Malango 32 - Amazwi Yakwe Leza 2013

¹ “Iyulu ni nsi angala muvwe amazwi yane, muvwikisye vino nene nkulanda.

² Usambilizyo wane ukulakata sile wa malakasi ya mvula alino iyavimbilikizya pa musili kwati ulumi. Amazwi yane yalalakata wa kutonya kwa mvula pa vilimwa vinu, kwati atuswelelele pa mulemvwe.

³ Namapundanga pa kulumbula izina lyakwe Yawe, na antu yakwe yamalanda ivya ukulu wakwe.

⁴ “Yawe ali kacingilila winu uwamaka, ivicitwa vyakwe vyaya ivifumaluke nupya visi vyalufyengo. Leza winu uwakutailwa nupya uwacumi wene akacita sile ivilungame ivisi vyakutitikizya.

⁵ Lelo mwemo musi akutailwa, nupya mutalinzile ukuya antu yakwe, mwe luko lwa nkota nupya lwa usomvi.

⁶ Uzye icumi ali vino mungacita kuli Yawe, mwe viwelewele vya antu, mwe mbutuma mwe? Ala wene ali so, uwa muumvile, uwamucisile ukuya uluko.

⁷ “Si iusini ivyapita ku manda ya cisila, ivya kukatalili. Muzye akwasi inu nayo yamamunena ivyacitike. Muzye akoloci nayo yamamunena ivyacitike pa mpiti.

⁸ Leza wapapelapela wapeela inko impanga zyao. Aliwe wapimila antu imipaka umwakwikala Ukulingana ni mpendwa ya ana yakwe Izlaeli

⁹ Pasi pano Yawe wasolwile antu yakwe, amu mutundu wakwe Yakobo ali caupyani cakwe.

¹⁰ “Wene wayazanyile yakululumba mu lwanga, mu mapoli, mu lwanga uluwatuke nupya mu cimuza ca lukungu. Atandika ukuyacingilila nu kuyasunga ningo, wakwe vino angasunga nyinalinso uwi linso lyakwe.

¹¹ Yawe wasenzile aina Izlaeli kwati acipungu wino akusambilizya ana yakwe ukupapuka, ala akutwanka pa mapa yakwe yano wataanza, alino apapuka nupya.

¹² Yawe wenga sile umwisikulu ali wino watungulwile antu yakwe ukwaula ukwazwiliziwa na kaleza aka inamasi.

¹³ “Wene walesile yateeke impanga zya myamba, alino nu kuilyokezya ivyakulya vyamu vyalo vyao. Ali muno yapandanga uci mu mawe, ni miti yao iya miolivi nayo isapalala mu musili wa mawe.

¹⁴ Ing'ombe ni mbuzi zyao zyafumyanga iziya litimbe ilya lwambu. Yene yakweti imfwele, ni mbuzi, nga ni ng'ombe zisuma wakwe cimwi, yakweti ni ngano zisuma cuze zyaku Basyani, nga na waini umusuma cuze.

¹⁵ “Yesyuluni, antu yakwe Yawe yaya akama, lelo yene yamusangukila. Nu kwina iina cuze cakuti yataza sile. Yafutatila Leza Kaumba wao nu kukana katuula wao uwamaka.

¹⁶ Ukupepa kwao ukwa tuluwi ukwalesile ukuti Yawe asuke akwate uzuwa. Ni vicitwa vyao ivyankota vyalenzile kuti asoke.

¹⁷ Yene yapezile impolelwa zyao ku tuluwi, utusi tuleza mucumi, tuleza utupya tuno ivikolwe vyao vitamanyile, tuleza tuno aina Izlaeli yatatazile yayele.

¹⁸ Yilile Yawe Leza wao, katuula wao uwamaka, wino uwayapile umi.

¹⁹ “Lino Yawe walola vivyo, asoka nga afwita ana yakwe yakalume na yakaci.

²⁰ Avwanga ati, ‘Nata intalatala njazwilizye,’ ‘pakuti lyene nkayalozye, antu yano yatalama, nupya asi yakutailwa.

²¹ Yandenga ukuya nu uzuwa pamulandu ni vipangwe visi leza, Yaleka nasoka pamulandu na tuno yakwama ukuti a tuleza, tuto tuno umucumi tusi a tuleza. Caleka fwandi nani ndaleka yaye nu uzuwa ku cintu icisi umutundu wa mpomvu. Ndaleka uluko lwa ciwelewele luyasosye.

²² Ukali wane ulalunkuma wa moto nu koca akali konsi akaya pano nsi. Wene ulafika na pisina lya nsi nu koca imisisi ya myamba.

²³ “‘Ndatulika impungo pano yali izisi na mpela nu kuyalasa ni nceto zyane zyonsi.

²⁴ Yalafwa ku nzala nu ku mpepo iyanzakaza, yalafwa ku ndwala iziipisye izitamanyika. Ndatuma ivilyanyi vya mpanga vikayazanze, nga ni nzoka izya usungu cuze ziyalumole.

²⁵ Inkondo ilayaletela imfwa mu miseo, mu mang'anda yao mulaya ingofyo. Alumendo na akazyana yalafwa. Kutalaya twana utunya nanti akoloci alapusuka.

²⁶ Yonsi pyu ngani nayalovya, pakuti kutakaye nanti umwi uwa kuiusya.

