya monsi monsi, nupya yandizizya nu kuntunwila amanso kuti yamfwante pansi.

¹² Yali wakwe yacisama yano yakulonda ukundema yandepole. Yali wa twana twakwe cisama utwati tuteyamila apafisame.

¹³ Katuka, we Yawe, ulungatane nayo nu kuyacimvya! Ntuule uku mwipe nu lupanga lwako.

¹⁴ We Yawe, ntuule uku antu yayo yano umu umi wao wa muno nsi yakwata vino yakalonda vyonsi. Yapini ucuzi wacipezya mano, uno wayateyanyizizya nu ku izikulu yao kwene!

¹⁵ Lelo nemo umu ulungami wane, ndiza nkulole. Lino ndakatuka ndiza ndole icata cako, nupya ndaya nu luzango wakwe cimwi.