Masamu 10 - Amazwi Yakwe Leza 2013

Ipepo lya kulenga uwazwilizyo

¹ We Yawe, uzye pacani cino uyelile kutali naswe? Uzye pacani cino waifisa apa nsita ino tuli umu ntazi?

² Umwipe akuitutumula nu kucuzya umupina, Si leka yalemye umu lukose luno yateya.

³ Umwipe akuituumika apa lunkumbwa lwakwe, Umupunuke akutuka nu kuzewanya Yawe.

⁴ Umuntu umwipe asisakamala pali Yawe. Pano mu mwenzo wakwe akati, “Leza asi cimwi?”

⁵ Umwipe akaya nu longo muli vyonsi. Wene atangiluka upinguzi wakwe Leza. Yonsi akamulwisya wayasuula.

⁶ Umu mwenzo wakwe akavwanga ati, “Insi wakutenta. Ntalaponelwa ni ntazi.”

⁷ Imvwango zyakwe mwazula ivitipu, intumpu, ni ngofyo. Wene wakalauka ukulanda amazwi ya ukali aipe.

⁸ Akateyamila antu mu matete mu mitanda, akoma nu wakaele mu umfisolo. Akayeyetula umupina uku kumucevya na manso aucenjezi.

⁹ Akayafisamila umu matesi wakwe cisama. Wene akateyamila umupina, alino ndi wamulema mu citeyo cakwe amukwetela ukutali.

¹⁰ Umupina akaivunganya nu kuipetelezya pansi mpaka aiukila watapona uku ulamba wakwe.

¹¹ Umwipe akaelenganya umu mwenzo ati, “Leza atasakamile! Watazyata amanso nga atangatale andole!”

¹² Katuka, we Yawe, uvunuke antu yaya aipe! Iusya yayo akucululuka!

¹³ Uzye pacani cino umwipe angasulila Leza nu kwelenganya umu mwenzo wakwe ati, “Wene atalamvunuka!”

¹⁴ Lelo we Leza ukalola umulanda nu mucuzi akuilizyanya, nga waiteyanya lyonsi ukuyazwilizya. Umupina akaituula kunuli. Wewe uli kazwa wa ana asyale.

¹⁵ Ale fwandi tembola amaka ya muntu mwipe nu mukakasi. Uyavunuke apa viipe vino yacita mpaka yasuke yatelelele.

¹⁶ Yawe ali kateeka wa pee na pee. Yayo akapepa tuleza tuze yalalowa umu mpanga yakwe.

¹⁷ We Yawe, uluvwa amapepo yakwe yao aicefya. Nawe ulayakomelezya.

¹⁸ Ukacitila ana asyale na yao afyengwa ivya ulungi pakuti antu avyalwa umu nsi yatakatale yayofye nupya.