Masamu 149 - Amazwi Yakwe Leza 2013

Ulwimbo lwa kulumbanya Yawe

¹ Lumbanyini Yawe! Imbilini Yawe ulwimbo lupya! Mulumbanyini mu ukongano wa antu yakwe acumi!

² Izlaeli kazangile muli wiyo uwa muumvile. Antu amu Zioni kayazangile umu Mwene wao.

³ Kayapekula apa kulumbanya Yawe, yamulizizye utungoma na mazeze.

⁴ Pano Yawe akazangila mu antu yakwe, aliwe akayacindamika, pakuyapeela ucimvyo.

⁵ Ka antu yakwe Leza yazange mu ucimvyo uu, yaimbila nu tupundu usiku onsi.

⁶ Kayale yalemasye yapundisye apa kulumbanya Leza, ala yali ni mpanga izinyolwe konsi konsi.

⁷ Ali pakuti yakailandwile aeneco uku inamasi, nu kuvunuka antu ya mitundu yuze.

⁸ Ukunyepa yamwene yao umu minyololo, ni ntunguluzi zyao umu nsimbi zya vyela.

⁹ Ali pakuyavunuka ndi muno Leza wapelile ilamulo. Kuko ali kucindama kuno Leza wacitila antu yakwe! Lumbanyini Yawe!