Masamu 118 - Amazwi Yakwe Leza 2013Ipepo lyakutaizya Leza apa kucimvya 1 Taizini Yawe, pano wene umusuma. Ukutemwa kwakwe ukwa manda pe. 2 Aina Izlaeli kayati, “Ukutemwa kwakwe ukwa manda pe.” 3 Amu lupwa lwakwe Aaloni kayale yati, “Ukutemwa kwakwe ukwa manda pe.” 4 Antu akwatila Yawe icoopo kayati, “Ukutemwa kwakwe ukwa manda pe.” 5 Lino nemo nali umu macuzi nalaizye kuli Yawe, nawe anguvwa, antuula kweneko. 6 Nemo twaya pamwi na Yawe ni ntete ntakwata foo. Icani fwandi cino umuntu angancita nene? 7 Nemo Yawe aliwe akangazwa, ndalola nakuno anisi yane yalacimba. 8 Icisuma ukutaila muli Yawe, ukuluta ukwikalila umu muntu. 9 Cazipa penepo ukuzina muli Yawe kuluta ukwikalilila umu muntu umukama. 10 Anisi aingi nemo yanzingulwike, lelo uku maka yakwe Yawe nemo nayalovizye pyu! 11 Walanga yanzinguluka monsi monsi lelo uku maka yakwe Yawe nayalovizye yonsi! 12 Yakunzila wa nzimo, lelo yalunkwime nu kupya zuwazuwa wa moto, ukoca utusala twa myunga, uku maka yakwe Yawe! 13 Yansunkilizyanga na maka apakuti ya mponye, lelo Umwene aliwe wantungilile. 14 Ala nemo Yawe, wino nkaimbila ali maka yane, nupya ali katuula wane! 15 Si uvwini kuko utupundu twa nsansa utwakucimvya, umu nsakwe zya antu yakwe Leza, tukuti, “Eya Umwene Wamaka, uwatacita ci! 16 Umwene Wamaka, aliwe watatucimvizya, ikasa lyakwe Yawe lilunji likacimvya uku maka.” 17 Nemo nsikufwa foo, lelo namaya nu umi, nu kulanda vino Yawe wacita. 18 Nanti angala Yawe watazile wamvunuka, lelo atalesile kuti imfwe foo. 19 Njulilini kweneko impongolo zyamu ncende yamuzilo muleke inje mwenemo nkataizye Yawe! 20 Ikwene ili mpongolo yakwe Yawe, iyakwingilila penepo yayo sile akacita vyaololoke! 21 Ala nemo nkukuwanzya we Yawe, pano ukuntezya, nupya awewe ukampususyako. 22 Iwe lino yakakuula yakanyile lyene lyacisilwe iwe lya pitungi lya ng'anda. Yawe uwacita vii, awe cene catuzungusya cuze. 23 Fwandi vii ali vino Yawe wacita. Iye mwee! Awe cumi twazunguka wakwe cimwi swe yano tukulola! 24 Ukwene uli wanda uno Yawe watupeela, katwasansamukila mwenemo nu kuzanga. 25 We Yawe, sungala ututuule! We Yawe, si leka tuye nu longo. 26 Walongo awiyo wino wiza, wino atumilwe umwi zina lyakwe Yawe! 27 Yawe ali Leza, aliwe watulanga ni vyakucita. Lemini imisambo ya miti umu minwe, tutandike ukumuzengela, twapita ale tukuzinguluka kavuwa kakocelapo impolelwa. 28 Wewe, uli Leza wane acino nakutaizya. Wemo awewe Leza wane, nemo namakulumbilizyanga. 29 Taizini Yawe, pano wene umusuma. Ukutemwa kwakwe ukwa manda pe. |
Mambwe-Lungu Bible © The Bible Society of Zambia, 2013
Bible Society of Zambia