Mapinda 1 - Amazwi Yakwe Leza 2013

Vino tungasambilila mu lupapulo luu

¹ Yaa ali mapinda yakwe Solomoni, umwana wakwe Davidi, umwene wa ina Izlaeli.

² Yaa ali mapinda yano yangazwilizya antu ukusambilila amalango, ukupanziwa amano, nga nu kutezya upiliulo uzike uwaya mwenemo.

³ Alino na pakuti tusambilile ukulondela amano yampomvu, aulungami, ukulungika nga nu ufumacumi.

⁴ Yano atamanya nayo yangalangwa amano, na ance nayo kwene yangasambiliziwa nu kwiluka.

⁵ Lekini antu yamano nayo yalunduluke ukumanya umwalola amapinda ni mvwango zya wile, nga nu kuyalundilako amalango nu kulangilila asambilile intunga yampomvu,

⁶ apakuti yangiluka upiliulo uwafisama umu mapinda, ni ntazi zino antu yamano yakafisa uku auze.

⁷ Ukoopa Yawe ili ntendekelo ya malango. Iviwelewele ivikasuula amano nu kusundwa.

⁸ Mwanane, ala uwasumba amano kuli vino yaso yakukulangizya na vino yanyoko yakukusambilizya.

⁹ Pano amasunde yao yalakuyemvya nu kusenula imiyele yako iye isuma, uce ucindame ungati icisote cawene nanti ciukasi cakuzwala umu nsingo.

¹⁰ Mwanane, yakaifya ndi cakuti yakuzunya utayazumila.

¹¹ Ndi cakuti yati, “Tuye twapita umukuzwisya uwazi, tuteyamile umwi tumukome sile uku mufulo,

¹² silekini tuyamile yacili apuma, ndi vino ilindi likacita, nupya wakwe yao akwikwa umu ciwina.

¹³ Ee, mpaka tulonke ivyuma vya misango yonsi, na mang'anda itu tuzuzyemo ivisampwe!

¹⁴ Leka sile twapita pamwi swensi, apakuti twankane icuma citu.”

¹⁵ Ala mwanane, utacezya ukulondela antu yayo, lelo uwafuntuka umu nzila zyao.

¹⁶ Pano yene yakasimwilila uku kwifya, nu kukalaukila uku kuzwisya uwazi.

¹⁷ Yakaicuzya sile uku kuteya ivyunyi inkose, lino vyene vikulolekesya na kweneko.

¹⁸ Antu amusango uo yakaiteyela sile aeneco kwene ulukose, lulo ululayalya aeneco kwene.

¹⁹ Ilaya ali mpela yakwe yayo akalondelela ivyuma vyalufyengo, ivikaponzya umi wakwe yayo akavikwata.

Amano yatezela cintuvwa

²⁰ Uvwa kuno! Amano yakupunda umu miseo. Yakwangula umu misolo.

²¹ Yakulaizya umu masansa ya miseo nu tuzila, yakukonkosya nu mu milyango ya misumba, nupya yakuma imbila yati,

²² “Mwe mbulwamano mwe! Mulasya umbulamano winu ukufika lilaci? Mulata lilaci ukusuula ne malango? Uzye mulasyalilila awelewele vivyo kwene?

²³ Sumbiniko amano kuli vino namamukonkomezya, namamwitulwila ivyaya muli tompwe wane, nu kumumanyisya vino naya nu kumunena.

²⁴ Apakuzana ukuti namwamile namwe mwakana ukuyela, namusinizyanga namwe mwansuuzile,

²⁵ Mwasuula sile navino namupanzile amano, musisakamala vino nkumunenola.

²⁶ Ali cino fwandi nani ndamuseka sana lino muliza nu kuzakaza uku ntete,

²⁷ Iino intete zilamwizila wa cipupu ni syamo wakwe nkungulupya, na lino amacuzi na masakamiko viliza kuno muli.

²⁸ Ali lino mulangama lelo ntalamwasuka. Mulandondelezya lelo mutalanzana.

²⁹ Mwasuuzile ukwiluka, mutakasi nu kutontelela Yawe.

³⁰ Mwakanyile ukupandwa amano kunondi, mwakanyile nu kukonkomeziwa kwane.

³¹ Ale fwandi mulalya vino mwazombwile mweisikulu umu misango inu nu kwikuta amapange inu mweisikulu.

³² Pano ukupumboka kwa mbulwamano kukayaletela imfwa, nga nu kuzenzemba kwa viwelewele kukayatwala sile ukwilovyo.

³³ Lelo wiyo wensi akatezya kunondi alaya umucingililwe. Alikala cele ukwaula icakumuletela intete.”