Malango 6 - Amazwi Yakwe Leza 2013

Isunde ilyacindamisya

¹ “Yaa, ali masunde ni vyeo vino Yawe Leza winu wampeezile ilamulo kuti imusunde pakuti namwe muce mwayalondela mu mpanga ino mwasya mwingile nu kwikala mwenemo.

² Lino muli nu umi, mwemwe pamwi na amu mupanda winu mulinzile ukucindika Yawe Leza winu nu kuyela amasunde yakwe yonsi yano nkumupeela, pakuti mwikale mu mpanga ilya amanda avule.

³ Uvwikisini, mwe ina Izlaeli, nu kuyela amasunde! Ndi caya vivyo mulalola ukuti ivintu vyonsi vimamuzipilanga, nupya mulasanduluka cuze nu kwikala mu mpanga iya uzombozi ukulu cuze nupya iivunde, ndi vino Yawe umwisikulu, Leza wa vikolwe vitu, walavile.

⁴ “Uvwini, mwe ina Izlaeli! Yawe Leza witu, Yawe wenga sile, ali Leza witu.

⁵ Uwatemwa Yawe umwene Leza wako nu mwenzo wako onsi, nu umi wako onsi, na maka yako yonsi.

⁶ Mutezya ukwilila amasunde yaa yano nkumupeela ilelo.

⁷ Mwayasambilizya ku yana yinu. Mwayataka lino mutenzi pa ng'anda, lino muli pa lwendo, lino mukupuza na lino mukuomba.

⁸ Muyanyepelele ku makasa inu nu kuyazwala pa mausyu inu pakuti yangaya wa ciusizyo.

⁹ Muyalembe pa meema zya mang'anda inu na pa mpongolo zya misumba inu

Icakumusopesya ku kukana uvwa

¹⁰ “Wakwe vino Yawe Leza winu walavile ivikolwe vinu, Abulaamu, Isaki, na Yakobo, avino wene alamupeela impanga umwaya imisumba ikulu wakwe cimwi iyapolelelwa ino mwemo mutakuuzile.

¹¹ Amang'anda yayo mwazula ivintu visuma, vino mwemo mutatutilemo, muno mwaya ni vifula vino mwemo mutimvile, ni vyalo vya matingi vino mwemo mutalimile nga ni miolivi ino mwemo mutalemile. Lino Yawe alamuleta mu mpanga ii, ndi mwaca mwalya mwikuta,

¹² muce mutekele pano limwi mungazana ukuti mwilila Yawe uwamufumizye mu Eguputo, muno mwali azya.

¹³ “Mwaoopa Yawe Leza winu. Mwamupepa aliwe wenga sile nu kucita ivilayo umwi zina lyakwe mpo.

¹⁴ Mutaezya ukupepa tuleza tuze utwa antu yano yamizinguluka.

¹⁵ Ndi cakuti mwapepa tuleza tuze, ukali wakwe Yawe ulamukatukila umonone pyu, pamulandu wakuti Yawe Leza winu, wino ali pakasi kinu a Leza wino asilonda uwakucimvyanya nawe.

¹⁶ “Mutakezye ukwezya Yawe Leza winu, wakwe vino mwacisile ku Masaa.

¹⁷ Sininkizini ukuti mwayela amasunde yonsi yano wene wamupeela.

¹⁸ Mwacita sile ivilungame ni visuma vino Yawe akalonda, nga lyene ivintu vyonsi vilamuzipila. Lyene mulaya na maka akupoka impanga ino Yawe walavile ivikolwe vinu,

¹⁹ nupya mulazinga anisi inu wakwe vino wene wamulavile.

²⁰ “Mu manda akwiza inkolelo ana inu yalamuzya yati, ‘Uzye pacani cino Yawe Leza witu wapeezile ilamulo kunotuli kuti twayela amasunde yaa yonsi?’

²¹ Lyene muce muyanene muti, ‘Swemo twali azya ya mwene waku Eguputo, nga lelo Yawe watukulula ku maka yakwe akulu.

²² Twailolile na manso itu ivinjelengwe nga ni vintu ivyakoofya vino wene wacisile ku ina Eguputo nu ku mwene wao nga nu ku ntunguluzi zyakwe.

²³ Yawe watufumizye mu Eguputo kuti atulete kuno nga atupeele impanga ii, wakwe vino walavile ivikolwe vitu ukuti ali nu kucita.

²⁴ Lyene alino Yawe Leza witu watupeezile ilamulo kuti twayela amasunde yaa yonsi nu kumucindika. Ndi twacita vii, ale lyene lyonsi kwene alawaka uluko lwitu nu kulupeela ulongo.

²⁵ Ndi cakuti twaya acumi mukuyela ivintu vyonsi vino Yawe watupeela ilamulo kuti tuyele, ale wene alazangila munotuli.’