²⁷ Lelo nsilonda ukuti anisi yao yace yayuvwa yati, ali yano yacimvizye antu yane, kwati asi anene nemwisikulu natinjafulula.’

²⁸ “Izlaeli uluko ulusielenganya ningo. Yene yatakwata amano nanti panono.

²⁹ Yene yaposiwa ukulola icalenzile kuti yayacimvye. Yene yatanga yalooke impela yao vino ilaya.

³⁰ Uzye pacani cino umuntu wenga sile wacimvizye antu izimbi, nga na antu yaili sile nayo yacimvizye antu amazimbi ikumi? Apamulandu wakuti Yawe, Leza wao, wayafutata. Leza wao uwamaka yonsi wayatazyela.

³¹ Anisi yao, yamanya ukuti tuleza twao tutakwata amaka, nupya tusi utwaulamba wakwe Leza wa ina Izlaeli.

³² Anisi yao yaipa wa ina Sodoma na Gomola, yakoline wa miti yamatingi ino ikaseeka matingi alule,

³³ wakwe waini umutikinkanye nu usungu wa nzoka.

³⁴ “Yawe akaiusya vino anisi yao yacita, nu kuvisunga mukulolela insita isuma iya kuyavunuka.

³⁵ Yawe alalandula pa vicitwa vyao nu kuyavunuka. Insita ilafika lino yalasyelemuka yapone. Uwanda wa kuzanzwa kwao wapalama.

³⁶ Yawe alakulula antu yakwe lino alalola ukuti amaka yao yasila. Alaya na mizu kuli yao akamutumikila, lino walola ukuti awe lyene yacepelwa amaka. Nu kulola ukuti awe lyene yasyala ancepelwa, cisi cimwi yangaya azya nanti antungwa.

³⁷ Alino lyene Yawe aluzya antu yakwe ati, ‘Uzye tuleza tutu, tuno mwasintilile mwenemo amaka inu, tuli kwi?

³⁸ Tuleza tutu mwatulisyanga amafuta ya mpolelwa zinu nupya mwatupeelanga na waini uwa mawila inu wakuti tumwe. Ale fwandi lekini twize tumwazwe. Lekini twize tumupususye.

³⁹ “ ‘Nemo, nenga mpo, nene indi Leza. Kutaya leza namuze. Nkakoma nupya mpeela umi, nkacisa nupya mpozya, kusi nanti wenga angamufumbatula mu makasa yane.

⁴⁰ Icumi kwene anene Leza wa umi, nkakatusya ikasa lyane papela nu kulapa

⁴¹ ukuti indanyola ulupanga lwane uluyengese nu kusininkizya ukuti kwaya ukucita ulungami. Ndacita cilanduzi ku anisi yane nu kuvunuka yao yano yampata.

⁴² Inceto zyane zilatona sile uwazi wao, nu lupanga lwane lulakomola yao akukanya vino nkulonda. Intalasya penepo nanti umwi pali yao alankatukila. Na yao kwene alasyala impondo kumwi na anyepwe, yalafwa yonsi pyu.’

⁴³ “Mwe antu amu nko zyonsi, mulinzile mwalumbanya antu yakwe Yawe, pano wene alavunuka yonsi yao alayakoma. Wene akacita cilanduzi pa anisi yakwe. Nu kwelela amaifyo ya mpanga na ya antu yakwe.”

⁴⁴ Mose na Yoswa umwana umonsi wakwe Nuni yasawile nu kwimba amazwi ya lwimbo luu, kuti aina Izlaeli yuvwe.

Amazwi yakwe Mose autunguluzi wakusyalikizya

⁴⁵ Lino Mose wamazile ukunena aina Izlaeli amazwi yaa yonsi,

⁴⁶ alino wavwanzile ati, “Sininkizini ukuti mwayela amalamulo yaa yonsi yano namupeela ilelo. Mwasambilizya kweneko na ana inu, pakuti nayo yayela ningo amasambilizyo yonsi yakwe Leza.

⁴⁷ Amasambilizyo yaa yasi amazwi asilesile, lelo yene ali umi winu kwene. Mwayayela, pakuti lyene muce mwikale amanda avule mu mpanga ilya mu mbalama yakwe Yodani ino mwasya mupoke nu kwikala mwenemo.”

⁴⁸ Uwanda kwene uwo Yawe anena Mose ati,

⁴⁹ “Yanga ku myamba iyacingana iya Abalimu iyaya mu mpanga ya ina Moabu ukulungatana nu musumba wa Yeliko, ukakwele Mwamba wa Nebo. Alino lyene ulolekesye impanga ya Kenani, ino nasya mpeele ku ina Izlaeli.

⁵⁰ Wemo ulafwila pa mwamba kwene uwo wakwe vino umunyonko Aaloni wafwile pa Mwamba wa Holi,

⁵¹ pamulandu wakuti mweili kwene mutali acumi kunondi pa manso ya ina Izlaeli. Lino mwali ku manzi aku Meliba, pipi nu musumba wa Kadesyi, mu lwanga lwa Zini, mwemwe mweili kwene mutankwatile umucinzi icilingane pa manso ya ina Izlaeli.

⁵² Caleka, wemo umaya ukalolekesye sile impanga ilya patali patali. Lelo utalingila mwenemo mu mpanga ino nkupeela aina Izlaeli.”