Malango 8 - Amazwi Yakwe Leza 2013

Impanga isuma ino ilapelwa ku Ina Izlaeli

¹ “Cenjelini muyele amasunde yonsi yano natimupeela ilelo, pakuti muye nu umi, musande mu mpendwa, nga mupoke nu kwikala mu mpanga ino Yawe walavile ivikolwe vinu.

² Mwaiusya vino Yawe Leza winu wamutungulwile mu lwendo luu lutali nzila yonsi mu lwanga pa myaka iyapita amakumi yani, ala akumutumila intazi kuti amwezye nga alole ndi mumayelanga amalamulo yakwe.

³ Wene wamulesile imupita ni nzala, nga lyene amupeela mana kuti mulye, icakulya cino mwemwe ni vikolwe vinu mutatazile mulye. Wene wacisile cii kuti amusambilizye ukuti umuntu atangaya nu umi pa cakulya citupu, suka api zwi lyonsi ilikafuma pa mulomo wa Mwene.

⁴ Umu myaka ii amakumi yani vyakuzwala vinu vitasila, nanti ni ngazo zinu zitatala zyavimba.

⁵ Mwaiusya ukuti Yawe Leza winu akasunda nu kuvunuka mwemwe wakwe vino akwasi yakasunda ana yao.

⁶ Acino lyene, mulinzile mwacita wakwe vino wapeezile ilamulo kunomuli, mule mukwikala viine na masunde yakwe nu kumucindika.

⁷ Yawe Leza winu akumuleta mu mpanga ivunde, ino yakwata inguzi ni viziya, nga nu tufukoka twa manzi yano yakapompolokela mu vifoloma nu mu myamba.

⁸ Impanga iya uzombozi wa ngano na baale, na matingi, ni misamvu, ni viseekwa vya pomegeleneti, na mafuta ya miolivi, nga nu uci.

⁹ Kuku mutalatala muvwe inzala nanti ukuulilwa cimwi. Amawe yakweneko mwaya icela, nga mu myamba ya kweneko mungimba mwenemo mukuwa.

¹⁰ Mulailyokezya vyonsi vino mulalonda ukulya, nga nalino mwikuta muce mwataizya Yawe Leza winu pa kumupeela impanga ivunde ino wamupeela.

Amazwi akusoka apakuntilila Yawe

¹¹ “Musininkizye ukuti mutilila Yawe Leza winu. Mutaposiwa kuyela isunde lyakwe lili lyonsi pa masunde yakwe yano nkumupeela ilelo.

¹² Lino mwakwata vyonsi vino mukulonda kulya nga nu kukuula mang'anda asuma akwikala mwenemo,

¹³ na lino ing'ombe ni mfwele zinu, na siluva na zaabu winu vyasanda kumwi na vyonsi vino mukweti,

¹⁴ muce musininkizye ukuti mutakaye ni cilumba nga mwilile Yawe Leza winu wino wamufumizye mu Eguputo, muno mwali azya.

¹⁵ Wene wamutungulwile mu lwanga lulu luwatuke muno mwali inzoka zya usungu na makalela ausungu. Wene wamupeezile amanzi ukufuma mwi we likome cuze mu mpanga ilya iyumalale nupya iyaula amanzi.

¹⁶ Wene wamupeezile mana mu lwanga kuti mulye, ivyakulya vino ivikolwe vinu vitatazile vilye. Wene wamuletile intazi kuti amwezye, pakuti lino zyasila amupeele ulongo nga na vyonsi vimuzipile.

¹⁷ Caleka, lyene mutalinzile mwaelenganya ukuti mwaipangila icuma ku maka inu nu kukoma kwa makasa inu.

¹⁸ Mwaiusya ukuti Yawe Leza winu aliwe akamupeela amaka akuya akama. Wene akacita cii pamulandu wakuti ni lelo kwene acili uwacumi ku upangano uno wene wacisile ni vikolwe vinu.

¹⁹ Mutakezye ukwilila Yawe Leza winu nanti ukusenukila kuli tuleza tuze ku kutupepa nu kututumikila. Ndi mwaca mwacita cico, lyene ilelo nkumusoka ukuti cumi kwene mulononwa.

²⁰ Ndi mwakana kuyela Yawe Leza winu, lyene mulononwa wakwe vino alonona inko zizi zyuze lino mukuya apankolelo.