Masamu 143 - Amazwi Yakwe Leza 2013

Ipepo lyakulenga uwazwilizyo

¹ We Yawe, uvwa ipepo lyane! Kutika kuno nkukupapata, unjasuke pano wewe mulungami. Unjasuke pano wewe mufumaluke!

² Utanjika ne muzya wako umu mezyo, pano kutaya nanti wenga apa apuma, uwakaele kunuli.

³ Umwanisi akucuzya umwenzo wane. Watafwanta umi wane pansi. Watampatikizya ukwikala umu mfinzi, ungati ayano yafwa mpiti.

⁴ Umwenzo wane usi namaka, nu munda yane mwati muzula intete.

⁵ Nkwiusya amanda yampiti, nkwelenganya ivicitwa vyako vyonsi, nga nu kwiusya umulimo wa minwe yako.

⁶ Natambika makasa yane kunuli, nkukuluka wa musili uume, uno ukulolela imvula.

⁷ Kalauka unjasuke we Yawe! Umupasi wane watiuongoka, utafisa usyu wako kunondi, pano limwi ningaya wakwe yaya aikala kuzimo.

⁸ Undole uluse luse cila katondo, pano awewe sile nataila. Undangilile inzila umwakupita, pano umwenzo wane waya sile kunuli.

⁹ We Yawe, mpususye uku anisi yane, pano kunuli akuno nkazina.

¹⁰ Unsambilizye ukucita ukulonda kwako, pano wewe uli Leza wane. Uye umusuma kunondi, untungulule umu nzila ilungamane.

¹¹ Unsungilile nje umumi, we Yawe apamulandu ni zina lyako sile. We mololoke, upususye umwenzo wane ku malanda.

¹² Lovya anisi yane uku luse lwako sile, uonone yonsi akancuzya, pano nene muzya wako.