Masamu 104 - Amazwi Yakwe Leza 2013

Ukulumbanya kaumba wa vintu vyonsi

¹ Lumbanya Yawe we mwenzo wane! Iye we Yawe, Leza wane, vino wakwatisya amaka! Wemo wazwala ululumbi nu usambazi.

² Wemo waya mu luswepo. Watangalalika ni yulu wi taalu,

³ Napa manzi ya mwiyulu ali pano wakuula Ng'anda yako. Amakumbi ali yano wacita iceleta lyako. Umu muza ali muno wemo ukapitila.

⁴ Umu muza ali muno inkombe zyako zikapitila nga ni vimbilimbili vya moto ali vino ukaomvya wa yaomvi yako.

⁵ Wasimpisya insi ndi, isi yakutelengana foo.

⁶ Wavimbilikizya insi na yemba ungati icakuvimbala. Amanzi yafika na papela pela apa myamba.

⁷ Lelo lino wakalipile amanzi yaswilile mwenemo, lilyo lino yuvwile vino wavwanzile nayo yaswilile sile ulwilo.

⁸ Yatelemwike imyamba nu kuya umu mikonko, iyalungama na konsi kuno wayateyanyizizye kuti yaye.

⁹ Wayacitile na nande wino yasi nu kucila penepo, apakuti nupya yatakaleke insi iundwe kuli mulamba.

¹⁰ Nga wemo walesile ni ntulo zya manzi zyafukoka umu vifoloma nu kukonkoloka apakasi ka milundu.

¹¹ Inyama zya mpanga ali muno zikamwa, na yacoolwa nayo ali muno yakaputwila ulusala.

¹² Uku miti iyaya umu mbali mbali ya nguzi, ali kuno ivyunyi vikalukila ivinsanzo nu kulila ali kuno vikalilila.

¹³ Ukufuma ukwiyulu ukatuma imvula nu kwiza tonyelela umu myamba, icakuti umu mpanga imufunkuka ivisuma ukufuma uku upolelelo wako.

¹⁴ Alino ukamezya nu mulemvwe uwakulya ing'ombe ni misalu iyakuomvya umuntu, ali pakuti angalima ivyakulya,

¹⁵ nu kusuta waini uwakumusansamusya, aenga na mafuta amu olivi akumuyemvya umwili, nga alino ni cilyo cakumupeela amaka.

¹⁶ Imiti itali, imikelide yaku Lebanoni ikatonyelelwa imvula ivule, imiti iyo ino we Yawe walema we mweneco.

¹⁷ Ali kuno ivyunyi vikalukila ivinsanzo, apa ntonje ntonje. Ali pano na yanamakungwe yakatongama.

¹⁸ Yataala yakaikala umu myamba itali na tupiimbi nato tukafisama umu mazolongela, umu mawe.

¹⁹ Awewe waumba umwezi apakuti antu yapenda insita ni lanzi nalyo likamanya ni nsita yakuwila penepo.

²⁰ Imfinzi awewe ukaileta nga kuya usiku, ni nyama zya mpanga nazyo izitandika ukukatuka.

²¹ Utwana twakwe yacisama nato nga tutandika ukulila ala tukulonda icakulya cino Leza akatupeela.

²² Ilanzi ndi lyatunka, ala twaswilila nu kuya lala umu macele.

²³ Nga alino lyene umuntu nawe akatuka, aya uku ncito zyakwe aomba ukufika na manguzi.

²⁴ We Yawe, wapanga ivintu ivivule! Iye mwe vino wacita na mano! Insi yazula tupu, uku viumbwa vyako ivitupu!

²⁵ Mwaya yemba mukalamba, umukulu nupya umusalale muno umukaikala iviumbwa ivisi vyakupenda, ivikulu nga ni vinono kwene.

²⁶ Umukapita ivyombo vya paluzi nga ni cilyanyi ci Leviatani amuno cikacinila, cico cino waumba.

²⁷ Vivyo vyonsi, awe vikalila wewe, apakuti uwavipeela icakulya uwavilisya insita yonsi.

²⁸ Wemo ukavipeela nga navyo ivilya, ukaviteyanyizizya ivyakulya navyo iviikuta.

²⁹ Ndi cakuti wavifutatila pasi pakuvwa intete. Ndi cakuti watala wavicilikila ukufuta, ala ali mifwile iviswilila nu kulukungu kuno vyafumile.

³⁰ Ndi cakuti waviputilizya umupu, ala vyatandika ukufuta, upuputula ni nsi yonsi cipya cipya.

³¹ Yawe umucindami, kalukuyelelela pee! Yawe kalukuzanga pali vino wacita!

³² Wene akati nga walolekesya pano nsi, awe cumi impanga iyazakaza yonga sile, nga wakumya uku myamba iyasuka sile icunsi.

³³ Nkanaimbila Yawe mu umi wane onsi. Nemo namalumbanyanga Leza wane lino ncili nu umi.

³⁴ Si angala asansamukila mu melenganyo yane yonsi pano aliwe akansansamusya nupya nani nkazangila munoli.

³⁵ Yakaifya kayalowelele muno nsi, patasyala nanti wenga! Lumbanya Yawe we mwenzo wane! Endi lumbanyanga Umwene!