Masamu 102 - Amazwi Yakwe Leza 2013

Ipepo lya muntu ali umu ucuzi

¹ We Yawe, uvwa ukwi pepo lyane, uuvwe nu kulila kwane ungavwe

² Utafisa usyu wako kunondi apa wanda wa kucululuka kwane. Teya ukutwi kunondi kuti unguvwe, ungasuke zuwa-zuwa lino nkukulaizya.

³ Amanda yane yakupita wa cunsi, nu mwili wane ukupya wa moto.

⁴ Natinumilila solokoto wi sote lino yalyatola, nanti insuna ya kulya intakweti.

⁵ Pasi pakutetateta, natinonda nsile mafupa yatupu.

⁶ Indi sile wa cunyi camu lwanga, wakwe sinsimwe umu vitotela.

⁷ Utulo nemo ntange ntulole, naya sile wa cunyi icili conga apipaala,

⁸ Anisi yane yakantukola umusanya onsi. Yayo antasyanga mpiti, Ali yano yatiyasenula izina lyane ulutusi.

⁹ Itwi ilyasyala ali cakulya cane. Vino nkumwa, inkumwela kumwi na minsozi yane.

¹⁰ Pamulandu wa cipyu cako nu ukali wako, nemo wantola nu kumvwintila kuko!

¹¹ Amanda yane yaile yakusila wa cinzingwa, nkufoota sile wi sote.

¹² Lelo kwene we Yawe, awewe ukateeka pee, ni nkulo zyonsi zilakwiusya.

¹³ Katuka fwandi, nduyele Zioni uluse, insita lyene yatifika ino ungamuyelela uluse. Ikwene ili nsita ilingine!

¹⁴ Pano aomvi yako yatemwisya Zioni, nanti angala yamuongolola. Yakamulila nanti angala wasyala ivitalang'anda.

¹⁵ Antu ya mitundu yuze yalaya ni coopo kuli Yawe, na yamwene ya pano nsi yonsi yaloopa ululumbi lwakwe.

¹⁶ Lino alakuula Zioni cipya cipya, nu kulanga amaka yakwe, alauvwa ni ipepo lya antu yakwe,

¹⁷ Lyene alauvwa ni ipepo lya antu yano watazile atazyela, alata nu kusuula ukupapata kwao.

¹⁸ Ivintu vii kavilembwe, apakuti inkulo zyonsi izilalondelela penepo zice zyamanya vino Leza wacisile, ali pakuti ana kuvyalwa nayo yace yamulumbanyako.

¹⁹ Ukwiyulu uku ncende yakwe iyamuzilo, ali kuno wacevezyanga pano nsi,

²⁰ apa kuvwa vino azya yakuteta, na pakutuula yayo yano walanga yapingwilwa ukufwa.

²¹ Ali cino fwandi antu yalalumbilizya Yawe umu Zioni, nu kumuwanzya umu Yelusalemu,

²² lilyo lino antu amitundu yonsi yalakongana pamwi na yamwene yao uku kupepa Yawe Leza capamwi.

²³ We Yawe, nemo wancisile umunyankate lino ncili umwance nu kucefya amanda yane akwikala pano nsi.

²⁴ We Leza utansenda pali ndakai, ntacili nkote! Wemo wewe wa pee!

²⁵ Awewe waumvile insi apa katalili, na makasa yako alio yapanga iyulu.

²⁶ Vyonsi pyu vilononeka, lelo wemo ulayelelela pee. Vyonsi vilalola wa vyakuzwala. Wemo ulavizuula wa vizwalo, nu kulowa ala vyalowelela.

²⁷ Wemo wayela sile mumu kwene muno wayela, ni myaka yako italatala ipelele apambiliwili foo.

²⁸ Ana itu swe yaomvi yako yalasyukila apa kwikalililila ulongo, ni vizikulula vyao awewe ulavisunga pee.