Masamu 144 - Amazwi Yakwe Leza 2013

Ntaizyo apa kucimvya

¹ Kalumbanyiwe Yawe, Ciliwe cane! Wasambilizya iminwe yane ukumanya ukulwa, nu kulanga iminwe yane ivya ulwi.

² We luse lwa citemwiko cane ni linga lyane, we cele lyane na katuula wane, we cisyangu cane, we muno nataila, wemuno nkacimvizya imitundu.

³ We Yawe, ngu muntu fwandi uwacani wakuti uwamwiusya? Umwana wa muntu, icani fwandi cino ungamusakamalila?

⁴ Umuntu akoline sile nu mupu, nga na manda yakwe icili conga sile ni cinzingwa icikapita.

⁵ Tembeleka amakumbi yako, we Yawe, nga uwikile. Kumya imyamba, apakuti nayo ifumye icunsi.

⁶ Myantula inkuwa zyako usalanganye anisi. Sumba inceto zyako nu kuyazinganya.

⁷ Tambika ikasa lyako ukwiyulu, ungazwe, umpususye uku manzi azike, nu ku makasa ya inamasi.

⁸ Yayo akavwanga ivya uwelewele, ni lunji lyao alino yakalapila ufi.

⁹ We Leza namakwimbila ulwimbo lupya, namakulumbanya umwi zeze ilya nsale ikumi.

¹⁰ Awewe ukalenga ukuti yamwene yacimvye, nu kukulula umomvi wako Davidi.

¹¹ Umpususye nu kuntuula uku minwe ya anisi yane akalale, ntuule uku maka ya inamasi, yayo asitala yavwanga ivya cumi nupya yakalapa ivya ufi.

¹² Ana itu yakalume kayale yakula sile wa miti, ukutandikila sile uku wance wao. Nana itu yakaci nayo kayale yaye sile wa ncesi izya kulutwe lwa viwazwa vya kwi sano.

¹³ Inkoma zitu nazyo, kazizuule ni vilyo vya misango ili yonsi. Imfwele zitu nazyo kazivyalane amazimbi na mazimbi umu vyalo vitu.

¹⁴ Iviteekwa vitu kaviine nu kusandana ukwaula uku pulumula nanti ukuponga. Mutezya muvwike impoma nanti imwi umu miseo itu.

¹⁵ Walongo wakwe cimwi umutundu uno wasyukila vyonsi vii. Walongo umutundu uno Leza ali Mwene wauko.